کابل۔ 23جون (اے پی پی) سویلی اوغانستان اٹی فضائی جلہو اٹی طالبان تا سینئر کمانڈر تون اوار 12باسک تپاخت کریر۔ بادغیس اٹی اوغان نیشنل آرمی نا کارندہ اس سم کاری کرسا تینا چار سنگت آتے تپاخت کرے، اوغان سیکورٹی فورسز آک دیکی صوبہ ہرات اٹی تدوک آ مسہ تو انا وخت 234طالبان تے تپاخت کننگ نا داوا کرینو۔ اوغان احوالکار آتارداٹ کابل وزارت دفاع نا کنڈآن برجاءمروک آ اسہ بیان اسے ٹی پاننگانے کہ ہلمند نا ضلع مرجا ٹی اسہ فضائی کارروائی اسینا وخت آ طالبان تا اسہ سینئر کمانڈر اسے تون اوار 12باسک تپاخت کریر۔ بیان نا رداٹ داکارروائی ٹی سلہہ و گولہ بارود ہم بھس مس۔ ہلمند نا کیہی علاقہ غاتیا طالبان تا کوزہ ئِ و ساڑی آ دے تے ٹی بیدادی نا واقعہ غاتے ٹی کیہی بندغ آک تپاخت کرینو۔ صوبہ بادغیس اٹی اوغان نیشنل آرمی نا کارندہ سم کاری کرسا تینا چار سنگت آتے تپاخت کرے۔ کمامدارآتا رداٹ داواقعہ ضلع جواندنا علاقہ ٹی اسہ پوسٹ اسیا پیش بس۔ کمامدارآک پاریر کہ واقعہ نا جاست وپاست مننگ ئِ۔ اوغان سیکورٹی ادارہ غاک دیکی ہرات اٹی تدوک آ مسہ تو انا وخت جتا کارروائی تے ٹی 234طالبان تے تپاخت کننگ نا داوا کرینو۔ ہرات پولیس نا سروک تدوک آدے پریس بریفنگ اٹی پاریر کہ صوبہ نا کیہی علاقہ غاتے ٹی تدوک آ مسہ تو انا وخت آ طالبان تا برخلاف پبی کارروائی کننگا۔ داکارروائی ٹی 234طالبان تپاخت و 223ٹھپی مسر۔ اوداکارروائی تے ٹی بھلو کچ اسے ٹی سلہہ و گولہ بارود دوئی کننگ نا ہم داوا ئِ کرینو۔ قطبی صوبہ فاریاب اٹی 115عسکریت پسند آک سلہہ بٹینو۔ سیکورٹی کمامدارآتا رداٹ دا بندغ آک رضاکارانہ وڑاٹ سلہہ بٹسا پرامن زند تدیفنگ نا پڑوئِ کرینو۔ اوکان بیدس کابل نا علاقہ وزیر اکبر خان اٹی زوردار دھماکہ مس واہم اوٹی ہچ ئُ مالی و جانی نسخان اس متو۔
