اسلام آباد۔ 03جون (اے پی پی) صدر مملکت ممنون حسین پارینے کہ دنیا ٹی ہموقومک کاٹم ئِ بڑز کرسا چرینگ انگ کیرہ ہراتینا اقدار ئِ سوگوی اٹ توریرہ، و تینا قومی شناخت آ وخت اس ہم ہیت اس بننگ کن الیپسہ، داچرجوئی ٹی نیاڑی تا زمہ واریک ایلوفتیان زیات ئُ۔ داہیت ئِ او جمعہ آ بنجائی تعلیمی بورڈ انا 30می جلسہ سند آتا بشخ وپانٹ و اعزاز ات آن تران کرساپارے۔ داوخت آ وزیر مملکت تعلیم و پیشہ وارانہ تربیت انجینئر بلیغ الرحمان و ایلوک ہم تران کریر۔ صدر مملکت پارے کہ تعلیم تون اوار تربیت نا ہم بریبر نا اہمیت ئِ ہرادے تعلیم نا المی بشخ جوڑ کننگے تو اونا بھاز گچین نتیجہ غاک دوئی مریرہ و ننا چناک ویل و مشکلات آتیان مایوس مننگ آن بیدس اومیت نا دامن ئِ دوتے آن وخت اس ہم کشیپسہ و گچین انداز فکر اختیار کرسا قوم انا واک جوڑ مریرہ و زمانہ نا شیف بڑزی ئِ سرپند مرسا تین کن سہی ئُ کسراسینا گچینی ئِ کننگ کیرہ۔ صدر مملکت دا ہیت آ خوشی نا درشانی ئِ کرے کہ بنجائی تعلیمی بورڈ استاد آتا تربیت و اوفتا لائخی تے ٹی ودکی آ توجوہ تننگ ئِ۔ اوپارے کہ ہنداخاطران المی ئِ کہ تعلیمی بورڈ تعلقدار وزارت و ادارہ غاتے تینا آزموندہ غاتا نتیجہ غاتیان معلومدار کرسا کے تانکہ تعلیمی نصاب اٹی ہم وخت انا بدلینگوک آ گرج آتا رداٹ تبدیلی بریسہ کے۔ اوپارے کہ وزیراعظم نصاب نا تشکیل نو انا ہرازمہ واری ئِ اونا حوالہ کرینے ، اونا ادائیگی کن تینا غٹ تر لائخی تے کاریم اٹ اتیر۔ اوپارے کہ نصاب نا تشکیل نو داخاطران ہم المی ئِ کہ پوسکن آ نسل تینا تاریخ و مشاہیر آن جوان وڑاٹ بلد مننگ کیر۔ صدر مملکت مستی پارے کہ دنیا ٹی ہموقومک شون ہلنگ کیرہ ہرا سیاسی و اقتصادی وڑاٹ سوگو مریر، ہنداخاطران المی ئِ کہ ننا ورناک اوڑکن تینے تیار تخر تانکہ زند انا جتا بشخ آتیٹی قوم ئِ غیر تا کنڈآ ہروئی تمپ و ہراتم گرج تمے تو ننا ورناک تینا زمہ واری تے تینٹ دوٹی ہلیر۔ صدر مملکت پارے کہ حقی قومی شون اکن نیاڑی تے قومی ورک فورس اٹی اوار کننگ بھاز المی ئِ، دا چرجوئی ٹی او اعلیٰ تعلیم حاص کیر و اونا کسر اٹی ہچ ئُ اڑاند اس اتپس۔ وزیر مملکت تعلیم انجینئر بلیغ الرحمان داوخت آ پارے کہ حکومت تعلیم نا بشخ اٹی پدریسہ گچینی اتنگ ئِ، داچرجوئی ٹی امتحانی نظام ئِ پین گچین جوڑ کننگ انگ ئِ۔اوپارے کہ حکومت طالب علم آتے کن پین وظیفہ و قرض حسنہ نا پروگرام ہم شروع کننگ ئِ۔ صدر مملکت اعلیٰ کارکڑد نشان تروک آ طالب علم آتیٹی سرٹیفکیٹس و میڈل ہم بشخ وپانٹ کرے۔
