پیرس۔ 15جولائی (اے پی پی) فرانس نا سویلی ساحلی شار نیس اٹی اسہ بندغ اس تیناٹرک ئِ قومی دے انا دود اٹی شریک بندغ آتیا لگفے ہراٹی نیاڑی و چناتے تو ن اوار 84بندغ تپاخت کریر۔ فرانسیسی صدر فرانسوااولاند واقعہ ئِ بظاہر دہشت گردی نا کارروائی اس گوندسا پارے کہ اونا ملک عراق و شام اٹی دہشت گرد آتا برخلاف کارروائی تے ترند کیک۔ اوجمعہ نا سہب انا وختی قوم آن تران اٹی ملک اٹی مست آن نافذ ہڑدڑی حالیت آتے ٹی پین مسہ تو انا ودیکی نا ہم پڑوئِ کرے۔ اوحالیت آتیا غور کن تعلقداروزیر آتا خصوصی دیوان ئِ بٹنگا۔ واقعہ آن گڈ کیہی علاقہ غاتے ٹی پولیس نا گشت ئِ ودفنگا و پولیس نا مدد کن ریزر و فوجی تے بٹنگ انگانے۔ فرانسیسی پولیس نا رداٹ دا واقعہ ہندی وخت انا رداٹ پنچ شنبے نا نن 10بجہ ئُ 40منٹ آ پیش بس ہرا تم تیونس نژاد فرانسیسی بندغ ہراٹرک ئِ چلیفیکہ ، تینا ٹرک ئِ ترندی اٹ چلیفسا قومی دے انا وخت آ آتش بازی نا مچی ئِ ہُننگ کن مچ بندغ آتیا لگفے۔ پولیس نارداٹ ٹرک ڈیور دا وخت آ سم کاری ہم کرے و اوکان گڈ پولیس نا سم کاری نا نتیجہ ٹی خلنگا۔ امریکی فوجی کمامدارآتارداٹ ٹرک آن سلہہ و گولہ بارود ہم دوئی مسنے واہم فانسیسی کمامدار آتا پاننگ ئِ کہ 19ٹن وزنی ٹرک آن دوئی مروک آرائفل آک نقلی ئُ ئسر ۔ فرانسیسی کمامدار آتارداٹ واقعہ ٹی پین کیہی بندغ آک ٹھپی مسر ہرافتے آن ہژدہ نا حالیت نازرک ئِ۔ واقعہ آن گڈ مخلوق دانگ اینگ نرا و خلقت آتے ٹی خوف و خلیس اس تالان مس۔ عینی شاہدی نا رداٹ ٹرک نا مچی آ لگنگ آن گڈ ہر کنڈ ا چیہانٹ و کوک اس تما۔ جتا گڑاتا ٹکر آک بال کرسا خننگارہ و ہر کنڈ لاش آک تموک ئسر۔ امریکی صدر براک اوباما ، و اقوام متحدہ نا سلامتی کونسل داوقعہ نا ترندی اٹ مذمت ئِ کرینو۔ امریکی صدر فرانس ئِ داوخت آ ہر وڑنا کمک و مددنا ہم پیش کش کرینے۔ واقعہ نا زمہ واری ئِ دمدستی وڑاٹ ہچ گہس امنا کتہ نے۔ امریکہ نا ریپبلکن پارٹی نا صدارتی اومیت دار ڈونلڈ ٹرمپ نائب صدر نا عہدہ کن تینا سنگت اومیت دار نا پن انا پڑو ئِ داواقعہ غان گڈ ملتوی کرے۔ امریکی وزیر خارجہ جان کیری نیس اٹی ساڑی امریکی شاری تے خڑک انا امریکی سفارت خانہ غاتون رابطہ نا پارت کرینے۔
