اقوام متحدہ۔ 10 جون (اے پی پی) پاکستان بحیرہ روم اٹی پناہ گزین تے دروک آ کشتی تا سمندر برد مننگ و اونا نتیجہ ٹی قیمتی انسانی جان تا نسخان آ گڑتی نا درشانی ئِ کرسا دا رداٹ جامع گام گیج کننگ نا گرج آ زورشاغانے۔ داہیت ئِ اقوام متحدہ ٹی پاکستان نا آخبتی مندوب ڈاکٹر ملیحہ لودھی پناہ گزین و پردیسی تا ہن و بر نا بارواٹی اسہ دستاویز اسینا تیاری کن مروک آ مذاکرات اٹی پارے۔ ڈاکٹر ملیحہ لودھی پارے کہ پناہ گزین تا ساڑی آ تنکی ٹی ہن و بر نا وخت انسانی تپاخت آتا ودوک آ واقعہ غاک گڑتی اسے ئُ۔ ہر سال یورپ آ ہِننگ نا کوشست نا وخت سد آ پناہ گزین بحیرہ روم اٹی کشتی تا حادثہ غاتیٹی تینا جان تیان دوتے سلرہ۔ دا ویل اتون مون تننگ نا رداٹ اقوام متحدہ نا ہیڈ کوارٹر اٹی اینخو نا سال 19ستمبر آ اسہ بڑزکو کہول نا دیوان اس اڈ ہلنگ ئِ ہراٹی دا ویل انا جتا پلو آتا جاچ ئِ ہلنگک و جتا صلاح غاتیا غور کننگک۔ ڈاکٹر ملیحہ لودھی پارے کہ جہانی برادری ئِ پناہ گزین و ہن و بر کرو ک آ بندغ آتے نظر انداز کروئی مف۔ دا ویل انا آخبتی و دیر پا ایسری المی ئِ اوپارے کہ پاکستان ئِ پناہ گزین تا ویل آتیان جوانی اٹ سمائِ انتئے کہ مسکوہی چار عشرہ آن پاکستان 30لکھ آن زیات پناہ گزین تا میزبانی ئِ کننگ ئِ۔ ڈاکٹر ملیحہ لودھی دا ہیت آ افسوز نا درشانی ئِ کرے کہ بین الاقوامی برادری پناہ گزین آتا ویل آتا سیاسی ایسری ٹی سرسہب مننگ کتو۔ اوڑتون اوار اوار پناہ گزین و امداد و اوفتا وطن پدی ہِننگ نا چرجوئی ٹی مخ تفی ٹی ہم وخت اتون کمتی بننگ ئِ اوپارے کہ دا حالیت آتیٹی پاکستان غٹ آن زیات زہمی مننگ ئِ انتئے کہ ملکی معیشت آ ودکی بھاریم تمنگ ئِ و داخہ کچ پناہ گزین آتا ساڑی گری پیچیدہ، راجی و سیاسی ویل ودی مننگ ئِ۔او دا اومیت نا درشانی ئِ کرے کہ دا دیوا ن نا نتیجہ ٹی پناہ گزین آتا بابت دستاویز نا تیاری ٹی کمک رسینگک و پناہ گزین آتا ویل ایسر مریک۔
