امریکہ و ایران اٹی جنگ بندی، جہانی برادری نا خیر مقدم، آخبتی امن نا عمل آ زور

اقوام متحدہ۔ 08اپریل (اے پی پی(جہانی برادری امریکہ و ایران نا نیام اٹ جنگ بندی نا ستاءِ کرسا اونا خیر مقدم ءِ کرینے ۔ الجزیرہ نا حوال نا رداٹ امریکہ و ایران نا نیام اٹ اِرا ہفتہ نا جنگ بندی آ مچ آ دنیا نا ملک آک و ادارہ غاک خوشی نا درشانی ءِ کرینو۔سویلی کوریا جنگ بندی نا خیرمقدم ءِ کرسا پارے کہ او خواہک کہ آبنائے ہرمزنا کمک اٹ غٹ جہاز بشمول تینا واپاری جہاز رکھ گدرینگ انگ کیر و مذاکرات سرسہبی اٹ پورو مرسا دے ٹک نیامی ٹی امن و سوگوی بحال مرے ۔اقوام متحدہ نا سیکرٹری جنرل انتونیو گوتریش جنگ بندی نا ستاء ءِ کرسا غٹ فریق آتیان خواست کرے کہ او جہانی کانود آتا رداٹ عمل کیر و ڈیہہ اٹی پائیدار امن نا جوڑ کننگ کن کمک کیر۔ آسٹریلیا خبڑدار کرے کہ اگہ جنگ برجا سلیس تو جہانی زرگزران و انسانی نسخان اٹی ودکی مریک ۔ وزیراعظم انتھونی البانیز شاری تا رکھ و جہانی انسانی کانود آتا شرف آ ہم زور شاغا۔ہنداوڑ نیوزی لینڈ نا وزیر خارجہ ونسٹن پیٹرز ہم جنگ بندی نا خیر مقدم ءِ کرسا پارے کہ پائیدار امن کن داسکان اہم گام گیج سلوک ءِ ، او تینا ملک نا کنڈآن امن نا عمل نا مخ تفی ءِ برجا تخنگ نا پڑو کرے۔ جاپان پارے کہ تنکی ءِ کم کننگ کن عملی گام گیج المی ءِ ، خاص وڑ اٹ آبنائے ہرمز اٹی جہاز رانی نا رکھ ءِ پک کننگ۔عراق جنگ بندی ءِ گچین ءُ گام اس گوندسا امریکہ و ایران نا نیام اٹ سنجیدہ و پائیدار مذاکرات نا گرج آ زور شاغا۔ مصر انا وزارت خارجہ امریکہ و ایران نا نیام اٹ اِراہفتہ نا جنگ بندی ءِ اسہ بھلو موقع اس گوندانے ۔وزارت پارے کہ دا موقع مذاکرات، سفارتکاری و تعمیری گپ وتران کن بایدے کاریم اٹ اتنگے تانکہ ڈیہہ اٹی پائیدار امن نا گمانک ودنگ کیر۔ ملائشیا نا وزارت خارجہ پارے کہ دا دے ٹک نیامی ٹی بے چیٹی ءِ کم کننگ و المی امن و سوگوی ءِ بحال کننگ نا کنڈآ اہم ءُ گام اسے۔ وزارت فریق آتیان خواست کرے کہ او جنگ بندی نا غٹ شڑت آتا شرف و نفاذ ءِ کیر تانکہ بے چیٹی دُوارہ ودپ۔ اشتعال انگیز کارروائی یا اسہ کنڈی گام آن پاناد کیر ہرا ڈیہہ انا نازرک سوگوی یا جہانی اقتصادی و توانائی نا سیکورٹی ءِ نسخان تننگ کیک۔