جدہ۔ 13جون (اے پی پی) سعودی نائب ولی عہد شہزادہ محمد بن سلمان تینا امریکہ نا دورہ نا وخت آ امریکی صدر براک اوباما، وزیر خارجہ جان کیری و وزیر دفاع ایشٹن کارٹر تون علاقائی امور، یمن ، شام ، عراق، لیبیا و گلف سیکورٹی نا حالیت آتیا درشانِ خیال کیرہ۔ سعودی احوالکارآتا رپورٹس نا رداٹ سعودی نائب ولی عہد شہزادہ محمد بن سلمان 16جون اسکان واشنگٹن اٹی اڈ کیک اوکان گڈ او نیو یارک آ کاہک۔ رپورٹ نا رداٹ سعودی نائب ولی عہد تینا دورہ نا وخت آ امریکی صدر براک اوباما ، وزیر خارجہ جان کیری، وزیر دفاع ایشٹن کارٹر و ایلو بڑزکو کمامدارآتون اوڑدہی کیک ہراٹی ڈیہہ انا ویل خاص کر شام انا تنکی آ درشانِ خیال کننگک وخت اس کہ محمد بن سلمان یمن ، عراق ، لیبیا و خلیج نا ملک آتیٹی سیکورٹی نا حالیت آتیا ہم ہیت و گپ کیک۔ رپورٹ نا رداٹ امریکی کمامدار آتون اوڑدہی تا وخت آ دہشت گرد تنظیم داعش و القاعدہ نا برخلاف سعودی سروکی ٹی اسلامی فوجی اتحاد آ ہم درشانِ خیال کننگک وخت اس کہ سعودی نائب ولی عہد شہزادہ محمد بن سلمان نیویارک اٹی امریکی مالیاتی ادارہ غاتا سروک آتون اوڑدہی کیک و اوفتے سعودی وژن 2030 ءنا بارواٹی معلومدار کیک۔
