پاکستان ءُ چین ءَ تاں انوگ ءَ دوا ءُ درمان ءِ شوبگ ءَ 850 ملین امریکی ڈالر ءِ معاہدہ کتگ کہ اے ملک ءِ معیشت ءُ جان سلامتی ءِ شوبگ ءِ ھاتر ءَ یک ھاسیں سنگ میل ءِ ، وفاقی جان سلامتی ءِ وزیر مصطفیٰ کمال

اسلام آباد۔18جولائی  (اے پی پی): وفاقی جان سلامتی ءِ وزیر مصطفیٰ کمال ءَ گوشت کہ پاکستان ءُ چین ءِ نیام ءَ دوا ءُ درمان ءِ شوبگ ءَ تاں انوگ ءَ 850 ملین ڈالر ءِ معاہدہ کنگ بوتگ کہ اے ملک ءِ معیشت ءُ جان سلامتی ءِ شوبگ ءِ واستہ یک ھاسیں سنگ میل ءِ انت۔ چین بی ٹو بی فارماسیوٹیکل انویسٹمنٹ کانفرنس ءِ دومی روچ ءَ نیوز کانفرنس ءَ گوں تران کنان ءَ وفاقی وزیر ءَ گوشت کہ کانفرنس ءِ ساھت ءَ 16 معاہدہ ءُ 80 مفاہمت نامہ ءِ سر ءَ دستخط کنگ بوتگ ایشی ءِ تہ ءَ 600 ملین ڈالر ءِ باقاعدہ معاہدہ ءُ 50ملین ڈالر ءِ مفاہمت نامہ ھوار انت۔ آئی ءَ گوشت کہ اے معاہدہ آنی تہ ءَ 18ھربل میڈیکسن ءِ ھوالگ ءَ منصوبگ ھم ھوار اَنت۔ مصطفیٰ کمال ءَ گوشت کہ پاکستان ءُ چین ءِ نیام ءَ فارما ءِ شوبگ ءَ بزنس ٹو بزنس کمک نوکیں کونڈ آنی سر ءَ سر بوھگ ءَ انت ءُ حکومت پاکستان ءَ چینی کمپنی آنی نیمگ ءَ سرمایہ کاری ءَ را وش اتک کنت۔ آئی ءَ گوشت کہ پاکستان ءَ ویکسین ءِ لوکل پروڈکشن بندات کنگ ءِ واستہ چینی کمپنی آنی گوما ھم ھاسیں معاہدہ کنگ بوتگ۔ آئی ءَ گوشت کہ پاکستان اے وھد ءَ 13 رنگ ءِ ویکسین درآمد کنت، وھدیکہ اگاں بنجاہی پیداوار بندات نہ کنگ بہ بیت گڈا 2030 ءَ تاں ویکسین درآمد ءِ ھرچ ءُ درچ 1.2ارب امریکی ڈالر ءَ سر بوت کنت۔ وفاقی وزیر ءَ گوشت کہ پاکستان وتی دوائی ءِ 90درسد خام مال ءَ را درآمد کنت، بلے نوں خام مال ءِ بنجاہی پیداوار ءِ واستہ چینی کمپنی آنی گوما معاہدہ کنگ بوتگ ایشی ءَ چہ دوائی آنی پیداوار ءِ ھرچ ءُ درچ ءُ نھاد کم بنت ءُ الس ءَ را براہ راست سیت رسیت۔ آئی ءَ گوشت کہ پاکستان ءَ میڈیکل ڈیوائسز ءِ لوکل مینوفیکچرنگ، کلینیکل ٹرائلز ءُ پیشہ وارانہ تربیت ءِ شوبگ آنی تہ ءَ ھم ھاسیں معاہدہ کنگ بوتگ ایشی ءَ چہ ٹیکنالوجی ءِ ٹرانسفر، مہارت ءِ دیمروئی ءُ صنعتی دیمروئی ءَ کمک رسیت۔ مصطفیٰ کمال ءَ گوشت کہ ڈرگ ریگولیٹری اتھارٹی آف پاکستان ءِ 80درسد ءَ چہ گیش ازمت ڈیجیٹل کنگ بوتگ انت۔ نوں منشیات ءِ لائسنس ءِ درخواست چہ لوگ ءَ آن لائن کنگ بیت ءُ ڈراپ پورٹل ءِ سر ءَ رجسٹریشن ءِ 20 روچ ءِ تہ ءَ ای میل ءِ وسیلگ ءَ لائسنس جاری کنگ بیت۔ آئی ءَ گوشت کہ پاکستان فارما ریگولیشن ءِ شوبگ ءَ جھان ءِ پجار ءَ زورگ ءَ انت۔ ورلڈ ہیلتھ آرگنائزیشن ءِ نیمگ ءَ پاکستانی لیبارٹری پیش کوالیفائی کنگ بوتگ انت وھدیکہ پاکستان 52 ملک آنی تہ ءَ لیول ٹو ءِ چیر دستی ءَ درمان برآمد کنگ ءَ انت۔ آئی ءَ گوشت کہ اپریل 2027 ءَ ڈبلیو ایچ او لیول تھری ءِ پٹ ءُ پول ءِ گمان اِنت، ایشی ءَ پد دگہ 100 ملک آناں دوائی آنی برآمد کنگ ءِ موہ رس ایت۔ وفاقی جان سلامتی ءِ وزیر ءَ گوشت کہ کانفرنس ءِ ساھت ءَ دستخط بوتگیں معاہدہ پاکستان ءِ کاروباری توانائی، سرمایہ کار دوستیں چاگرد ءُ فارما انڈسٹری ءِ توانائی ءِ ھاسیں گواہ انت۔ آئی ءَ گوشت کہ چینی کمپنی آنی مزنیں کساس ءِ بھر زوری اے گپ ءِ نشانی اِنت کہ گلوبل سرمایہ کار پاکستان ءِ فارما سیکٹر ءِ سر ءَ بھروسہ کنگ ءَ اَنت۔ فارما انڈسٹری ءِ تہ ءَ سرمایہ کاری ءَ چہ روزگار ءِ نوکیں موہ پیداک بنت، نوکیں ٹیکنالوجی پاکستان ءَ دیم دیگ بنت ءُ ملک ءَ فارما پروڈکٹس ءِ برآمدات ءَ را گیش کنگ ءَ چہ ارزشتی ایں زرّ کمائی بیت۔ مصطفیٰ کمال ءَ گوشت کہ پاکستان ءُ چین ءِ نیام ءَ فارما شوبگ ءَ کمک یک نوکیں دور ءِ بندات انت۔ آئی ءَ ملک ءَ سرمایہ کاری ءِ تہ ءَ گیش بوھوکیں جھان ءِ دل یکیمی ءَ چہ سرجمی ءَ پائدگ چست کنگ ءِ جزم ءِ درشان کت ءُ نوکیں سرمایہ کاری ءُ کاروباری موہ آناں السی گہبود ءُ راجی دیمروئی ءِ تہ ءَ بدل کنگ ءِ واستہ درستیں سیادی داروکیں شوبگ وتی کرد ءَ پیلو کن اَنت۔