پاکستان ءَ اقوام متحدہ ءَ سوڈان ءَ زوراکی ءِ ذمہ وارانی کیاسگری  کنگ ءِ لوٹ کتگ

اقوام متحدہ۔20فروری  (اے پی پی): پاکستان ءَ اے گپ ءِ سر ءَ زور پر دات کہ سوڈان ءَ برجاھیں ھونیگیں جیڈھ وتی سیمی سال ءَ ھوار اِنت کہ جیڈھ ءِ تہ ءَ یکیں زندگ داروکیں گیواری بامردیں گپ ءُ تران ءُ سیاسی عمل ءِ برجای اِنت۔ اقوام متحدہ ءِ سلامتی کونسل ءِ دیوان ءَ گوں گشتانک دیان ءَ پاکستان ءِ نائب مستقل نمائندہ عثمان جادون ءَ گشتگ کہ جیڈھ ءِ ہچ وڑیں فوجی گیواری نیست انت۔ آئی ءَ امن منصوبگ ءُ ادارُکی سوڈان ءِ حکومت ءِ نیمگ ءَ پیش کتگیں کوشست آناں وتی حمایت ءِ پدرائی کت۔ آئی ءَ گوشت کہ سوڈان ءِ اُلس ءَ را بازیں وھد ءَ چہ سکیں مشکلات ءِ آماچ بوتگ ءُ نوں یک شرپ مندیں سیاسی کشک  ءِ برجا کنگ ءِ وھد اِنت۔ پاکستانی نمائندہ ءَ دارفور ءَ ریپڈ سپورٹ فورسز ءِ نیمگ ءَ کتگیں ظلم ءُ زوراکی ءُ ھاسیں رنگ ءَ الفاشر ءُ الجنیہ ءِ وئیل آنی سر ءَ سک باز مذمت کتگ۔ آئی ءَ امن ءِ رھشون، اقوام متحدہ ءِ کارندہ ءُ انسانی کمک ءِ کارندہ آنی سر ءَ اُرش نا منّگ لیک اِتگ ءُ گوشت کہ اے وڑیں کارروائی جنگی جرم آنی برابر بوت کنت ءُ ذمہ وار آنی کیاسگری المی اِنت۔ پاکستان ءَ اقوام متحدہ ءِ منشور ءِ اصول آنی رد ءَ سوڈان ءِ حاکمیت، یکوئی ءُ سرزمین ءِ یکوئی ءِ واستہ وتی سرجمیں کمک ءِ یک رندے پدا گوشت۔ پاکستانی نمائندہ ءَ گوشت کہ یکجاھیں سوڈان نہ ایوک ءَ وتی اُلس ءِ واستہ بلکینگ ءَ سینگ افریقہ، ساحل ءُ بحیرہ احمر ءِ دمگ ءِ امن ءُ ایمنی ءِ واستہ ھم ناگزیر اِنت۔ آئی ءَ توامیں فریق آنی سر ءَ زور پر دات کہ آ لچک ءُ زانت ءِ درشان ءَ بہ کن اَنت ءُ پائیدار ءُ پرامن آبادی ءِ نیمگ ءَ گامگیج بہ کن اَنت۔ پاکستانی نمائندہ ءَ انسانی جاور ھال آناں ھترناکیں رنگ ءَ پیش کنان ءَ آماچیں دمگ آنی تہ ءَ ایمن ءُ بے رکاوٹیں رسائی ءَ را دل یکیمی کنگ ءِ لوٹ کتگ ءُ میاں اوستمانی براتی ءَ را انسانی کمک ءِ واستہ فنڈز ءَ را ترندیں رنگ ءَ گیش کنگ ءِ لوٹ کتگ۔