پاک چین ءِ دوائی ءُ جان سلامتی ءِ بی ٹو بی سرمایہ کاری کانفرنس ءِ سوبمندی غیر معمولی انت، مصطفی کمال

اسلام آباد۔18جولائی  (اے پی پی): جان سلامتی ءِ وفاقی وزیر سید مصطفیٰ کمال ءَ گوشت کہ پاک چین ءِ دوائی ءُ جان سلامتی ءِ بی ٹو بی سرمایہ کاری کانفرنس ءِ سوبمندی غیر معمولی اَنت ءُ پاکستان ءِ دوائی آنی صنعت ءِ واستہ نوکیں دور ءِ بندات ثابت بنت۔ پاک چین فارماسیوٹیکل اینڈ ہیلتھ کیئر بی ٹو بی سرمایہ کاری کانفرنس ءِ دومی روچ ءَ پریس کانفرنس ءَ گوں گشتانک دیان ءَ وفاقی وزیر ءَ گوشت کہ کانفرنس ءِ تہ ءَ پاکستان ءُ چین ءِ نیام ءَ 850ملین امریکی ڈالر ءِ کاروباری شریکداری ءِ سر ءَ دستخط کنگ بوتگ ایشی ءِ تہ ءَ 600ملین امریکی ڈالر ءِ باقاعدہ معاہدہ ءُ 80ملین امریکی ڈالر ءِ میمو 000 ءِ مفاہمت کنگ بوتگ۔ آئی ءَ گوشت کہ اے معاہدہ آنی تہ ءَ 18ھربل دوائی آنی ھوالگ ءَ منصوبگ ھم ھوار اَنت، نوکیں معاہدہ آنی چیر دستی ءَ پاکستان ءَ میڈیکل ڈیوائسز جوڑیشت ءِ منصوبگ، ویکسین ءِ لوکل پروڈکشن ءُ روایتی چینی دوائی آنی تہ ءَ ھم بندات کنگ بیت۔ مصطفیٰ کمال ءَ گوشت کہ پاکستان ءُ چین ءِ نیام ءَ فارما ءِ شوبگ ءَ بزنس ٹو بزنس کمک نوکیں کونڈ آنی سر ءَ سر بوھگ ءَ انت ءُ حکومت پاکستان ءَ چینی کمپنی آنی سرمایہ کاری ءَ را وش اتک کنت۔ سید مصطفیٰ کمال ءَ سرجمیں راج ءُ پاکستان ءِ مزن وزیر ءَ را اے سوبمندی ءِ مبارک بات دات ءُ گوشت کہ اے سرمایہ کاری میاں اوستمانی براتی ءِ پاکستان ءِ سر ءَ گیش بوھوکیں دل یکیمی ءِ درشان انت۔ آئی ءَ گوشت کہ پاکستان ءَ ویکسین ءِ لوکل پروڈکشن بندات کنگ ءِ واستہ چینی کمپنی آنی گوما ھم ھاسیں معاہدہ کنگ بوتگ۔ پاکستان اے وھد ءَ 13 وڑیں ویکسین درآمد کنت، وھدیکہ اگاں بنجاہی پیداوار بندات نہ کنگ بہ بیت گڈا ویکسین درآمد کنگ ءِ ھرچ 2030ءَ تاں 1.2ارب امریکی ڈالر ءَ سر بوت کنت۔ وفاقی وزیر ءَ گوشت کہ پاکستان وتی دوائی ءِ 90درسد خام مال ءَ را درآمد کنت، بلے نوں خام مال ءِ بنجاہی پیداوار ءِ واستہ چینی کمپنی آنی گوما معاہدہ کنگ بوتگ ایشی ءَ چہ دوائی آنی پیداوار ءِ ھرچ ءُ درچ ءُ نھاد کم بنت ءُ الس ءَ را براہ راست سیت رسیت۔ آئی ءَ گوشت کہ پاکستان ءَ میڈیکل ڈیوائسز ءِ لوکل مینوفیکچرنگ، کلینیکل ٹرائلز ءُ پیشہ وارانہ تربیت ءِ شوبگ آنی تہ ءَ ھم ھاسیں معاہدہ کنگ بوتگ ایشی ءَ چہ ٹیکنالوجی ءِ ٹرانسفر، مہارت ءِ دیمروئی ءُ صنعتی دیمروئی ءَ کمک رسیت۔ مصطفیٰ کمال ءَ گوشت کہ ڈرگ ریگولیٹری اتھارٹی آف پاکستان ءِ 80درسد ءَ چہ گیش ازمت ڈیجیٹل کنگ بوتگ انت۔ نوں منشیات ءِ لائسنس ءِ درخواست چہ لوگ ءَ آن لائن کنگ بیت ءُ ڈراپ پورٹل ءَ رجسٹریشن ءِ 20 روچ ءِ تہا ای میل ءِ وسیلگ ءَ لائسنس جاری کنگ بیت۔ آئی ءَ گوشت کہ پاکستان ءَ فارما ریگولیشن ءِ شوبگ ءَ جھان ءِ پجار رسگ ءَ اِنت ءُ گوستگیں یک سال ءِ ساھت ءَ پاکستان ءَ فارماسیوٹیکل ریگولیٹری ءِ شوبگ ءَ چار میاں اوستمانی ایوارڈ رستگ۔ ورلڈ ہیلتھ آرگنائزیشن ءِ نیمگ ءَ پاکستانی لیبارٹری پیش کوالیفائی کنگ بوتگ انت وھدیکہ پاکستان 52 ملک آنی تہ ءَ لیول ٹو ءِ چیر دستی ءَ درمان برآمد کنگ ءَ انت۔ آئی ءَ گوشت کہ اپریل 2027 ءَ ڈبلیو ایچ او لیول تھری ءِ چار ءُ تپاسی ءِ گمان اِنت ایشی ءَ پد دگہ 100 ملک آناں دوائی آنی برآمد کنگ ءِ موہ رس ایت۔ آئی ءَ گوشت کہ پاکستان ءِ دوائی آنی صنعت ءِ تہ ءَ جھان ءِ لوٹ آناں پیلو کنگ ءِ سرجمیں گنجائش است انت۔ آئی ءَ گوشت کہ کانفرنس ءَ چین ءِ نیمگ ءَ چہ 170 ڈل ءُ پاکستان ءِ نیمگ ءَ چہ 300 ءَ چہ گیش بنجاھی ڈل بھر زوری کنگ ءَ انت۔ آئی ءَ اے سوبمندیں مراگش ءَ چین ءَ پاکستان ءِ سفیر خلیل ھاشمی ءِ کوشست آناں ساڑات ءُ گوشت کہ آئی ءَ گوستگیں شش ماہ ءِ تہ ءَ پورٹل ءِ جوڑ کنگ ءَ چہ چینی کمپنی آناں رجسٹریشن ءِ موہ داتگ۔ آئی ءَ ھاسیں سرمایہ کاری آسراتی کونسل، سرمایہ کاری بورڈ ءِ وفاقی وزیر قیصر احمد شیخ ءُ سیادی داروکیں ادارگ آنی منت گپت ءُ گوشت کہ کانفرنس ءِ بندوبست میاں اوستمانی معیار آنی رد ءَ کنگ بوتگ، تانکہ رہشونی ءِ واستہ سرجمیں انفارمیشن بورڈ آنی سر ءَ چینی زبان ءَ زانتکاری ایر کنگ بوتگ۔ وفاقی وزیر جان سلامتی ءَ گوشت کہ اے راجدپتری سوبمندی مزن وزیر شہباز شریف ءُ حکومتی ٹیم ءِ سروکی، وژن ءُ یکجائی کوشست آنی سبب ءَ ممکن بوتگ۔ آئی ءَ گوشت کہ پاک چین ءِ اقتصادی کمک ءِ نوکیں دور ءِ بنگیج بوتگ ایشی ءِ جوانیں آسر آیوکیں باھند آنی تہ ءَ سر بنت۔ آئی ءَ گوشت کہ دگنیا پاکستان ءِ صلاحیت آناں پہمگ ءَ انت ءُ جھان ءِ تک ءَ ملک ءِ شرپ ءُ پسندی گیش بوتگ انت۔ وفاقی وزیر ءَ امیت سہرا کت کہ آیوکیں روچ پاکستان ءِ واستہ گیشاں چہ گیش دیمروئی، سرمایہ کاری ءُ وشحالی ءِ سبب بنت۔ وفاقی وزیر برائے جان سلامتی ءَ گوشت کہ کانفرنس ءِ ساھت ءَ دستخط کتگیں معاہدہ پاکستان ءِ کاروباری توانائی، سرمایہ کار دوستیں چاگرد ءُ فارما انڈسٹری ءِ توانائی ءِ یک پدریں ثبوت انت۔ آئی ءَ گوشت کہ چینی کمپنی آنی مزنیں کساس ءِ بھر زوری اے گپ ءِ نشانی اِنت کہ گلوبل سرمایہ کار پاکستان ءِ فارما سیکٹر ءِ سر ءَ بھروسہ کنگ ءَ اَنت۔ فارما انڈسٹری ءِ تہ ءَ سرمایہ کاری ءَ چہ روزگار ءِ نوکیں موہ پیداک بنت، نوکیں ٹیکنالوجی پاکستان ءَ دیم دیگ بنت ءُ ملک ءَ فارما پروڈکٹس ءِ برآمدات ءَ را گیش کنگ ءَ چہ ارزشتی ایں زرّ کمائی بیت۔ مصطفیٰ کمال ءَ گوشت کہ پاکستان ءُ چین ءِ نیام ءَ فارما شوبگ ءَ کمک یک نوکیں دور ءِ بندات انت۔ آئی ءَ اے جزم ءِ درشان کت کہ ملک ءَ سرمایہ کاری ءِ تہ ءَ گیش بوھوکیں جھان ءِ اعتماد ءَ چہ سرجمیں پائدگ چست کنگ بیت ءُ نوکیں سرمایہ کاری ءُ کاروباری موہ آناں السی گہبود ءُ راجی دیمروئی ءِ تہ ءَ بدل کنگ ءِ تہ ءَ درستیں سیادی داروکیں شوبگ وتی کرد ءَ پیلو کن اَنت۔