واشنگٹن۔ 04جون (اے پی پی) امریکہ ٹی اڈ ہلوک کشمیری رڑ ”ورلڈ کشمیر آویئر نیس“ وزیراعظم محمد نواز شریف نا سرسہب اوپن ہارٹ سرجری آ نیک خواہش آتا درشانی ئِ کرسا بین الاقوامی فورم آتیا کشمیر نا نصب العین کن پدریسہ و دوٹوک مخ تفی کننگ آ اونا جیرت مندانہ سروکی ئِ خراج تحسین پیش کرینو۔ تنظیم نا سیکرٹری جنرل ڈاکٹر غلام نبی فائی تینا اسہ بیان اسیٹی پارے کہ کشمیر نا الس وزیراعظم محمد نواز شریف نا زوت جان جوڑی کن دعاگوئُ ہرابین الاقوامی فورم آتیا ہمیش کشمیر کاز نا پبی ترجمانی ئِ کرینے۔ ڈاکٹر فائی وزیراعظم نا زوت جان جوڑی کن نیک خواہشات ظاہر کرسا پارے کہ کشمیر نا الس ہم اونا زوت جان جوڑی کن دعا کننگ ئِ۔ اوپارے کہ وزیراعظم کشمیری الس کن شائستگی، جیرت مندی و استبازی نا علامت ئِ ۔ اوکان بیدس قطبی امریکہ ورجینیا ٹی متکن انگا اسلامی بنجا”دارالہدی) وزیراعظم نا سرسہب اوپن ہارٹ سرجری آ جمعہ آ یوم تشکر اڈ تس و اونا زوت جان جوڑی کن دعاکریر۔ اوکان مست دارالحکومت واشنگٹن و ہمسایہ ریاست میری لینڈ و ورجینیا نا مسیت آتیٹی سرجری آن مست ہم وزیراعظم کن دعا خوائنگا۔ جارج واشنگٹن یونیورسٹی ہسپتال نا ڈاکٹر انجم خان ”اے پی پی“ تون ہیت وگپ کرسا پارے کہ امریکہ ٹی پاکستانی نژاد امریکی کمیونٹی ئِ وزیراعظم ناناجوڑی نا بِننگ تون بھاز گڑتی مس انتئے کہ اونا سروکی ٹی پاکستان غٹ بشخ آتیٹی ترندی اٹ شون ہلنگ ئِ۔ اوپارے کہ ساڑی حکومت دہشت گرد آتا مخ انا ملی ئِ پرغنگ اٹی سرسہب مسنے ہراک مسکوہی کیہی سال آن ملک ئِ یرغمال جوڑ کریسر۔ اوپارے کہ پاکستانی امریکی تے داہیت آ فخر ئِ کہ دہشت گردی نا لعنت تون آہنی دوتے اٹ مون تننگ انگ ئِ و دہشت گردآک نرنگ ئُ۔ امریکن پاکستان نیشنل الائنس نا ڈاکٹر شاہیر پارے کہ وزیراعظم محمد نوازشریف نا سروکی ٹی پاکستان معیشت نا غٹ بشخ آتیٹی شون ہلنگ ئِ و حکومت نا کارکڑد نا بین الاقوامی ادارہ غاک ہم ستائِ کرینو۔ اوپارے کہ پاکستانی امریکی تیکن دا ہیت بے کچ گڑتی نا باعث ئِ کہ گڑاس مفاد پرست عنصر پانامہ پیپرز نا آڑ اٹی ملک ئِ نزوری آن دوچارکننگ خوارہ۔ اوپارے کہ وزیراعظم نا ناجوڑی نا خبر آن پاکستانی برادری ئِ بے چینی مس انتئے کہ اونا سروکی ٹی ملک شون و شونہالی نا کسر آ روان مسنے۔ اووزیراعظم نا زوت جان جوڑی کن نیک خوائش آتا درشانی ئِ کرے تانکہ او زوت جان جوڑ مرسا ملک ئِ اقتصادی شون و بحالی نا سفر آ روان تخنگ کے۔ امریکہ ٹی اڈ ہلوک تنظیم پاکستانی امریکی کانگریس نا ڈائریکٹرز ہم وزیراعظم نا زوت جان جوڑی کن نیک خوائش آتا درشانی ئِ کرے۔ اوکان بیدس کیہی جہانی راہشونک ہم وزیراعظم نا سرسہب ہارٹ سرجری و زوت جان جوڑی کن نیک خوائش آتے گدریفینو۔
