پاکستان ءَ آسٹریلیا ءِ بونڈی بیچ ءِ اُرش ءَ گوں ھمگرنچ کنگ افسوسناکیں ءُ غیر ذمہ دارانہ اِنت، ردیں رپورٹنگ ءِ سبب ءَ ھندی میڈیا ءِ ساکھ ءَ را سک باز تاوان رستگ، درئی کارانی کارگس ءِ جارکش طاہر حسین آندرابی ءِ پریس بریفنگ

اسلام آباد۔18دسمبر  (اے پی پی):درئی کارانی کارگس ءِ جارکش طاہر حسین آندرابی ءَ گوشت کہ پاکستان ءَ آسٹریلیا ءِ بونڈی بیچ ءِ اُرش ءَ گوں ھمگرنچ کنگ افسوس ءُ غیر ذمہ دارانہ اِنت، پاکستان ھرچ ​​وڑیں ناشرکاری ءَ را ھاسیں رنگ ءَ مذمت کنت، اوگانستان ءَ ناشرکاری ءِ عناصر آنی ھست بوھگ ءِ معتبر ءُ مھکمیں شواہد است اَنت ءُ ناشرکار آفافین ءِ سر ءَ کمک کنگ ءَ اَنت۔ پنچ شمبے ءِ روچ ءَ ادا پریس بریفنگ ءِ تہ ءَ آئی ءَ گوشت کہ ھندی رسانکدر ءَ اے وئیل ءِ سر ءَ ردیں ھال ءُ اھوال ءُ پروپیگنڈا شنگ کتگ بلے پد ءَ اُرش کنوک ھندی نسل ءِ ءُ ھندی پاسپورٹ ءِ واھند زانگ بوتگ۔ جارکش ءَ گوشت کہ رسانکدر ءَ پاکستانی ءِ نام ءُ اکس بے تصدیق ءَ پیش دارگ بوتگ، ردیں رپورٹنگ ءِ سبب ءَ بے گناھیں مردم ءُ آئی ءِ کھول ءَ را ھترہ ءِ تہ ءَ آرگ بوتگ۔ درئی کارانی کارگس ءِ جارکش ءَ گوشت کہ اے ھوالگ ءَ ردیں رپورٹنگ ءِ سبب ءَ ھندی رسانکدر ءِ ساکھ ءَ را سک باز تاوان رستگ، ھندی رسانکدر ءَ را زمہ وار ءُ پیشہ وارانہ رویہ ءِ زورگ لوٹ ایت۔ ترجمان ءَ مزن وزیر محمد شہباز شریف ءُ روس ءِ صدر ولادیمیر پوٹن ءِ گند ءُ نند ءِ بابت ءَ بھارتی رسانکدر ءِ بے بنیں پروپیگنڈا ھم رد کتگ ءُ گوشت کہ اے گند ءُ نند سک باز پائدگ مند ءُ جوانیں بوتگ۔ یک جُستے ءِ پسو ءَ آئی ءَ گوشت کہ بھارت ءِ واستہ پاکستان ءِ ھوائی دمگ ءِ بند کنگ دوئیں ملک آنی نیام ءَ سیادی ءِ درشان اِنت ءُ پاکستان ءِ ھلاپ ءَ ھترہ ءُ پاکستان ءِ ھلاپ ءَ دگہ زوراکی ءِ لہر ءِ بابت ءَ بھارتی مزنیں سروکی ءِ بیان آنی سبب ءَ ھوائی دمگ بند کنگ بوتگ۔ اوگانستان ءِ ھوالگ ءَ اقوام متحدہ ءِ سلامتی کونسل ءِ رپوٹ ءِ ھوالگ ءَ جارکش ءَ گوشت کہ دستاویز ءَ پاکستان ءِ اے لیکہ ءِ تصدیق کتگ کہ اوگانستان ءَ ناشرکاریں عناصر آنی ھست بوھگ دمگ ءِ امن ءُ ایمنی ءِ واستہ مزنیں ھترہ اِنت۔ آئی ءَ گوشت کہ رپوٹ ءَ پاکستان ءِ اے موقف ءِ ھم تصدیق کنگ بوتگ کہ پاکستان ءُ اوگانستان ءِ نیام ءَ دو نیمگی سیادی آنی دیمروئی ءِ تہ ءَ مزنیں رکاوٹ ناشرکاریں عناصر آنی ھست بوھگ ءِ سبب ءَ جنگ بندی ءِ ھلاپ ورزی، سیم سر بند کنگ ءُتجارتی چست ءُ ایر آنی تہ ءَ رکاوٹ انت۔ دگہ جُستے ءِ پسو ءَ آئی ءَ گوشت کہ پاک اوگان جنگ بندی ءِ مول ءُ مراد اوگانستان ءَ چہ پاکستان ءَ ناشرکاری اُرش آنی گر ءُ دار کنگ بوتگ۔ اوگان نیمگ ءِ برجاھیں اُرشانی سبب ءَ جنگ بندی برجم نہ بوتگ ۔ آئی ءَ گوشت کہ اوگانستان ءَ انسانی کمک ءِ سر کنگ ءِ تہ ءَ دوائی آنی ھواریں کمک آنی سر ءَ ھچ وڑیں رکاوٹ نیست، انوگیں وھد ءَ اے کھیپ ءِ اجازت دیگ بوتگ ءُ ایشی ءِ منگ طالبان سرکار ءِ سر ءَ انت۔ آئی ءَ گوشت کہ اوگانستان ءَ ناشرکاریں عناصر آنی ھست بوھگ ءِ مھکمیں شواہد است انت، اوگان سرزمین ءِ سر ءَ ناشرکار آناں کمک رسگ ءِ معتبریں شواہد ھم است انت۔ ترجمان ءَ مزن وزیر محمد شہباز شریف ءِ گوستگیں ترکمانستان ءِ تر ءُ تاب ءِ ذکر کتگ ءُ گشتگ کہ آئی ءَ امن ءُ اعتماد سازی ءِ گامگیج آنی ھوالگ ءَ میاں اوستمانی کانفرنس ءَ بہر زرتگ ءُ ترکمانستان، ترکی، روس ءُ ایران ءِ سروک آنی گوما گند ءُ نند کتگ۔ آئی ءَ گوشت کہ تر ءُ تاب ءِ ساھت ءَ نائب مزن وزیر محمد اسحاق دار ءَ ایران، کرغزستان، عمان، ترکی، تاجکستان، ءُ ازبکستان ءِ ھمکار آنی گوما گند ءُ نند کتگ ءُ ھمے رنگ ءَ اقتصادی کمک ءِ گل ءِ سیکرٹری جنرل ءَ گوں گند ءُ نند کتگ۔