ریاض۔ 13جون (اے پی پی) سعودی عرب نا مجلس شوری پوسکن ئُ کانود اسینا منظوری ئِ تسنے ہرانا تحت مسیت آتیٹی خار انگیز تقریر کروک آ بندغ آتا برخلاف کانودی کارروائی کننگک۔ عرب خبر رساں ادارہ نارداٹ تدوک آ دے مجلس شوری نا دیوان اٹی خار انگیز تقریر آتا توننگ کن پیش کروک کانود ئِ گڈیکو دروشم ترسا مسیت و عبادت گاہ تیان خار تالان کننگ نا مرتکب بندغ آتے 10 سال قید انا سزامنظور کننگانے۔ دا کانودنا رداٹ مسیت آتیان تکفیری فتوہ جاری کننگ حکومت وخت انا برخلاف الس ئِ اکسائفنگ و خون تون اوار ایلو ڈوہ تا ترغیب تروک آ عنصر آتے اوفتے اوفتا کروک نا سزا تننگک۔ داکانود نا رداٹ صفتی امتیاز ، رنگ و نسل ، زبان ، قبیلہ و رڑانا بنداو آ امتیازی سلوک ئِ ہم قابل سزا جرم گوندنگانے۔ داکانود نا رداٹ سوشل میڈیا و ایلو احوالکارآتا ذریعہ رڑانا برخلاف خلقت آتے ورغلائفنگ و حکومت نا برخلاف خلقت آتے اکسائفنگ آ ہم سزا تننگک۔ سعودی عرب نا مجلس شوریٰ ٹی انسداد امتیاز و خار انا بابت آن کانود تیار کننگ نا زمہ واری ہراباسک شوریٰ ئِ تننگا اوفتے ٹی ڈاکٹر لطیفہ الشعلان، ڈاکٹر عبداللہ الفیفی و داکٹر حیاالمنیع اوارو۔
