اوغانستان اٹی انسانی تنکی ٹی شدت نا سوب زالبول و مسن تا حق پدریسہ لتاڑنگ انگ ءِ، اقوام متحدہ

اقوام متحدہ۔ 11د سمبر (اے پی پی) اوغانستان کن اقوام متحدہ نا نائب خصوصی نمائندہ جارجٹ گیگنن خبڑدار کرے کہ اوغانستان اٹی انسانی تنکی ٹی شدت نا سوب  زالبول و مسن تا حق ءِ پدریسہ لتاڑنگ انگ ءِ۔ جارجٹ گیگنن سلامتی  کونسل ءِ پارے کہ دُن تو اوغانستان اٹی جم وڑاٹ سیکورٹی حالیت بظاہر پرسُکون ءِ ولے پاکستان تون سیمی بے چیٹی  وعسکری سرجزآتا سوب جلہو مسنے۔ اوزور شاغا کہ اوغانستان نا عبوری کمامدار آک جہانی برادری تون تین پہ تینی رابطہ غاتا وارخواہی تے پدریسہ گوجالنگ و مسترد کننگ ءُ۔ اوپارے کہ اوغانستان اٹی زالبول و مسن تے تعلیم اسکان رسینگ دوئی اف ہراڑآن ملک انا آخبت ناڈاکٹرز، استاد و راہشون تا کاختی ودی مننگ ءِ۔ اوپارے کہ اوغانستان اٹی میڈیانا آجوئی ہم بھاز کچ اٹ مسنے وخت اس کہ نجی زند اٹی ہم حکومتی کانود نا رداٹ پدریسہ نیام تمنگ انگ ءِ۔ اوخبڑدار کرے کہ اوغانستان اٹی زالبول آتا بشخ ہلنگ آن بیدس گچین ءُ انسانی امداد اس ممکن اف۔ جارجٹ گیگنن پارے کہ انسانی حق اختیاری اف بلکن ہڑدے ئی زند انا بنداوی گرج آک ءُ۔ اوغانستان کن زالبول و مسن تے تعلیم، کاریم و پورو شریداری نا وارخواہی فراوان کننگ بحالی کن المی ءِ۔