وفاقی وزیر داخلہ محسن نقوی  ءَ فائر ایمرجنسی ایکسرسائز  آنی چار ءُ تپاسی

اسلام آباد۔18جولائی  (اے پی پی): وفاقی تہی کارانی وزیر محسن نقوی ءَ شمبے ءِ روچ ءَ اسلام آباد ءَ کیپیٹل ایمرجنسی سروس ءِ نیمگ ءَ کنگ بوتگیں ماک فائر ایمرجنسی مشق ءِ چار ءُ تپاسی کت کہ ایشی ءِ تہ ءَ فائر بریگیڈ ءُ ایمبولینس ٹیم ھال ءِ رسگ ءَ چہ ایوک ءَ 8منٹ ءِ تہ ءَ جاہ ءَ سر بوتگ اَنت۔ وزیر داخلہ ءَ ٹھینگ بوتگیں وھد ءِ تہ ءَ وھد ءِ سر ءَ پسو ءِ ستا کرتگ ءُ ایشی ءَ را کیپیٹل ایمرجنسی سروس ءِ پیشہ وارانہ ءُ آپریشنل تیاری ءِ جوانیں ثبوت لیک اتگ۔ مشک ءَ چہ پد محسن نقوی ءَ آتش نشانی ءُ ایمرجنسی کارندہ آں گوں گند ءُ نند کتگ ۔ آئی ءَ آھانی ھزمت ءُ پیشہ وارانہ عزم ءَ را خراج تحسین پیش کت ءُ ڈیوٹی ءِ وھد ءَ دیم ءَ اتکگیں مشکلات ءِ بابت ءَ ھم سرپد بوت۔ آئی ءَ کمیں وسیلگ ءُ کوھنیں سامان آنی باوجود کارندہ آنی کارکردگی ءَ را ستا کرزیں لیک اتگ۔ معائنہ ءِ ساھت ءَ وزیر داخلہ ءَ جیڈھ ءِ درشانی کت کہ کیپیٹل ایمرجنسی سروس ءِ گاڑی ءُ سامان 2009 ءَ پد بدل نہ بوتگ انت۔آئی ءَ را ھال دیگ بوت کہ اگاں استیں بیڑے جوانیں رنگ ءَ کار کنگ بوتگ بلے لھتیں فائر ٹینڈر 1993 ءِ ماڈل ءِ انت ءُ انگت ءَ کارمرد کنگ ءَ انت۔ وزیر داخلہ ءَ را اے گپ ءِ ھم سرپد کنگ بوت کہ ایمرجنسی کارندہ آناں بازیں سالاں چہ ھچ وڑیں باقاعدہ تربیت یا ریفریشر کورس ءِ گوزگ ءِ موہ نہ رستگ، ایشی ءِ سبب ءَ نوکیں لوٹ آنی رد ءَ تربیت ءِ ترندیں ضلورت اِنت۔ محسن نقوی ءَ ترندیں رنگ ءَ چیئرمین کیپیٹل ڈویلپمنٹ اتھارٹی سہیل اشرف ءَ را ہدایت کت کہ آ ہفت روچ ءِ تہا کیپیٹل ایمرجنسی سروس ءِ سرجمیں اپ گریڈیشن ءِ ھاتر ءَ یک جامع منصوبہ ءِ پیش بہ کنت۔ آئی ءَ اے گپ ءِ پدر کنگ ءَ گوشت کہ منصوبگ ءِ تہ ءَ نوکیں فائر بریگیڈ ءِ گاڑی، ایمبولینس، ریسکیو ءِ سامان ءُ ایندگر نوکیں آسراتی آنی گرگ ھوار کنگ بہ بیت تانکہ وفاقی دارالحکومت ءِ ایمرجنسی رسپانس ءِ گنجائش ءَ را گیش موثر جوڑ کنگ بہ بیت۔ نقلی مشق ءِ بندات ھما وھد ءَ کنگ بوتگ کہ قائم مقام ڈپٹی کمشنر صاحب زادہ یوسف ءَ ایمرجنسی سروس ءِ آپریشنل گنجائش ءِ چار ءُ تپاسی ءِ واستہ ریسکیو 1122 ءَ نقلی آتشزدگی ءِ ھال داتگ۔ اے موہ ءِ سر ءَ وزیر داخلہ ءَ گوشت کہ دیر شپ ءِ اے مشق ءَ کیپیٹل ایمرجنسی سروس ءِ وھد ءِ سر ءَ کار کنگ ءَ چہ دل یکیمی آں ۔ آئی ءَ گوشت کہ ھرچ وڑیں حقیقی ایمرجنسی ءِ تہ ءَ ترندیں رنگ ءَ پسو دیگ انسانی جان سلامتی ءِ رکھینگ ءُ تاوان ءَ را کم چہ کم کنگ ءِ تہ ءَ بنیاتی کرد پیلو کنت۔ آئی ءَ دل یکیمی دات کہ حکومت کیپیٹل ایمرجنسی سروس ءَ را نوکیں گاڑی، المی سامان ءُ لوٹوکیں وسیلگ آنی پجاری کنت تانکہ اسلام آباد ءَ ایمرجنسی ءَ گوں گر ءُ چیل بوھگ ءِ گنجائش ءَ را گیش مھکم کنگ بہ بیت۔ اے موہ ءِ سرءَ وزیر داخلہ ءِ گوما سی ڈی اے ءِ چیئرمین سہیل اشرف ءُ قائم مقام ڈپٹی کمشنر صاحب زادہ یوسف ہم ساڑی بوتگ انت۔