پیرس۔ 28جون (اے پی پی) سعودی عرب نا نائب ولی عہد شہزادہ محمد بن سلمان فرانسیسی صدر فرانسواولانڈ تون اوڑدہی ٹی ہڑتوم آ کنڈانا تعلقداری تا مون آ دننگ ، دے ٹکی نیامی نا تازہ حالیت و ڈیہہ ٹی ایران نا نیام تمنگ ئِ توننگ نا بابت معاملہ غاتیا درشانِ خیال کرینو۔ عرب خبر رساں ادارہ نا رداٹ سعودی نائب ولی عہد امریکہ نا دورہ آن گڈ فرانس نا دارالحکومت پیرس آ سرمس و ایلزی پیلس اٹی فرانسیسی صدر تون اوڑدہی ہرااسہ گھنٹہ اسکان برجاسلیس۔ گڈ اٹی سعودی وزیر خارجہ عادل الجبیر اسہ پریس کانفرنس اسے ٹی پارے کہ فرانسیسی صدر تینا ملک انا کنڈآن سعودی مملکت نا ویژن 2030ءکن مخ تفی نا درشانی ئِ کرسا پارے کہ دانا مچ آ ڈیہہ آ زئم تمک۔ سعودی نائب ولی عہد نا دادورہ نا وخت آ سعودی عرب و فرانس چندی سمجھوتہ و مفاہمت نا یات داشت آتیا ہم دستخط کیرہ۔ پیرس اٹی متعین سعودی سفیر خالد العنقری نا پاننگ ئِ کہ دادورہ آن ہڑتوم آ ملک آتا نیام اٹ تاریخی تعلقداری تے فروغ ملک۔ اوپارے کہ فرانس و سعودی عرب نا تعلقداریک تین پہ تینی مفاد آ مبنی ئُ و ہڑتوم آ ملک آک جہانی معاملہ و خاص وڑاٹ دے ٹکی نیامی ٹی جاری جھیڑہ ، عراق، شام و یمن نا بارواٹی اسہ وڑنا موقف تخرہ۔ سعودی نائب ولی عہد فرانسیسی صدر تون اوڑدہی آن گڈ حکومت نا ہیڈ کوارٹرز اٹی وزیراعظم مینول والس تون اوڑدہی کرینے۔ اوکان گڈ او فرانسیسی وزیر دفاع تون ہیت وگپ کیک۔ داوخت آ سعودی، فرانس نا کاروباری وارخواہی فورم نا مسٹ میکو دیوان مریک۔ دافورم اٹی ہڑتوم آ ملک آتا کاروباری شخصیت آک و معاشی چائندارآک شرکت کیرہ ۔ دافورم نا مسخت ہڑتوم آملک آتے ٹی زرکاری نا پوسکن ئُ وارخواہی پٹنگ نا ئِ۔ یات سلے کہ فرانس سعودی عرب اٹی زرکاری کروک آ مسٹ میکو بھلا ملک ئِ و او سعودی عرب آن تیل انا بھلا برآمد کنندہ ملک ئِ ۔ فرانسیسی وزیراعظم مینوئل والس مسکوہی سال اکتوبر اٹی سعودی عرب نا دورہ نا وخت آ جتا بشخ آتے ٹی 10 ارب یورو (یانزدہ ارب ڈالر) نا معاہدہ و سمجھوتہ غاتا پڑوئِ کریسس۔ واہم اوفتے آن گڑاس ئِ داسکان گڈیکو دروشم تننگ تنے۔
