بلوچستان اٹی اسہ وڑ فورس انا اطلاق امن و ایمنی کن مزل نا نشان مریک، وزیراعلیٰ بلوچستان میر سرفراز بگٹی

کوئٹہ ۔ 14 نومبر (اے پی پی) وزیراعلیٰ بلوچستان میر سرفراز بگٹی نا کماشی ٹی لیویز فورس انا پولیس اٹی انضمام نا بابت انتظامی و تیکنیکی امور آ اسہ اہم ءُ جاچ دیوان اس جمعہ نادے آ داڑے چیف منسٹر سیکرٹریٹ اٹی اڈ ہلک ۔ دیوان اٹی چیف سیکرٹری بلوچستان شکیل قادر خان ایڈیشنل چیف سیکرٹری داخلہ حمزہ شفقات آئی جی پولیس محمد طاہر خان ڈی جی لیویز عبدالغفار مگسی تون اوار لیویز فورس انا رسالدار میجر و ایلو تعلقدار کمامدارآک بشخ ہلکر۔ دیوان اٹی لیویز آن پولیس اٹی ضم مروک آ آفیسر و کارندہ غاتے مون تروک ویل آتا سرجمی اٹ جاچ ءِ ہلنگا و اوفتا ایسری کن چندی انتظامی سلاہ پیش کننگا۔ وزیراعلیٰ پارت کرے کہ لیویز فورس انا رسالدار میجر ءِ ون اسٹیپ اپ شونداری تننگ تون اوار غٹ کیٹیگری نا آفیسر آتا شونداری، ٹرانسفر و سینیارٹی نا بابت سلاہ تے زوت گڈیکو دروشم اس تننگے تانکہ انضمام نا عمل گچین و باوقار وڑاٹ مون آ ہِننگ کے ، دیوان اٹی داہیت آ امنا کننگاکہ لیویز و پولیس نا انضمام نا عمل اٹی ہرکہول آ شفافیت و میرٹ ءِ پک کننگک۔ وزیراعلیٰ تعلقدار کمامدارآتے پارت کرے کہ فورس آتا کاریم نا کچ ءِ ودفنگ کن پوسکن آہیلکاری ماڈیولز درستی راستی کرفنگے و لیویز فورس انا آفیسر و ورناتے پولیس نا بنداوی تربیت فراوان کننگے۔ وزیراعلیٰ میر سرفراز بگٹی پارے کہ لیویز فورس انا پولیس اٹی انضمام ءِ قابل عمل جوڑ کرسا ٹرانزیکشن نا پورو عمل باعزت و گچین وڑاٹ پورو کننگک۔ اوداعزم انا درشانی ءِ کرے کہ انضمام نا نتیجہ ٹی کانود نافذ کروک آ ادارہ غاتا فعالیت و ہم آہنگی ٹی نمان ودکی مریک ہرا صوبہ ٹی امن و ایمنی نا حالیت آتے گچین کننگ اٹ اہم کڑد ادا کیک۔ وزیراعلیٰ پارے کہ مچ آ بلوچستان اٹی اسہ وڑ فورس انا اطلاق امن و ایمنی نا قیام کن مزل نا نشان مریک وخت اس کہ حکومت نا اولیت آتیٹی آفیسر و کارندہ غاتا ویلفیئر و کسبی شونداری اوار ءِ۔ اوپیدوار کرے کہ لیویز آن پولیس اٹی گدریفنگ نا عمل ریسہ وار و سوگو حکمت عملی نا رداٹ پورو کننگک۔ وزیراعلیٰ پارے کہ بلوچستان اٹی پائیدار امن اکن حکومت نا گام گیج آتے پین گچین و پوسکن آ خواست آتون ہم گرنچ کننگ انگ ءِ تانکہ اسہ سوگو ، کسبی و اسہ وڑ فورس صوبہ نا الس ءِ گچین خذمت ءِ کننگ کیر۔