امریکہ ءَ پاک فضائیہ ءِ ایف 16 بیڑے ءِ واستہ 686 ملین ڈالر ءِ اپ گریڈ پیکج ءِ منظوری

واشنگٹن۔11دسمبر (اے پی پی): امریکہ ءَ پاک فضائیہ ءِ ایف 16 بیڑے ءِ واستہ 686 ملین ڈالر ءِ اپ گریڈ پیکج ءِ منظوری داتگ۔ اے گپ امریکی دفاعی سلامتی کمک ادارگ ءِ نیمگ ءَ 8دسمبر ءَ کانگریس ءَ را دیم داتگیں نمدی ءِ تہ ءَ پدر کنگ بوتگ۔ڈی ایس سی اے ءِ نوٹیفکیشن ءَ پد 30 روچ ءِ پارلیمانی چار ءُ تپاسی ءِ وھد سرکاری رنگ ءَ بندات بوتگ، ایشی ءِ تہ ءَ امریکی قانون ساز پاکستان ءَ را ایف 16 ٹیکنالوجی ءِ پجارینگ ءِ سر ءَ بحث کن اَنت۔ ایجنسی ءِ رد ءَ اے پیش کرتگیں بہا کنگ ءَ چہ امریکی دری پالیشی ءُ راجی سلامتی ءِ مول ءُ مراد آناں دیم ءَ برگ بیت پرچا کہ ایشی ءَ چہ پاکستان ءَ را ناشرکاری ءِ ھلاپ ءَ برجاھیں کارروائی ءُ آیوکیں وھد ءِ بوت کنوکیں کارروائی آنی واستہ امریکی ءُ اتحادی اُرد آنی گوما یکوئی ءَ را برجم دارگ ءَ کمک رسیت۔ اپ گریڈ پیکج ءِ تہا لنک.16 سسٹم، چیر کائی ءِ سامان، ایویونکس ءِ اپ ڈیٹ، ھیل کاری ءُ ٹوھیں رسد ءِ کمک ھوار انت۔ اے دیمروئی پاکستان ءِ سول ءُ فوجی سروکی ءِ نیام ءَ امریکی صدر ءِ گوما دلپھکی ءِ گند ءُ نند ءَ پد بوتگ۔ ڈی ایس سی اے ءِ نمدی ءَ گوشت کہ اے بہا کنگ ءَ چہ پاکستان ءِ وتی بلاک 52 ءُ میان اُستمانی اپ گریڈ ایف 16 بیڑے ءِ نوکیں رنگ ءُ مرمت ءِ وسیلگ ءَ انوگیں ءُ آیوکیں ھترہ آناں گر ءُ دار کنگ ءِ توانائی ءَ را برجائی ءُ مھکم کنگ بیت۔ نمدی ءِ تہ ءَ گوشت کہ اے نوکیں اپ گریڈ آنی وسیلگ ءَ پی اے ایف ءُ امریکی ایئر فورس ءِ نیام ءَ جنگی آپریشن، مشق ءُ ھیل کاری آنی تہ ءَ گیش موثر یکجاھی ءُ یکے دومی ءَ گوں کار کنگ ءِ وسیلگ جوڑ بیت ءُ بالی گراب ءِ عمر ءَ را 2040ءَ تاں گیش کنگ بیت ءُ ھمے وھد ءَ سیفٹی ءِ ھاسیں جیڈھ آناں ھم گیش ءُ گیوار کنگ بیت۔