اسلام آباد۔ 04جون (اے پی پی) بنجائی وزیر خزانہ سینیٹر اسحاق ڈار پارینے کہ ملک انا اقتصادی شرح نمو ٹی ودکی، روزگار نا فراوانی نا وارخواہی تے ودفنگ، نیزگاری نا چٹفنگ و لس بندغ نا حالیت ئِ گچین جوڑ کننگ نا گام گیج آک آخبت نا حکومتی حکمت عملی نا بشخ مریرہ۔ کشت و کشار نا بحالی و شون آ خصوصی توجوہ تخنگانے۔ یوریا کھد انا نرخ 1400 روپئی اسہ گونی وخت اس کہ ڈی اے پی کھد انا نرخ ئِ 2500 روپئی کننگ نا فیصلہ کرینے۔ کشاری دوائی تیا خلوک آ ٹیکس آتے ختم کننگ انگ ئِ۔ کشاری ٹیوب ویل آتے کن بجلی 5.35روپئی اسہ یونٹ کننگ نا فیصلہ کرینے وخت اس کہ صوبہ غاک ہم اوٹی تینا بشخ ئِ شاغنگ کیرہ، کشاری کڑز آتا اجراءنا ہدف اٹی 100 ارب روپئی نا ودکی کننگانے، سول ملازم آتے کن گچین پیکج اس تسنے و اِرا ایڈہاک ریلیف ئِ تنخواہ ٹی ضم کرسا اوڑآ 10 درسد ایڈہاک ریلیف تسنے ہرا جمی وڑاٹ تقریباََ 13درسدنا خڑک جوڑ مریک، کرنٹ اکاﺅنٹ نسخان ئِ جی ڈی پی نا اسہ درسد اسکان کم کننگانے و پین کمتی کن گام گیج کننگک، 5بھلا برآمدی بشخ آتے کن ٹیکس نا کچ ئِ زیروریٹڈ کرینے، 30 اپریل 2016ءاسکان نا ریفنڈز انا سلوک آ پیسہ غاتا ادائیگی ئِ 31اگست اسکان باوری جوڑ کننگک، صنعتی بشخ اکن مشینری و خام مال انا درآمد آ خلوک ڈیوٹی ئِ 3درسد کم کننگک، مسکوہی مسہ سال انا وخت ٹیکس وصولی تیٹی 60 درسد ودکی مس، رعایتی ایس آراوز ئِ پدریسہ پدی ہلنگک، سرکاری بشخ انا شونداری پروگرام نا تحت بنجاءنا بست و بند اٹی 800 ارب وخت اس کہ صوبائی پروگرام نا تحت 875ارب روپئی نا شونداری بجٹ تخانے۔ زرمبادلہ نا ملکی کوڑی ئِ 2018ءاسکان 30 ارب ڈالر اسکان ودفنگک، آپریشن ”ضرب عضب“ نا سرسہبی کن پاکستان نا فوج انا کوشست آک ستاءکڑزرہ، امن وایمنی نا حالیت آتیٹی پین گچینی آن ہندی و درملکی زرکاری ودک و دہشت گردی نا خاتمہ شرح نمو ٹی ودکی نا سوب جوڑ مریک، حکومت دفاع کن بجٹ نا 11 درسد بشخ تخانے۔ ہفتہ آ داڑے بجٹ آن گڈپریس کانفرنس آن تران کرسا بنجائی وزیر خزانہ سینیٹر محمد اسحاق ڈار پارے کہ بروک آ مالی سال انا بجٹ اٹی دوئی وسیلہ غاتیان زیات آن زیات استفادہ کننگ نا کوشست کننگانے و بروک آ بجٹ اٹی ملکی معیشت اٹی مخ انا ملی نا حیثیت نا حامل کشت وکشار نا بشخ انا بحالی و شون آ خصوصی توجوہ تخنگانے، بجٹ تجاویز کشاری بشخ آن منسلک غٹ شریدار آتا صلابت آن تیار کننگانے۔ اوپارے کہ 2013ءٹی پاکستانی معیشت نا حالیت بے کچ خراب ئس و پاکستان ئِ دیوالیہ مننگ آن بچفنگ و ڈیفالٹ آن کشنگ نا سخت انگا مرحلہ مون تروک ئس وخت اس کہ میکرواکنامک سوگوی نا پدی ہم سخت ئُ کاریم اس ئس۔ اوپارے کہ ننا سفر سرسہبی اٹ جاری ئِ و مسکوہی سال انا بجٹ اٹی حکومت وعدہ کریسس کہ پین وخت اس ننا فوکس شرح نمو ٹی ودکی مریک۔ اوپارے کہ ملکی معیشت نا ہرابشخ آتیٹی زیات آن زیات شون نا گرج ئِ اوفتے ٹی کشت و کشار نا بشخ بنداوی اہمیت نا حامل ئِ انتئے کہ ملک انا تقریباََ 70 درسد آبادی کشت وکشار نا بشخ اتون منسلک ئِ ۔ اوپارے کہ دا سیکٹر نا کمک ننا اولین اولیتئِ و اونا شون اکن آئندہ میزانیہ ٹی چندی گام گیج کننگانے۔ وزیر خزانہ پارے کہ حکومت تدوک آ منہ تو انا وخت کھد انا نرخ اٹی 250 روپئی اسہ گونی نا کمتی کرینے و داسا یوریا کھد انا نرخ ئِ 1800 روپئی آن 1400 روپئی اسہ گونی کننگ نا فیصلہ کرینے ، ہنداوڑ کشت و کشار نا بشخ انا ایلو طلب ڈی اے پی نا نرخ آتے ٹی کمتی کرین ہرانا نرخ 3200 روپئی اسکان رسینگاسس ، حکومت نیام تمسا اونا نرخ ئِ کم کرفے۔ اوپارے کہ داسا جہانی مارکیٹ اٹی ڈی اے پی کھد انا نرخ اٹی کمتی مسنے و حکومت مسکوہی سال انا کشاری پیکج اٹی ڈے اے پی نا نرخ اٹی 500 روپئی اسہ گونی ئِ کم کرسا اونا نرخ تقریباََ 2800 روپئی نا خڑک ئِ ہراٹی پین کمتی کرسا ڈی اے پی کھد انا نرخ ئِ 2500 روپئی اسکان کم کننگ نا تجویز ئِ۔ وزیر خزانہ پارے کہ غٹ چیمبر آف کامرس اینڈ انڈسٹریز ، صوبائی حکومت و ایلو شریدار آتون صلابت آن گڈ کشار ی بشخ انا شرح نمو ٹی ودکی کن گام گیج تجویز کننگانے تانکہ ملکی معیشت نا دا اہم بشخ جی ڈی پی ٹی تینا بشخ ئِ شاغنگ کیر۔ اوپارے کہ کشاری بشخ انا کارکڑد اٹی ودکی کن کشاری دوائی تیا خلوک ٹیکس آتے ہم چٹفنگ انگ ئِ وخت اس کہ کشت و کشار نا اسہ بھلو خڑچہ اس ٹیوب ویل ئِ و حکومت کشاری ٹیوب ویل آتے کن بجلی نا نرخ اٹی 3روپئی 50 پیسہ اسہ یونٹ نا کمتی کرسا اودے 5.35روپئی اسہ یونٹ کننگ نا فیصلہ کرینے وخت اس کہ صوبہ غاک ہم اوٹی تینا بشخ ئِ شاغنگ کیرہ تانکہ بشخ ئِ پین ریلیف تننگ مرے۔ وزیر خزانہ پارے کہ پنجاب نا وزیراعلیٰ محمد شہباز شریف دا عزم انا اعادہ ئِ کرینے کہ صوبائی حکومت کشاری ٹیوب ویل آتیا خلوک بجلی نا سیلز ٹیکس ئِ ادا کیک تانکہ کشارگر آتے بجلی 5.35روپئی اسہ یونٹ نا نرخ آ دوئی مننگ کے۔ اوپارے کہ حکومت پولٹری نا بشخ اکن ہم شریدار آتا صلابت آن چندی گام گیج کرینے تانکہ ککڑ نا سُو و ایلو چکن مصنوعات آتا نرخ آتے ٹی ودکی مننگ کپ، ہنداوڑ کشاری بشخ اکن درکار مشینری ، مچھی نا صنعت ، لائیو اسٹاک و ایلو منسلک صنعت آتے کن ہم گام گیج کننگانے تانکہ بروک آ سال کشاری بشخ جی ڈی پی ٹی تینا بشخ ئِ شاغنگ کے۔ وزیر خزانہ پارے کہ داسال کرپاس نا ملکی پیداوار اٹی 28 درسد کمتی مننگ آن اونا پیداوار 10ملین بوجھوتسکان کم مس وخت اس کہ مسکوہی مالی سال انا وخت کرپاس نا ملکی پیداوار 14ملین بوجھو آن تجاوز کریسس و اینخو نا مالی سال اکن اونا ہدف 15ملین بوجھو مقرر کننگاسس۔ کرپاس نا پیداوار اٹی کمتی نا سوب جی ڈی پی ٹی کمتی واقع مس۔ اوپارے کہ ملکی آبادی نا 70 درسد بشخ اتون منسلک کشت و کشار نا بشخ ئِ اونا گرج آتا رداٹ کمک فراوان کننگ نا کوشست کننگانے۔ وزیر خزانہ پارے کہ جی ڈی پی ٹی اہم کڑد انا حامل ارٹ میکو بھلا بشخ برآمدات ئس ہراٹی اینخو نا مالی سال انا وخت تقریباََ 11 درسد کمتی واقع مس ہرانا بھاز انگا الم آک ئُ۔ اوپارے کہ بجٹ نسخان نا سوب افراط زر مریک ہراڑآن ہندی مارکیٹ آتیٹی نرخ آک ودیرہ و لس بندغ زہمی مریک۔ اوپارے کہ حکومت کرنٹ اکاﺅنٹ نسخان ئِ کم کننگ کن گام گیج کرے ہراٹی سرسہبی دوئی مس ، اودے جی ڈی پی نا اسہ درسد اسکان کم کننگانے و پین وخت اس ہم اوٹی پین کمتی کننگ کن گام گیج کننگک۔ اوپارے کہ شون ہلوک ملک آتا برآمدات آتیٹی ملکی جی ڈی پی نا تقریباََ 15درسد مریک و ننا خواہش ئِ کہ پاکستان ایشیئن ٹائیگر جوڑ مرے و اونا برآمدات آتیٹی خاطر خواہ ودکی مرے۔ اوپارے کہ دا بشخ انا تجاویز آ نن 5بھلو برآمدی بشخ آتے کن ٹیکس اناکچ ئِ زیروریٹڈ کرینے و 30 اپریل 2016ءاسکان نا ریفنڈز انا سلوک آ پیسہ غاتا ادائیگی ئِ 31 اگست 2016اسکان باوری جوڑ کننگک، وزیر خزانہ پارے کہ بروک آ مالی سال انا بجٹ اٹی صنعتی بشخ انا شون اکن ہم گام گیج کننگانے۔ اوکان بیدس ایلو بشخ آتے کن ہم چندی گام گیج کننگانے ولے ننا غٹ آن اولیکو اولیت کشت و کشار ئس۔ اوپارے کہ شرح نمو کن کیپیٹل زرکاری نا بھاز گرج مریک ہراٹی ودکی کن جامع حکمت عملی اس مرتب کننگانے و داوخت انوسٹمنٹ ٹو جی ڈی پی تقریباََ 15.6درسد اسکان ودانے ہرادے بیست ئُ یک ، بیست ئُ دو درسد اسکان دینہ، ہراڑآن ملکی معیشت نا شرح نمو 7 درسد اسکان ودک۔ وزیر خزانہ پارے کہ بجٹ اٹی اہم فیصلہ کننگانے کہ صنعتی بشخ اکن مشینری و خام مال انا درآمد آ خلوک ڈیوٹی ئِ 3درسد کم کننگے ہرا پاکستان نا تاریخ نا غٹ آن کم سلیب ریٹ ئِ ۔ اوپارے کہ دافیصلہ آن حکومت ئِ 18آن 19 ارب نا بھاریم ئِ سگوئی تمک۔ خذمت آتا بشخ انا بابت وزیرخزانہ پارے کہ اونا شون اکن ہم بجٹ اٹی چندی گام گیج تجویز کننگانے۔ اوپارے کہ بروک آ مالی سال انا وخت کشاری کڑز آتا اجراءنا ہدف اٹی 100 ارب روپئی نا ودکی کننگانے وخت اس کہ نجی بشخ اکن اینخو نا مالی سال انا وخت داوخت اسکان 341 ار ب روپئی نا کڑز جات جاری کننگانے و اومیت ئِ کہ اینخو نا مالی سال انا ایسری اسکان اونا ہدف ئِ دوئی کننگک۔ اوپارے کہ براہ راست درملکی زرکاری ، سٹاک مارکیٹ اٹی ہم نمان گچینی واقع مسنے وخت اس کہ ریونیو و ٹیکسز آتا بابت حکومت الس آ بھاریم شاغپننگ نا کوشت کرینے۔ اوپارے کہ موبائل فونز آ تیا ٹیکس ہنداخاطران ودفنگانے کہ ڈیکلریشن نا غلط کاریم اٹ اتنگ ئِ توننگ مرے۔ وزیر خزانہ پارے کہ مچ آ ٹیم دے ونن نا پبی خواری آن گڈ فیصلہ کرینے تانکہ ملکی معیشت نا شون انا درکار ہدف دوئی مننگ کے۔ اوپارے کہ ٹیکسز آتا وصولی تیٹی مسکوہی مسہ سال انا وخت 60 درسد ودکی مسنے۔ اوپارے کہ جاری مالی سال اکن ٹیکس وصولی تا ہدف ئِ دوئی کننگک و رعایتی ایس آر اوز ئِ پدریسہ پدی ہلنگک۔ وزیر خزانہ پارے کہ ننا مون نا ہدف اقتصادی شون ئِ و ہر ملک اٹی اقتصادی شون زرکاری آن مریک۔ اوپارے کہ آئندہ بجٹ اٹی حکومت سرکاری بشخ انا شونداری پروگرام نا رداٹ بنجاءنا بست و بند اٹی 800 ارب وخت اس کہ صوبائی پروگرام نا رداٹ 875 ارب روپئی نا شونداری بجٹ تخانے۔ اوپارے کہ نن 2018 ءاسکان شرح نمو ئِ 7 درسد اسکان ودفینہ اخس زرکاری حکومت کیک اونا اِرٹ آن مسہ گنا نجی بشخ سرمایہ کیک ہنداخاطران حکومت شونداری پروگرام نا بجٹ اٹی خاطر خواہ ودکی کرینے۔ اوپارے کہ حکومت بروک آ اِراسال انا وخت ملک انا جی ڈی پی ٹی ودکی کیک ہراڑآن زرکاری ، روزگار نا فراوانی نا وارخواہی و شرح شون نا ودنگ تون اوار اوار نیزگاری نا خاتمہ مریک۔ اوپارے کہ افراط زر انا کچ ئِ سنگل ڈیجٹ اٹی تخنگک ہراڑکن انتطامی و مالیاتی گام گیج کننگک۔ وزیر خزانہ پارے کہ حکومت نا اسہ ہدف زرکاری نا کچ جی ڈی پی نا حساب آن ودفنگ نا ئِ و زرمبادلہ نا ملکی کوڑی ئِ 2018 ءاسکان 30 ارب ڈالر اسکان ودفنگک۔ وزیر خزانہ سیاسی جماعت آتیان خواست کرے کہ او حکومت تون تفر تانکہ تین پہ تینی صلابت آن میثاق معیشت تیار کننگ مرے۔ اوپارے کہ ملکی معیشت نا شون اکن روڈمیپ اس جوڑ کننگ نا گرج ئِ ، عارضی وڑاٹ ہمپوک آ بندغ و سیکورٹی نا حالیت آتا بابت آن اوپارے کہ امن وایمنی نا حالیت آتیٹی گچینی حکومت نا اولین اولیت ئِ ، آپریشن ”ضرب عضب“ سرسہبی اٹ جاری ئِ ہرا تینا فائنل راﺅنڈ اٹی پترینگانے۔ اوپارے کہ آپریشن ”ضرب عضب“ نا سرسہبی کن پاکستان نا فوج انا کوشست آک ستاکڑزرہ۔ وزیر خزانہ پارے کہ دہشت گردی نا جنگ انا سوب ملکی معیشت ئِ 118 ارب ڈالر نسخان سگوئی تما و نائن الیون آن گڈ کروک آ گڑاس فیصلہ غاتیان بھلو نسخان اس مسنے۔ اوپارے کہ ضرب عضب آ زرکاری مننگ ئِ ہراڑآن ملک ئِ خاطر خواہ سرسہبی ملانے۔ اوپارے کہ امن و ایمنی نا حالیت آتیٹی گچینی نا سوب مسکوہی مالی سال انا وخت ملکی معشت ئِ رسینگوک آ 10 ارب ڈالر نا نسخان جاری مالی سال انا وخت 6ارب ڈالر اسکان کم مسنے و امن وایمنی نا حالیت آتیٹی پین گچینی آن ہندی و درملکی زرکاری ودک۔ وزیر خزانہ پارے کہ دہشت گردی نا خاتمہ شرح نمو ٹی ودکی نا سوب جوڑ مریک۔ اوپارے کہ حکومت دفاع کن بجٹ نا 11 درسد بشخ تخانے۔ ہنداوڑ سرکاری ملازم و پنشنرز آتا بابت کمیٹی ناتجاویز آن بھاز زیات مراعات تننگ نا کوشست کرینے، اینخو نا سال افراط زر انا کچ مسہ درسد آن کم ئس و کمیٹی ہم تنخواہ و پنشن اٹی ہمو تناسب آن ودکی نا صلاح تسوسس ولے حکومت سول ملازمین آتے کن گچین پیکج تسنے و اِرا ایڈ ہاک ریلیف تنخواہ ٹی ضم کرسا اوڑآ 10 درسد ایڈہاک ریلیف تسنے ہرا جمی وڑاٹ تقریباََ 13درسد نا خڑک جوڑ مریک ۔ وزیر خزانہ پارے کہ حکومت آخبت اٹی شرح نمو ، روزگاری نا فراوانی ٹی ودکی و نیزگاری نا چٹفنگ آن لس بندغ نا گچینی کن گام گیج کیک ۔
