پاکستان ءِ ھوار بوھگ ءِ روچ آجوئی ، وت واجھی ءِ ھک ءُ کشمیری راج ءِ سرڈگار ءِ گوما ابدمانیں سیادی ءِ نوک کنگ ءِ روچ اِنت، سید یوسف رضا گیلانی

اسلام آباد۔19جولائی  (اے پی پی): سینیٹ ءِ چیئرمین سید یوسف رضا گیلانی ءَ گوشت کہ پاکستان ءَ ھوار بوھگ ءِ روچ کشمیری راج ءِ واستہ آجوئی، وت واجئی ءِ ھک ءُ پاکستان ءِ گوما ابدمانیں سیادی آنی نوک کنگ ءِ روچ اِنت۔ 19جولائی کشمیری راج ءِ پاکستان ءَ گوں گہتریں وابستگی ءُ وت واجہی ءِ حق ءِ بے دروریں جزم ءِ علامت اِنت۔ سینیٹ ءِ سیکرٹریٹ ءَ چہ جاڑی بوتگیں کلوہ ءِ تہ ءَ چیئرمین سید یوسف رضا گیلانی ءَ گوشت کہ کشمیر ءِ جیڈھ اقوام متحدہ ءِ سلامتی کونسل ءِ قرارداد آنی رد ءَ گیش ءُ گیوار نہ بوتگیں میاں اوستمانی جیڈھ اِنت، ایشی ءِ انصاف ءُ برجائی ءِ گیواری خطہ ءَ دائمی امن ءِ واستہ ناگزیر اِنت۔ آئی ءَ لوٹ کتگ کہ میاں اوستمانی براتی مقبوضہ جموں ءُ کشمیر ءَ انسانی ھک لگتمالی آنی سر ءَ جوانیں نوٹس بہ زوریت ءُ کشمیری اُلس ءَ را وت واجئی ءِ بنیاتی ھک ءَ را دل یکیمی کنگ ءِ واستہ وتی کرد ءَ پیلو بہ کنت۔ سید یوسف رضا گیلانی ءَ گوشت کہ پاکستان ءِ پارلیمنٹ ءَ مدام کشمیری اُلس ءِ جائزیں جہد ءِ سرجمی ءَ کمک کتگ، سینیٹ راجی، دمگی ءُ میاں اوستمانی پارلیمانی دیوان آنی تہ ءَ کشمیری اُلس ءِ آواز ءَ را جوانیں رنگ ءَ چست کنگ ءَ برجاہ دار ایت۔ چیئرمین سینیٹ ءَ اے جزم ءِ پدا زور دات کہ پاکستان کشمیری راج ءَ را ھرچ پڑ ءَ سیاسی، سفارتی ءُ اخلاقی کمک ءَ برجاہ دار ایت، ءُ آجوئی ءُ انصاف ءِ واستہ کشمیری راج ءِ قربانی کدی شموشگ نہ بنت۔