پاور سیکٹر ءِ تہا موثر منصوبہ بندی ءِ ھاتر ءَ پکوئیں ءُ یکجاھیں ڈیٹا المی انت، وفاقی وزیر توانائی

اسلام آباد۔17جولائی  (اے پی پی): توانائی ءِ وفاقی وزیر سردار اویس احمد خان لغاری ءَ گوشت کہ بجلی ءِ شوبگ ءَ جوانیں منصوبگ بندی ءِ واستہ معتبر ءُ یکجاھیں ڈیٹا المی اِنت۔ ڈیٹا گورننس کونسل نوکیں، شفاف ءُ احتساب ءِ گورننس ءِ آسراتی ءِ پھجارینگ ءُ بجلی ءِ شوبگ ءَ ڈیٹا ءِ یک وڑیں ءُ کارآمدیں انتظام ءِ جوڑ کنگ ءِ تہ ءَ ھاسیں کرد پیلو کنت۔ پاور ڈویژن ءِ جارکش ءِ رد ءَ آئی ءَ اے ھیالانی درشانی پبلک سیکٹر ڈیٹا گورننس کونسل ءِ اولی دیوان ءِ ساھت ءَ کتگ اَنت، ایشی ءِ تہ ءَ آ بجلی ءِ شوبگ ءَ موثر، شفاف ءُ نوکیں ڈیٹا گورننس ءِ دیمروئی ءِ ھوالگ ءَ جیڈھ آنی سر ءَ چار ءُ تپاسی کنت۔ گند ءُ نند ءَ وفاقی وزیر ءَ را ڈیٹا گورننس کونسل ءِ پیش کرتگیں ادارہ جاتی ڈھانچہ ءِ بابت ءَ سرپد کنگ بوت۔ وفاقی وزیر ءَ کونسل ءِ ایگزیکٹو ڈائریکٹر ءِ گچین کنگ ءِ عمل ءَ را زوتاں چہ زوت سرجم کنگ ءِ پنت ءُ شون کتگ ءُ گوشت کہ کونسل ءَ را سرجمیں گنجائش ءِ گوما کارآمد جوڑ کنگ بہ بیت۔ وفاقی وزیر توانائی ءَ پنت ءُ شون کت کہ ڈیٹا گورننس کونسل ءِ دیوان باقاعدگی ءَ برجم دارگ بہ بنت تانکہ جتا جتائیں جیڈھ آنی سر ءَ پیشرفت ءِ سر ءَ مدام چار ءُ تپاسی کنگ بہ بیت۔ آئی ءَ کونسل ءِ قرارداد آنی سر ءَ جوانیں ءُ وھد ءِ سر ءَ عمل درآمد ءِ واستہ ایگزیکٹو ورکنگ کمیٹی ءِ جوڑ کنگ ءِ ھم پنت ءُ شون کتگ کہ ایشی ءِ تہ ءَ کونسل ءِ قرارداد آنی سر ءَ عمل درآمد ءُ پیشرفت ءِ سر ءَ نگرانی کنگ بیت۔ عویس لغاری ءَ گوشت کہ ڈیٹا ءِ جوانیں کارمردی ءَ چہ بجلی ءِ شوبگ ءَ جوانیں کارکردگی، وسیلگ آناں جوانیں رنگ ءَ کارمرد کنگ ءُ جوانیں منصوبگ بندی ءَ را گیش کنگ بیت۔ آئی ءَ یک رندے پدا گوشت کہ حکومت بجلی ءِ شوبگ ءَ ڈیٹا گورننس ءُ ڈیٹا بیسڈ پلاننگ ءِ دیمروئی ءِ واستہ جزم اِنت۔