جنگ بندی ءِ تہا پاکستان ءِ کرد مودی ءِ سفارتکاری ءَ را پد منتگی ءِ آماچ کنت، بھارتی اپوزیشن کانگریس ءِ رہشوناں حکومت ءِ سرا ایراد گپتگ

نئی دہلی۔10اپریل  (اے پی پی): بھارتی اپوزیشن گل آں میاں اوستمانی سفارتکاری ءِ تہ ءَ پاکستان ءِ گیش بوھوکیں بستار ءِ ھوالگ ءَ مودی سرکار ءِ دری پالیشی ءِ سر ءَ جُست چست کتگ۔ بی بی سی ءِ رپورٹ ءِ رد ءَ ھندوستان ءِ مستریں اپوزیشن پارٹی کانگریس ءِ سروک راشد علوی ءَ جنگ بندی ءِ سر ءَ وتی پارٹی ءِ رد ءُ بند ءِ درشان کنان ءَ گْوشتگ کہ ھندوستان ءَ ھما کار کنگی اَت کہ پاکستان ءَ کتگ بلے وھدے کہ مزن وزیر مودی اسرائیل ءَ را پِت گْوش اِیت گُڑا آ چوں جنگ بندی ءِ گپ ءَ کنت؟ بھارتی مزن وزیر مودی 28 فروری ءَ بندات بوتگیں امریکہ ءُ اسرائیل ءِ نیمگ ءَ ایران ءِ سر ءَ اُرشاں چہ بس دو روچ پیسر اسرائیل ءِ وتی جنجالی تر ءُ تاب ءَ چہ واتر بوتگ ات۔اے تر ءُ تاب ءِ وھد ءَ آئی ءَ اسرائیل ءَ را ماتیں وطن ءُ بھارت ءَ را ماتیں وطن گُشتگ ات کہ ایشی ءِ ھاتر ءَ بھارتی اپوزیشن ءَ آئی ءِ سر ءَ ایراد گپتگ ات۔ بھارت ءِ مستریں اپوزیشن پارٹی کانگریس ءَ اے درگت ءَ مزن وزیر مودی ءِ سروکی ءِ بابت ءَ جُست چست کتگ۔ کانگریس ءِ رہشون جے رام رمیش ءَ ایکس ءِ سر ءَ وتی بیان ءَ گوشت کہ پاکستان ءِ کرد ءُ جنگ بندی ءَ مودی جی ءِ سفارتکاری ءِ ذاتی طرز ءَ را مزنیں دھکے داتگ۔ آئی ءَ گیش نبشتگ کہ دری کارانی وزیر (جے شنکر) ءَ پاکستان ءَ را ‘دلال’ ءِ بستار ءَ رد کتگ۔ بلے نوں وت واجہیں وشواگرو سرجم ءَ بے ننگ بوتگ، آئی ءِ وت واجہیں 56 انچ ءِ سینہ سک بوتگ۔ زانگ بہ بیت ھندوستان ءَ جنگ بندی ءِ پسو ءِ تہ ءَ آئی ءَ را وش اتک کتگ بلے اے درگت ءَ شنگ بوتگیں سرکاری بیان ءَ نہ پاکستان ءِ نام گپتگ ءُ نہ دگنیا ءِ بازیں ملکانی وڑ ءَ پاکستان ءِ میانجی داری ءِ کوشست ساڑاھگ بوتگ اَنت۔ ہندوستان ءِ وزارت ءِ دری کارانی نیمگ ءَ جاڑی بوتگیں بیان ءِ تہ ءَ گشگ بوتگ کہ ما جنگ بندی ءِ پیسلہ ءَ را وش اتک کن ایں ۔ مارا اُمیت اِنت کہ اے مغربی ایشیا ءَ دائمی امن ءِ برجائی ءَ کمک کنت۔ انچو کہ ما ساری ءَ گشتگ ات کہ انوگیں جنگ ءِ ہلاسی ءِ واستہ جنگ بندی، گپ ءُ تران ءُ سفارتکاری المی انت ۔ بیان ءِ تہ ءَ گیش گْوشگ بیتگ کہ اے کش ءُ چیل ءَ تیل ءُ توان ءِ جھان ءِ سپلائی ءُ تجارتی نظام ءَ را تاوان داتگ۔ مارا اُمیت اِنت کہ تجارتی ءُ تیل ءِ برگ ءِ جہاز نوں آبنائے ہرمز ءَ چہ گوزگ ءِ وس ءَ کن اَنت۔ وھدے کہ برطانیہ ءُ یورپی یونین ءَ ھوار سرجمیں دگنیا ءِ بازیں سروکاں گوستگیں دو روچانی تہ ءَ پاکستان ءِ میانجی داری ءِ کوشست آنی توسیپ کتگ بلے ھندی درئی کارانی وزارت ھم ایران ءُ امریکہ ءِ نیام ءَ اسلام آباد ءَ بوت کنوکیں گپ ءُ تران ءِ سر ءَ بے توار بوتگ ءُ ایشی ءِ سر ءَ ھچ وڑیں سرکاری گپ ءُ تران نہ کتگ۔ یات بہ بیت کہ پیسر ءَ وھدے پاکستان جنگ ءِ وھد ءَ میانجی داری ءِ کوشستاں گوں بندوک ات گڑا ھندی دری کارانی وزیر جے شنکر ءِ اے جنجالی بیان دیم ءَ اتک کہ ’’ھندوستان پاکستان ءِ وڑیں دلال ملک جوڑ بوھگ نہ لوٹیت‘‘۔ بھارتی دری کارانی وزیر ءِ اے بیان ءِ پسو ءَ پاکستان ءِ درئی کارانی وزارت ءَ گوشت کہ اے وڑیں غیر سفارتی بیان گہتریں ناامیتی ءُ زھر ءِ درشان انت۔ پاکستان اے وڑیں بیان ءُ تہمتانی سرا باور نہ کنت۔ مئے رھبند ءِ بُن ھشت ءِ سر ءَ تحمل ، شرپ ءُ شرپ اِنت ، نہ کہ ایوک ءَ بیانیہ ءِ سر ءَ ۔ پاکستان ءِ وفاقی وزیر دیمپانی خواجہ آصف ءَ گشتگ ات کہ جے شنکر ءِ بیان آئی ءِ ذاتی ناامیتی ءِ درشان انت۔