چمن۔ 04جون (اے پی پی) چمن اٹی برمتہ برائے تاوان نا واقعہ و بد امنی نا برخلاف ارٹ میکو دے ہم چمن کوئٹہ ٹریفک کن بند، گاڈی تا مرغن ئُ لین اس لگا۔ سرجم حوال آتا رداٹ ہفتہ آ چمن کوئٹہ شاہراہ کوژک ٹاپ انا ہند آ آل پارٹیز ایکشن کمیٹی و انجمن تاجران نا کنڈآن بند کننگا۔ شاہراہ نا بند مننگ آن پاکستان و اوغانستان نا نیام اٹ واپاری سرجزو نیٹوسپلائی ہم معطل مس ہرانا سوب آن مال بردار ٹرک و مسافر گاڈی تا لین اس لگا، شاہراہ نا بند مننگ نا سوب مسافر و شاری تے سخت مشکلات آتا مون تروکی ئِ وخت اس کہ شاریک گاڈی تیان دڑنگسا مشی آ کسرتیا پند سفر کننگ آ بیوس ئُ، اوکان بیدس وزیر بلدیات بلوچستان سردار مصطفی خان ترین نا مار اسد خان ترین نا برمتہ نا برخلاف پشتون قبیلہ غاتا کنڈآن ہم برانز نا چرجوئی برجائِ ۔ برانزی مچی کروک آک کچلاک نا ہند آ کیہی ضلع غاتے کن ہنوک آ روڈ آتے بند کرینو ہرانا سوب آن الس ئِ سخت مشکلات آتا مون تروکی ئِ۔
