کمبوڈیا ءِ وزیر تجارت چم نیمول ءَ گوں ڈل ءَ وفاقی وزیر تجارت جام کمال خان، مزن وزیر ءِ کوآرڈینیٹر رانا احسان افضل ءُ صدر ایف پی سی سی آئی ءَ گوں گند ءُ نند

اسلام آباد۔9فروری (اے پی پی): کمبوڈیا ءِ وزیر تجارت چم نیمول ءَ پاکستان ءِ سرکاری تر ءُ تاب ءَ انت آئی ءَ یک ڈل ءِ گوما ایف پی سی سی آئی ءِ صدر ءِ کارگس ءِ تر ءُ تاب کتگ۔ آئی ءَ وفاقی وزیر تجارت جام کمال خان، ایف پی سی سی آئی ءِ صدر عاطف اکرام شیخ ءُ مزن وزیر ءِ تجارت ءِ کوآرڈینیٹر رانا احسان افضل ءَ گوں گند ءُ نند کت۔ گند ءُ نند ءَ ایف پی سی سی آئی ءِ نائب صدر طارق جادون، چیئرمین کیپیٹل آفس کریم عزیز ملک، چیئرمین کوآرڈینیشن ملک سہیل حسین، سینئر بزنس لیڈر احمد چنوئی ءُ ایندگر بزنس لیڈراں بہر زرتگ۔ گند ءُ نند ءَ پاکستان ءُ کمبوڈیا ءِ نیام ءَ جتا جتائیں شوبگ آنی تہ ءَ دو نیمگی اقتصادی ءُ تجارتی کمک ءَ را دیمروئی دیگ ءِ امکانات آنی سر ءَ سرجمی ءَ گپ ءُ تران کنگ بوت۔ وفاقی وزیر برائے تجارت جام کمال خان ءَ گوشت کہ لھتیں سال پیسر ملک ءِ معیشت ءَ را سکیں جیڈھ آنی دیم ءَ ات، مہنگائی 38درسد ءَ چہ گیش بوتگ ءُ سود ءِ شرح 22درسد ءَ سر بوتگ۔ مزن وزیر شہباز شریف ءِ ذاتی دلچسپی ءُ برجاھیں کوشست آنی آسر ءَ معیشت استحکام ءَ پد دیمروئی ءِ کشک ءَ بوتگ۔ آئی ءِ رد ءَ معیشت ءِ درستیں اشارہ جوان اَنت ءُ میاں اوستمانی گل ھم اے گپ ءَ منگ ءَ اَنت۔ آئی ءَ دوئیں ملک آنی کاروباری کمیونٹی آناں نزیک کنگ ءُ بی ٹو بی سیادی آناں دیمروئی دیگ ءِ واستہ حکومت ءِ عزم ءِ سر ءَ زور پر دات۔ مزن وزیر ءِ کوآرڈینیٹر برائے کامرس رانا احسان افضل ءَ کمبوڈیا ءِ وزیر کامرس ءِ پاکستان ءَ آیگ ءِ سر ءَ وش آتک کنان ءَ گوشت کہ مسلم لیگ ن ءِ سرکار ءَ معیشت ءَ را استحکام ءِ راہ ءَ ایر کتگ۔ آئی ءَ گوشت کہ مزن وزیر شہباز شریف ءِ وژن ءِ سبب ءَ مرچی پاکستان ءِ معیشت دیمروئی ءِ نیمگ ءَ روگ ءَ انت، زرّ ءِ ذخیرہ 20 ارب ڈالر ءَ چہ گیش بوتگ ءُ سود ءِ شرح ءَ مزنیں کساسے ءَ کمی بوتگ۔ آئی ءِ رد ءَ پیداوار ءِ ھرچ ءُ درچ ءَ را کم کنگ، سرمایہ کار آناں آسراتی دیگ ءُ برآمدات ءَ را گیش کنگ حکومت ءِ اولی ترجی آنی تہ ءَ ھوار اَنت۔ کمبوڈیا ءِ وزیر تجارت چم نیمول ءَ گوشت کہ پاکستان ءَ چہ کمبوڈیا ءِ درآمد آنی مزنیں بھرے دوا ءُ درمان آنی تہ ءَ ھوار اِنت بلے آ دگہ شوبگ آنی تہ ءَ دو نیمگی تجارت ءِ کساس ءَ را گیش کنگ ءِ واستہ ھم دلگوش اَنت۔ آئی ءَ گوشت کہ کمبوڈیا ءِ حکومت درملکی سرمایہ کار آناں ٹیکس فری ءُ منافع بخش سرمایہ کاری ءِ آسراتی پھجاری کنگ ءَ انت ءُ پاکستانی سرمایہ کار کمبوڈیا ءَ استیں موہ آں چہ پائدگ چست بہ کن انت۔ آئی ءَ اے ھم جار جتگ کہ پاکستان ءُ کمبوڈیا ءِ نیام ءَ جتا جتائیں شوبگ آنی تہ ءَ کمک ءِ معاہدہ آنی سر ءَ دستخط کنگ بیت۔ اے موہ ءِ سر ءَ تران کنان ءَ ایف پی سی سی آئی ءِ صدر عاطف اکرام شیخ ءَ گوشت کہ پاکستان ءِ حکومت ءَ ملک ءِ اقتصادی دیمروئی ءِ واستہ دراجیں مدت ءِ گامگیج کتگ ایشی ءَ چہ جوانیں آسراتی رسگ ءَ انت۔ آئی ءَ گوشت کہ گوستگیں وھد ءَ پاکستان ءَ ھاسیں میاں اوستمانی کانفرنس آنی برجم دارگ ءُ دگنیا ءِ سروک آنی تر ءُ تاب حکومت ءِ ویژن ءِ درشان انت۔ آئی ءَ گوشت کہ کمبوڈیا ءِ وزیر تجارت ءِ پاکستان ءِ تر ءُ تاب دوئیں ملک آنی نیام ءَ سیادی آنی نوکیں باب ءِ بندات بیت۔ عاطف اکرام شیخ ءَ آئی ٹی، ٹیکسٹائل، فارماسیوٹیکل ءُ ایندگر شوبگ آنی تہ ءَ کمک ءِ مزنیں گنجائش ءِ سر ءَ زور پر دات ءُ کاروباری کمیونٹی آنی نیام ءَ بی ٹو بی رابطہ آناں دیمروئی دیگ ءِ جزم ءِ درشان کت۔ چیئرمین کوآرڈینیشن ایف پی سی سی آئی ملک سہیل حسین ءَ گوشت کہ آئی ٹی ءَ ھوار جتا جتائیں شوبگ آنی تہ ءَ پاکستان ءُ کمبوڈیا ءِ نیام ءَ کمک ءِ واستہ مزنیں امکانات است انت ءُ دوئیں ملک آنی کاروباری براتی اے موہ آناں سرجمی ءَ پائدگ چست بہ کن انت۔