لاہور۔27اپریل (اے پی پی):وفاقی تہی کارانی وزیر محسن نقوی ءَ گشتگ کہ پاکستان ءِ سیکورٹی فورسز ءَ اوگانستان ءَ چہ ناشرکار ءِ نفوذ ءِ کوشست ناکام کتگ۔ 54 ناشرکار آپریشن ءِ وھد ءَ بیران بوتگ اَنت۔ ملک ءِ دژمنانی دراہیں سازش بے سوب بنت۔ دری واجہاں ناشرکاری کنگ ءِ واستا ناشرکار پاکستان ءَ دیم داتگ۔ اے ھیالانی درشانی آئی ءَ یک شمبے ءِ روچ ءَ پریس کانفرنس ءِ ساھت ءَ کت اَنت۔ وفاقی وزیر داخلہ محسن نقوی ءَ گوشت کہ مئے واستہ مزنیں روچ انت۔ سیکورٹی فورسز ءَ ناشرکار ءِ چہ اوگانستان ءَ شمالی وزیرستان ءِ دمگ ءَ پاکستان ءِ تہ ءَ ھوار بوھگ ءِ کوشست ناکام کتگ ءُ سوبمندیں آپریشن کتگ ءُ 54 ناشرکار بیران بوتگ اَنت۔ آئی ءَ گوشت کہ سیکورٹی فورسز ءَ را اُرش ءِ بابت ءَ وھد ءِ سر ءَ ھال رس اِتگ ایشی ءَ چہ پد سیکورٹی فورسز ءَ وتی گہتریں حکمت عملی ءِ رد ءَ سئے نیمگ ءَ چہ آھاں انگر کتگ ءُ خواریجی کشتگ اَنت۔ اے چہ درستاں گیشتریں خواریجیانی کساس اِنت کہ تاں انوگ ءَ کُشگ بوتگ اَنت۔ وفاقی وزیر داخلہ ءَ گوشت کہ مارا لھتیں روچ ءَ چہ ھال ھست کہ آھانی درملکی واجہ آھاں زوتاں چہ زوت پاکستان ءَ داخل بوھگ ءُ لھتیں ناشرکاری کاروائی کنگ ءِ ھاترا زور دیگ ءَ اَنت۔ اے زانتکاری ءِ بنیاد ءَ سیمسراں نگرانی ءُ چیکنگ گیش کنگ بوتگ ءُ اے وھد ءَ اے خواریجیانی پجار کنگ بوتگ۔ محسن نقوی ءَ گوشت کہ اللہ تعالیٰ ءِ شکر اِنت کہ بھارت ءِ ھرچ گامگیج کہ چست کنگ ءَ اِنت آ جاھے یا دگہ جاھے ءَ گپتگ، فتنہ ناشرکار ھم چہ اودا (ھندوستان) ءَ زور دیگ بوھگ ءَ اِنت کہ آ پاکستان ءَ بہ رو اَنت ءُ ناشرکاری بہ کن اَنت۔ آئی ایس پی آر ءِ نیمگ ءَ شیئر کتگیں اکسانی تہ ءَ ھمے 54 ناشرکارانی لاش ھمود ءَ لیٹگ ءَ گندگ بنت ءُ اے دگنیا ءِ دیم ءَ یک مزنیں منوگری یے کہ کسے اے ناشرکارانی ھمراھداری ءَ کنگ ءَ اِنت، ایشانی چیزے مول ءُ مراد ھست ءُ مرچی اے وئیل ءَ پد ما گیشتر دلجم بوتگ ایں کہ کئے ءِ سبب ءَ پاکستان ءَ تاوان دیگ بوھگ ءَ اِنت۔ وفاقی وزیر داخلہ ءَ گوشت کہ اے آپریشن ءِ واستہ پاکستان ءِ درستیں سیکورٹی فورسز کریڈٹ ءِ مستحق اَنت، راجی سلامتی کمیٹی ءِ دیوان ءَ اے گپ ءِ سر ءَ تران کنگ بوتگ کہ مئے سوبمندی آناں چوں ریل ءَ چہ کشگ بہ بیت ءُ مغربی سیم سر ءَ چہ دلگوشی ءَ را چوں کشگ بہ بیت تانکہ اے مردم (ناشرکار) ءَ را دوبر یکجاہ بوھگ ءِ وھد رس ایت ءُ آ پدا مھکم بہ بنت ءُ مئے سر ءَ اُرش بہ کن اَنت۔ محسن نقوی ءَ گوشت کہ گوستگیں لھتے سال ءَ چہ ایشانی (ناشرکارانی) پاد زمین ءِ سر ءَ بوتگ انت۔ گوستگیں دو ھپتگ ءِ تہ ءَ ناشرکارانی کُشگ ءُ دزگیر کنگ ءِ کچ گیش بوتگ۔ وزیر داخلہ ءَ گشتگ کہ آیوکیں وھد ءَ اگاں ناشرکار کجام ھم جاہ ءَ چہ آیگ ءُ ناشرکاری کنگ ءِ کوشست ءَ بہ کن انت گڈا آ ھمے وڑ ءَ گرگ ءُ کُشگ بنت۔ آئی ءَ گوشت کہ پاکستانی اُرد ھمک وھد ءَ ھوش ءُ چماں دارگ ءَ اَنت ءُ اگاں پدا کوشست بوت گڈا بھارت زانت کنت کہ چون پسو دیگ بہ بیت۔ یک جُستے ءِ پسو ءَ آئی ءَ گوشت کہ میاں اوستمانی براتی ءَ را بھارت ءِ منفی پندل آنی بابت ءَ سرپد کنگ بوھگ ءَ انت۔ ہر کس زانت کہ ناشرکاراں کئے فنڈنگ کنگ ءَ اِنت۔ انوگ ءَ تاں چہ جتا جتائیں شھراں 8 دستی تراکناکیں چیز دست کپتگ اَنت۔ دگہ جُستے ءِ پسو ءَ وفاقی وزیر ءَ گوشت کہ اگاں بھارت پاکستان ءِ گوما کجام ھم وڑیں آشوبے کنت گڈا آئی ءَ را لائکیں پسو دیگ بیت۔ اے درگت ءَ سرکار، پاکستان ءِ سلاہ بندیں اُرد ءُ سرجمیں پاکستانی راج یکیں تاک ءِ سر ءَ اَنت ءُ پاکستان ءِ ھلاپ ءَ پندل سازگاں بے سوب کن اَنت۔ پہلگام ءِ وئیل ءِ بابت ءَ اگاں یک غیر جانبداریں ادارگے شفافیں انکوائری کنت گڈا پاکستانی حکومت ایشی ءِ گوما سرجمی ءَ کمک کنگ ءَ تیار اِنت۔ مارا ہندوستان ءِ سرا بالکل ہچ وڑیں بھروسہ نیست۔ یک جستے ءِ پسو ءَ آئی ءَ گشتگ کہ کُشگ بوتگیں خواریجی آں چہ مزنیں کساسے ءَ سلاہ ءُ تراک برآمد کنگ بوتگ انت، انچوش سما بیت کہ آ گوں پاکستان ءَ جنگ کنگ ءِ سرجمیں تیاری ءَ گوں آھگ ءَ انت۔ ہرکس کہ پاکستان ءِ حلاف ءَ پندل سازگ ءَ انت آئی ءِ واستہ معافی نیست نہ پاکستان ءِ آئین ءِ تہا ءُ نہ کہ اسلام ءِ تہا معافی ءِ گنجاشک است۔
