تربت یونیورسٹی ءِ وی سی ءِ گورنر بلوچستان ءَ گوں گند ءُ نند کتگ، نوکیں ہنر ءِ دیمروئی ءِ سرا دلگوشی دیوکیں کورسز ءِ بندات کنگ ءِ پنت ءُ شون  کتگ

کوئٹہ۔ 26 مارچ (اے پی پی): تربت یونیورسٹی ءِ وائس چانسلر پروفیسر ڈاکٹر گل حسن ءَ بلوچستان ءِ گورنر جعفر خان مندوخیل ءَ گوں گند ءُ نند کت ایشی ءِ ساھت ءَ گورنر ءَ آئی ءَ را پنت ءُ شون  کت کہ آ شارٹ کورسز ءِ بندات ءَ بہ کنت کہ ایشی ءِ تہ ءَ نوکیں مہارت ءِ دیمروئی ءِ سر ءَ دلگوشی دیگ بہ بیت۔ اے موہ ءِ سر ءَ گورنر ءَ گوشت کہ گورنر ءِ بستار ءَ من گوستگیں دو سال آنی تہ ءَ مکران ڈویژن ءِ سئیں یونیورسٹی آنی تہ ءَ بازیں رند ءَ تر ءُ تاب کتگ، کانووکیشن آنی تہ ءَ بھر زوری کتگ ءُ تربت یونیورسٹی ءِ جتا جتائیں سینیٹ دیوان آنی سروکی ھم کتگ، ایشی ءِ آسر ءَ مئے شعوری کوشست ءُ سکیں نگرانی ءَ جوانیں آسراتی ءِ بندات کتگ۔ اے یک وشیں ساھتے کہ تربت یونیورسٹی ءِ درجہ بندی چہ 69% ءَ 87% ءَ سر بوتگ۔ آئی ءَ گوشت کہ وائس چانسلر پروفیسر ڈاکٹر گل حسن ءُ آئی ءِ سرجمیں ٹیم ءَ را یونیورسٹی ءِ سرجمیں سسٹم ءَ را ڈیجیٹل کنگ ءُ روایتی بجلی ءِ نظام ءَ را شمسی توان ءِ نیمگ ءَ شِفٹ کنگ ءِ واستہ ستا ءِ مستحق انت۔ گورنر ءَ وائس چانسلر ءَ را پنت ءُ شون  کت کہ آ نوکیں مارکیٹ ءِ لوٹ آنی رد ءَ مہارت ءِ دیمروئی ءِ سر ءَ دلگوشی دیوکیں شارٹ کورس آنی بندات ءَ بہ کنت۔ آئی ءَ گوشت کہ تربت ءِ بنجاہی معیشت ءِ تہ ءَ خرما ءِ پیداوار ءِ کلیدی کرد ءِ رد ءَ خرما ءِ نوکیں وڑ ءُ پیم ءِ دیم ءَ آرگ ءُ جھان ءِ معیار ءِ رد ءَ پیکیجنگ ءِ وانینگ ءِ حکمت عملی ھم جوڑ کنگ بہ بیت۔ گورنر ءَ گوشت کہ صوبگ ءَ ہائیر ایجوکیشن ءِ دیمروئی ءَ را اولی روچ ءَ چہ اولیت دیگ بوتگ ءُ اے ھم وشیں گپ اِنت کہ مئے دیمروئی کنوکیں ورنا وتی استاد ءُ وانگ ءُ زانگ ءِ ادارگ آنی واستہ سک باز احترام کن اَنت۔ آئی ءَ گوشت کہ وائس چانسلر ءِ عہدہ یک شرپ ءِ ھوار مزنیں ذمہ واری یے، پمیشکا المی اِنت کہ آ وتی عہدہ ءُ یونیورسٹی ءِ تہ ءَ استیں درستیں وسیلگ آناں وتی ہائیر ایجوکیشنل ادارگ ءُ ایشی ءِ کش ءُ گور ءِ دمگ آنی جوانیں مفاد ءِ واستہ کارمرد بہ کنت۔ اے مئے درستانی واستہ فخر ءُ وشی ءِ گپ انت کہ تربت یونیورسٹی ءَ زالبولیں نودربر آنی کساس درستاں چہ گیش انت۔ آئی ءَ گوشت کہ یونیورسٹی ءِ کارکردگی ءَ را گیش گہتر کنگ ءِ واستہ ٹیم ورک ءِ سک باز ضلورت اِنت۔