اسلام آباد۔ 08 جون (اے پی پی) بنجائی وزیر سیفران لیفٹیننٹ جنرل (ر) عبدالقادر بلوچ پارینے کہ فاٹا ٹی اصلاحات آتے کن اڈ تروک آکمیٹی صلابت آتے پورو کرینے، سفارشات آتے گڈیکو دروشم تننگ انگ ئِ ۔ رپورٹئِ زوت وزیراعظم ئِ پیش کننگک۔ قبائلی سرکڑدہ غاک تینا ساڑی آ حیثیت ئِ برقرار تخنگ و علاقہ نا ورنا پوریا گر و ایلو بندغ آک خیبر پختونخواہ ٹی انضمام خواہرہ، گڈیکو فیصلہ ئِ پارلیمنٹ ہی کیک۔ چارشنبے آ ایوان بالا ٹی سینیٹر عبدالقیوم نا توجوہ ترفوک نوٹس نا ورندی ٹی بنجائی وزیر سیفران پارے کہ فاٹا نا الس ملک اکن بھلو قربانی اس تسنے خاص کر دہشت گردی نا برخلاف جنگ اٹی اوفتا قربانی تے نظر انداز کننگ مفک۔ فاٹا نا الس امن کن اُراتیان بے اُرا مسر۔ اوپارے کہ فاٹا نا الس ئِ تینا نظم و نسق ئِ چلیفنگ اٹی ہچ ئُ واک اس اف، فاٹا نا گچین مروک آ نمائندہ غاک ہم تینا علاقہ غاتے کن کانودسازی اس کننگ کپسہ، ہموجاگہ نا الس ئِ حق نمائندگی رسینگے تو او تینا ویل آتے تینٹ ایسر کننگ کیرہ۔ اوپارے کہ فاٹا نا الس ئِ دب تننگ کن انگریز آک ہرا مون انگا کانودئِ درستی راستی کرفیر اوبایدے چٹے۔ ایف سی آر اٹی ترمیم اتنگے تواو تینا معاملہ غاتے تینٹ چلیفنگ کیرہ۔ اوپارے کہ فاٹا نا الس نا اُرا تیا پدی ہِننگ ، بحالی اہم ئُ معاملہ اسے دا چرجوئی ٹی اسہ کمیٹی اس جوڑ کننگانے ہرانا سروک سلاہکار خارجہ سرتاج عزیز ئِ۔ نن ایجنسی تیٹی ہنسا ویل آتا ایسری کن کاریم کننگ اُن۔ ہفت ایجنسی تا ایسر کرینن۔ قبائلی سرکڑدہ و لس خلقت آتا نکتہ نظرئِ معلوم کننگ اُن۔ ایف آرنا بابت ہم صلابت کننگانے۔ اصلاحات آن مست خلقت آتے اُراتیٹی پدی و بحالی نا گرج ئِ۔ قبائلی سرکڑدہ قبائلی جرگہ و قبائلی روایت آتے برقرار تخنگ نا خواہندارئِ وخت اس کہ ورناک ، پوریاگر و ایلو بندغ آک خیبر پختونخوا ٹی انضمام خواہرہ۔ اوپارے کہ کمیٹی نا سفارشات آتے گڈیکو دروشم تننگ انگ ئِ۔ زوت رپورٹ ئِ وزیراعظم ئِ پیش کننگک۔ دا معاملہ غا اسہ بھلو جرگہ اس ہم خوائفنگ مریک۔ اوپارے کہ سال آتے اٹ آخا توتے اٹ فاٹا ٹی اصلاحات کننگک۔
