بورڈ آف پیس انا اولیکو دیوان اٹی 20 ملک آتا ڈل آتا شرکت، غزہ ناپوسکن تفنگ کن ارب آ ڈالر، سٹیبلائزیشن فورس انا بابت ڈٹ آتا پڑو گمانی

واشنگٹن۔ 13 فروری (اے پی پی) بورڈآف پیس انا اولیکو دیوان 19 فروری آ امریکی دارالحکومت واشنگٹن اٹی مریک   ہراٹی کم آن کم 20 ملک آتا ڈل آتا بشخ ہلنگ نا گمان ءِ، دیوان اٹی امریکی صدر ڈونلڈ ٹرمپ غزہ کن فنڈنگ و فوجی دستہ غاتا تعیناتی نا پڑو ءِ کیک۔ رائٹرز نا رپورٹ نا رداٹ امریکی حکومت نا اِرا سینئر عہدیدار آک پارینو کہ امریکی صدر ڈونلڈ ٹرمپ بروک آ ہفتہ مروک آ غزہ بورڈآف پیس نا اولیکو باضابطہ دیوان اٹی غزہ نا پوسکن تفنگ کن ارب آ ڈالر و سٹیبلائیزیشن فورس انا بابت ڈٹ آتا پڑو ءِ کیک۔ امریکی عہدیدارآک پن ءِ پاش کپننگ نا شڑت آ پاریر کہ 19 فروری آ واشنگٹن ڈی سی ٹی مروک آ دیوان نا کماشی ءِ امریکی صدر ڈونلڈ ٹرمپ کیک۔ صدر ٹرمپ 23 جنوری آ سوئٹزرلینڈ انا شار ڈیووس اٹی بورڈ آف پیس نا دستاویز آتیا دستخط کریسس ہرافتے پک اقوام متحدہ نا سیکورٹی کونسل اٹی اسہ قرارداد اسے نا کمک اٹ کننگاسس۔ دے ٹک نیامی نا ملک سعودی عرب، مصر، ترکی و قطر آن بیدس انڈونیشیاہم ڈٹ آتیٹی شمولیت اختیارکرینے۔ امریکی کمامدارآتا رداٹ دیوان اٹی بیرہ غزہ نا بابت باندات آتیا چکارکننگک۔ صدر ٹرمپ غزہ کن ارب آ ڈالر نا پڑو کیک و اوفتے ٹی بورڈ اٹی اوار باسک آتا کنڈآن مالیاتی عطیہ ہم اوارمریک۔ غزہ ٹی انٹرنیشنل سیٹلائزیشن فورس انا تعیناتی صدر ٹرمپ نا غزہ پلان نا بروک آ ریسہ ٹی اوار ءِ ہرانا پڑو ءِ تدوک آ سال ستمبر اٹی کننگاسس۔ معاہدہ نا اولیکو ریسہ نا رداٹ 10 اکتوبر آ غزہ ٹی جنگ بندی بناکرے و حماس یرغمالی تے یلہ کریسس ہرانا بدلہ ٹی اسرائیل دزگیر کروک آ فلسطینی تے یلہ کرے۔