وژن 2030 پاک سعودی ءِ نیام ءَ تجارتی سیادی ءَ را مھکم کنگ ءِ واستہ یک ھاسیں سنگ میل ءِ انت، ڈپٹی چیئرمین سینیٹ

اسلام آباد۔17جولائی  (اے پی پی):سینیٹ ءِ ڈپٹی چیئرمین سیدال خان ناصر ءَ گوشت کہ پاکستان ءُ سعودی عرب ءِ نیام ءَ براتی سیادی ءِ بنیات ایمان، بھروسہ ءُ یکجائی دیمروئی ءِ مھکمیں بندوک انت۔ سعودی وژن 2030 ءَ جہانی سرمایہ کاری ءُ نجی شعبہ ءِ دیمروئی ءِ ھاتر ءَ نوکیں دروازگ پچ کتگ انت، ایشی ءَ چہ پاکستانی کاروباری براتی ءَ را سرجمیں رنگ ءَ سیت چست کنگ بوت کنت۔ آئی ءَ اے ھیالانی درشانی اسلام آباد ءَ الرائی گروپ ءِ نیمگ ءَ برجم داشتگیں ’’سعودی کمپنی جوڑیشت ءُ کاروباری توسیپ ءِ سروک دیوان 2026‘‘ ءَ ھاسیں مہمان ءِ بستار ءَ گشتانک دیان ءَ کت۔ آئی ءَ الرائی گروپ ءُ سعودی عرب ءِ بادشاہی ءَ را وشیں سروک دیوان ءِ برجائی ءِ سر ءَ مبارک بات دات۔ ڈپٹی چیئرمین سینیٹ ءَ گوشت کہ اے مراگش اقتصادی سیادی ءَ را گہتر کنگ ءُ وت مہ وتی تجارت ءُ سرمایہ کاری ءَ را نوکیں رنگ دیگ ءِ واستہ یک ھاسیں کوشست انت۔ آئی ءَ دل یکیمی دات کہ سینیٹ ءُ پاکستان ءِ حکومت اقتصادی دیمروئی، روزگار ءُ ٹیکنالوجی ءِ ٹرانسفر ءِ دیمروئی ءِ واستہ ھمک رنگ ءِ کمک ءَ را برجاہ دار ایت۔ الرائی گروپ ءِ چیئرمین بلال ایم زبیر ءَ مہمان آنی منت گپت کنان ءَ سعودی عرب ءِ کاروباری دوستیں پالیشی آنی سر ءَ زور پر دات۔ آئی ءَ گوشت کہ وژن 2030 ءِ چیر دستی ءَ سعودی عرب درملکی کمپنی آناں 100درسد ملکیت ءِ ھک، آسانیں بینکنگ چینل ءُ جوانیں کاروباری چاگرد ءِ پجاری کنگ ءَ اِنت ءُ ایشی ءِ تہ ءَ ھچ وڑیں کم چہ کم سرمایہ ءِ لوٹ ءُ گزر نیست۔ آئی ءَ اے گپ ءِ پدرائی کت کہ پاکستان ءِ کجام ھم پرائیویٹ لمیٹڈ کمپنی یا پارٹنر شپ فرم کہ کم چہ کم یک سال ءَ چہ سرگرم اِنت آ لوٹوکیں کاگد (سرٹیفکیٹ آف انکارپوریشن ءُ آڈٹ رپورٹ) ءِ وسیلگ ءَ سعودی عرب ءِ تیزی ءَ گوں دیمروئی کنوکیں معیشت ءِ بھر جوڑ بوت کنت۔ ایف پی سی سی آئی ءِ صدر عاطف اکرام شیخ ءَ نجی شعبہ ءِ سیادی ءَ را مھکم کنگ ءِ سر ءَ زور پر دیان ءَ پاک ءُ سعودی ءِ تجارتی سیادی آنی تہ ءَ الرائی گروپ ءِ تعمیری کرد ءِ توسیپ کت۔ سروک دیوان ءَ جتا جتائیں شوبگ آنی 12 نامداریں پاکستانی کمپنی آنی سروک ءُ سعودی عرب ءِ الرائی گروپ ءِ نیام ءَ تپاک نامہ ءِ سر ءَ دستخط کنگ بوتگ کہ ایشی ءِ چیر دستی ءَ اے کمپنی سعودی عرب ءَ سرمایہ کاری ءُ وتی کاروبار بندات کن اَنت۔ سرمایہ کاری ءِ اے ھاسیں سنگ میل ءِ گوما اے سروک دیوان دوئیں براتیں ملک آنی نیام ءَ دراجیں مدتی اقتصادی سیادی آنی واستہ یک مھکمیں بنیات ءِ رنگ ءَ ثابت بوت۔ سروک دیوان ءَ مزنیں کساسے ءَ سفارتکار، سرمایہ کار ءُ جتا جتائیں ملکی ءُ درملکی کمپنیانی مزنیں کارندہ آں بہر زرتگ۔