کلرسیداں ۔ 04جون (اے پی پی) وزیر داخلہ چوہدری نثارعلی خان پارینے کہ او امریکہ یا پین اسٹ نا مون آ آخا پاکستان نا الس و پارلیمنٹ نا جوابدہ ئِ، الس شناختی کارڈ انا تصدیق اٹی کمک کیر، اولیکو مرحلہ ٹی دونیم کروڑ خاہوت ناسروک آتے تصدیق کن کلہو کاہک کہ اونا فیملی ٹری ٹی پین بندغ تو اواراف، غیر کانودی شناختی کارڈ جاری کروک آ نادرا عملہ و شناختی کارڈ ہولڈرآتے اِرا تو انا مہلت تننگ اُن ، اوڑآن فائدہ ہرفپروک آتے سزا ایتنہ، پارلیمانی نظام ٹی وزیراعظم نا جاگہ ئِ ہچ گہس ہلنگ کپک، بلاول بھٹو سیاسی نابالغ ئِ، اونا غیر سنجیدہ بیان آ تران کننگ خواپرہ۔ ہفتہ آ کلر سیداں ٹی تحصیل میونسپل کمیٹی نا پوسکن گچین مروک آ باسک آتا اعزاز اٹی بیابخیری دود انا وخت آ احوالکار آتا نمائندہ غاتون ہیت و گپ کرسا چوہدری نثارعلی خان پارے کہ او تینا حلقہ ٹی 4 ارب روپئی نا شونداری ڈٹ آتا بنائِ کیک۔ اسہ سوج اسینا ورندی ٹی اوپارے کہ اونا بارواٹی بلاول بھٹو نا بیان داخہ سنجیدہ اف کہ اوڑآ تران کننگے۔ بلاول چناس ہم اف ولے سیاست آن نابلد ضرور ئِ اونا بیان آ زیات تران کننگ خواپرہ۔ اسہ سوج اسینا ورندی ٹی چوہدری نثارعلی خان پارے کہ نان ایشو ئِ میگاایشو جوڑ کننگ آ افسوز مریک۔ ای 32 سال آن سیاست اٹی اُٹ ، رول آف بزنس آن کنے سمائِ ۔ د اشرہ بے معنی و بلا جوازئِ۔ الس نا توجوہ بے کچ غیر موزوں گڑاتا کنڈ ا تبدیل کننگ روایت جوڑ مسنے۔ اوٹی میڈیا ئِ زمہ وار گوندنگ مفک اونا زمہ وار آک ہموفک ئُ ہرا آئین کانود ئِ اسہ پلو تخسا بے پرکیاں تے بال ایترہ۔ پارلیمانی نظام حکومت اٹی وزیراعظم نا جاگہ ئِ پین ہچ گہس ہلنگ کپک، وزیراعظم مست ہم پیشن ہنا انت مگہ اوڑآن آئینی یا کانودی خلا ودی مسنے؟ ۔ پارلیمان نظام اٹی قائد ایوان ہی وزیراعظم مریک اونا ساڑی مفننگ اٹی کابینہ تینا کاریم ئِ کیک، پاکستان نا کابینہ تینا کاریم ئِ کننگ ئِ۔ چوہدری نثارعلی خان پارے کہ و پین اسٹ نا مون آ آخا پاکستان ناالس و پارلیمنٹ نا مون آ جوابدہ ئِ۔ اوپارے کہ اسہ رپورٹ اس بسنے ہراٹی حکومتی گام گیج آتیان دہشت گردی نا جاگہ تنک مننگ نا بابت پاننگانے۔ چوہدری نثار پارے کہ 2013 ءٹی ہردے دھماکہ مسکہ داسا ہفتہ غاتیٹی ہم دنو واقعہ مفک، نن دا پاپنہ کہ دھماکہ غاک چٹانو واہم اوفتے ٹی کمتی ضرور بسنے۔ سول و عسکری ادارہ غاک اواری اٹ اسہ بھلو جہد اس کرینو ہراڑآن گچینی بسنے۔ اسہ سوج اسینا ورندی ٹی چوہدری نثارعلی خان پارے کہ مسکوہی مسہ دے اٹی بجٹ ہی نا معاملہ چلینگ انگ ئِ۔ اقتصادی سروے، بجٹ تقریرو داسا پوسٹ بجٹ کانفرنس مسنے۔ ای مالیاتی چائندار اس افٹ، تینا وزارت نا اصل بجٹ ئِ داسکان ہروئی ئِ کہ ننا اخس خواست آتے امنا کننگا۔ وزارت داخلہ دہشت گردی نا بر خلاف جنگ و آئی ڈی پیز آتا بحالی نا معاملہ نا اسہ حد اسسکان زمہ وارئِ۔ اوپارے کہ نیکٹا فعال ئِ۔ اونا کاریم اتی پین ودیکی نا گرج ئِ، فنڈز و انسانی وسیلہ غاتا ویل مون تروک ئِ، نن بھلو حد اسسکان ویل آتے ایسر کریننم، بجٹ ملانے، جے آئی ڈی کن دفتر و پیسہ غاتا معاملہ ایسر مس ، دفتر کن اسہ ماڑی اس کرایہ ٹی ہلنگ آن ای اتفاق کتوٹ داسا اسہ پوسکن ئُ ماڑی اس ہلکونٹ او سرکاری ادارہ غاتون ئس اوڑآ معاملہ غاک طے مسنو اوٹی نیکٹا و جوائنٹ انٹیلی جنس ڈائریکٹوریٹ نا دفتر آک مریرہ۔ 800 کنال ڈغار کوزہ رڑآتیان خورک کرفینن۔ وزیراعظم نا پارت آتیا داسا دا ڈغار پنجاب حکومت ئِ لیز آ تننگانے۔ وزیر داخلہ پارے کہ او رحمان ملک ئِ اونا حکومت ناحساب و کتاب ئِ گدریفک۔ غیر کانودی کارڈ بلاک کننگ نا زمہ واری نادرانا ئِ۔ نن تینا دور اٹی داوخت اسکان 2لکھ 50ہزار شناختی کارڈ و 29 ہزار پاسپورٹ بلاک کرین، وزیر داخلہ پارے کہ ملامنصور ئِ کارڈ انا اجراء2001-02ءو اونا تجدید مسکوہی دور حکومت اٹی مس ، نادرا نا ادارہ پاکستان نا سیکورٹی نا ضامن ئِ۔ اوپارے کہ شناختی کارڈ انا تصدیق سخت ئُ کاریم اسے ، داکینہ نشان ایتنہ واہم خلقت آتا مشکلات آتے مون آ تخنگانے ۔ نن سم آتا تصدیق کن ہراوڑوڈول ئِ کرین ہمو طرز آ نن پی ٹی اے نا ڈیٹا ئِ کاریم اٹ اتوئی ئِ۔ فیملی ٹری دونیم کروڑ بندغ آتے گدریفک ہراڑآن بھاز چھان بین مریک ۔ اسہ پین سوج اسینا ورندی ٹی اوپارے کہ کنا حلقہ نا بندغ آک جوان و علاقہ نا شون ئِ خواہوک آک ئُ۔ روایتی وڑاٹ جوان ئُ علاقہ اسے۔ داحلقہ غا ارب آ روپئی نا بجٹ تس و چار پنچ تو گڈ بھلو پیکج اس ایتنہ۔ یکونیم ارب روپئی آن ہسپتال جوڑ مننگ ئِ۔ اوپارے کہ گیس انا سپلائی ٹی گچینی بننگ آ داڑے گیس لس مریک۔ اوڑآ خصوصی توجوہ تننگک۔ اوکان گڈ او تحصیل میونسپل کمیٹی نا گچین مروک بلدیاتی نمائندہ غاتون اوڑدہی کرے۔ داوخت آ درشانِ خیال کرسا چوہدری نثار پارے کہ گچین باسک آک تینا پارٹی نا نیک نامی کن کڑد ادا کیر۔ کانودی ویل آتا سوب آن اوفتا حلف اٹی تاخیر مننگ ئِ نن تینا سنگت آتے فراموش کپنہ۔
