اسلام آباد ۔ 02جون (اے پی پی) دفترخارجہ نا ترجمان پارینے کہ بلوچستان اٹی دزگیر بھارتی راایجنٹ نا اعترافی بیان آتیا پین دزگیری مسنے۔ دفاعی و نیو کلیئر لائخی تیٹی ودکی نا بھارتی کوشست آتیان ڈیہہ نزوری نا گواچی مریک۔ بھارتی اودیم ادارہ ”را“ بلوچستان و کراچی ٹی تخریبی سرجزآتے ٹی اوارے۔ بھارت تون کشمیر تون اوار غٹ ایسر نا چاری معاملہ غاتیا ہیت وگپ کن تیارئِ۔ پاکستان دہشت گردی آن دنیاٹی غٹ آن زیات زہمی ملک ئِ۔ پشاور اٹی اوغان قونصلیٹ اوغان قونصل جنرل نا کنڈآن سیکورٹی روٹ انا خلاف ورزی آ بند کننگا۔ چار کڑدہ ہی رابطہ گروپ فعال و اوغان حکومت و الس نا سروکی ٹی طالبا ن آتون امن مذاکرات کن کوشست کننگ ئِ۔ پاکستان و اوغانستان نا نیام اٹ بارڈ ر مینجمنٹ ہڑتوم آ ملک آتا مفاد اٹی ئِ۔ سی پیک اسہ حقیقت اسے، دا گیم چینجر آخا بلکن فیٹ (fate) چینجر ڈٹ اسے۔ پنچ شنبے آ ہفتہ وار پریس بریفنگ نا وخت دفترخارجہ نا ترجمان محمد نفیس زکریا پارے کہ بلوچستان اٹی بھارتی ایجنٹ نا اعترافی بیان آتا روشنی ٹی پین دزگیری عمل اٹی اتنگانے۔ ”را“ بلوچستان و کراچی ٹی تخریبی سرجزآتے ٹی اوارے۔ پاکستانی سیکورٹی ایجنسیک داڑآن جوانی اٹ آگاہ و ہرڈول نا چیلنج آتے کن تیارئِ۔ جاپان نا کنڈآن بھارت اٹی پین ایٹمی ریکٹر نا جوڑجاڑ نا بابت اسہ سوج اسینا ورندی ئِ ترسا ترجمان پارے کہ دفاعی و نیو کلیئر لائخی تیٹی ودکی نا بھارتی کوشست آتیان ڈیہہ نزوری نا گواچی مریک۔ اوپارے کہ پاکستان سیکورٹی و سوگوی نا بنداو تیا نیو کلیئر سپلائرز گروپ نا رکنیت کن درخواست تسنے و پاکستان ہرلحاظ اٹ گروپ نا رکنیت نا حقدار ئِ۔ اوغان ویل انا بابت اسہ سوج اسینا ورندی ئِ ترسا اوپارے کہ اوغانستان اٹی سوگو امن و سوگوی کن چارکڑدہ ہی رابطہ گروپ فعال ئِ و اوغان حکومت و طالبان تے مذاکرات نا میزآ اتنگ کن کوشست کننگ ئِ۔ اوپارے کہ واک اٹ اوغان ویل انا ایسری مننگ کپک، مسکوہی 15سال آن فوجی واک ئِ کاریم اٹ اتنگا ولے دا ویل ایسر مننگ کتو۔ ترجمان پارے کہ دہشت گردی آن پاکستان دنیا ٹی غٹ آن زیات زہمی مسنے۔ پاکستانی معیشت ئِ ارب آ ڈالر نسخان مسنے وخت اس کہ 60ہزار آن زیات بندغ تینا جان تا قربانی ئِ تسنو۔ اوپارے کہ پاکستان و اوغانستان نا نیام اٹ بارڈر مینجمنٹ آن ہڑتوم آ ملک آتے فائدہ مریک واہم مریض و پاکستانی تعلیمی ادارہ غاتیٹی خوانوک آ طالب علم آتون داساہم رعایت کننگک۔ امریکہ تون تعلقداری آن بابت اسہ سوج اسینا ورندی ٹی ترجمان پارے کہ امریکہ پاکستان ئِ اہم ملک اس گوندانے۔ پاکستان نا امریکہ تون تعلقداریک محدود افس بلکن وسیع بنداو ئُ۔ ملک آتا نیام اٹ تعلقداری تیٹی شیف بڑزی بریک کاہک ۔ اوپارے کہ 2008 ءآن گڈ داڈیہہ ٹی بھاز ترندی اٹ تبدیلی رونما مننگ ئِ۔ سی پیک نا بابت ترجمان پارے کہ دا گیم چنجر اس آخا بلکن فیٹ(fate) چینجر ڈٹ اسے، داڑآن پاکستان و چین تون اوارغٹ ڈیہہ مستفید مریک ۔ اوغان مہاجر آتا بابت ترجمان پارے کہ پاکستا ن اٹی اوغان مہاجر آتا اڈ کننگ نا وخت 30 جون آ چٹانے واہم اقوام متحدہ اوغان مہاجر آتا اڈکننگ نا وخت اٹی ودیکی نا خواست کرینے ہراڑآ غور کننگ انگ ئِ۔
