امریکہ نا پاکستان و اوغانستان نا نیام اٹ سیمی جھیڑہ غاتیا تشویش نا درشان ڈیہہ ٹی امن و سوگوی کن ہڑتوم آ ہمسایہ ملک آتا نیام اٹ گچین تعلقداری المی ئِ ، امریکی محکمہ خارجہ

واشنگٹن۔ 16جون (اے پی پی) امریکہ پاکستان و اوغانستان نا نیام اٹ سیمی جھیڑہ غاتیا گڑتی نا درشانی ئِ کرسا پارینے کہ ڈیہہ ٹی امن و سوگوی کن ہڑتوم آ ہمسایہ ملک آتا نیام اٹ گچین تعلقداری المی ئِ ۔امریکی محکمہ خارجہ نا ترجمان جان کربی تدوک آ دے ہردے نا پریس بریفنگ اٹی پارے کہ امریکہ ئِ طورخم بارڈر آ مروک آ ساڑی آ جھیڑہ غاتیا گڑتی ئِ۔ ترجمان ہڑتوم آ کنڈآتیٹی بھلو کچ اسے ٹی سلہہ غاتا ساڑی گری آ ہم گڑتی ظاہر کرے و پارے کہ ساڑی آ جھیڑہ غاتیٹی جانی نسخان نا احوال آک ملانو۔ ترجمان پارے کہ امریکہ بے چیٹی و کراسنگ پوائنٹس آ اختلافات آتا چٹفنگ کن ہڑتوم آ ملک آتا است بڈی ئِ کننگ ئِ انتئے کہ نن سمجھنہ کہ ڈیہہ ٹی امن و سوگوی کن ہڑتوم آ ملک آتا نیام اٹ گچین تعلقداری المی ئِ ۔ ترجمان پارے کہ اوغان فورسز آتا بلا اشتعال سم کاری آن اسہ پاکستانی میجر اسینا تپاخت مننگ نا احوال آک ملانو۔