اسلام آباد۔27اپریل (اے پی پی):پہلگام ءَ دروگیں پرچم ءِ آپریشن ءِ آسر ءَ لندن ءَ پاکستانی ہائی کمیشن ءِ سر ءَ اُرش ءِ منظمیں کوشست ءَ را ناکام کنگ ءَ بھارت ءِ دگہ یک ناپاکی ءِ منصوبگ ءِ پدر کنگ بوتگ۔ وسیلگ ءِ رد ءَ ھندی انٹیلی جنس ایجنسی ءَ پاکستانی ہائی کمیشن ءِ سر ءَ اُرش کنگ ءِ ھاترا 300 ءَ بگر داں 400 بدکار جم کتگ ءُ وسیلگ ءِ گشگ اِنت کہ ھندی شدت پسند ءُ اسرائیلی ھندی انٹیلی جنس ایجنسی ءِ گْوشگ ءِ سر ءَ جم کنگ بوتگ اَنت۔ بدمعاشانی تہا چار نقاب پوشیں مردماں پاکستانی بیرک ءَ چہ بُرزیں جاہ ءَ ایر کنگ ءِ کار داتگ۔ راجی بیرک ءِ رکھینگ ءِ واستہ پاکستانی ہائی کمیشن ءِ شش کارندہ پیسر ءَ چہ ساڑی بوتگ انت۔ جاورانی سنگینی ءَ سرپد بوتگیں گیشتر پاکستانی ھما جاہ ءَ سر بوتگ اَنت ءُ سفارتی کارندہانی تہ ءَ ھوار بوتگ اَنت ءُ زھرشانی کنوکیں مردمانی دیم ءَ دارگ ءِ ھاترا راجی گانا گشگ بندات کتگ۔ وسیلگ ءَ گشتگ کہ پاکستانی ہائی کمیشن ءِ کارندہ آں راجی بیرک ءِ زبردستی ءَ گوں دفاع کتگ۔ وسیلگ ءِ رد ءَ 15 ءَ بگر داں 20 اسرائیلی کارندہ پیسر ءَ چہ ناجائزیں رنگ ءَ بھارت ءِ قبضہ ءِ چیر ءَ جموں ءُ کشمیر ءِ سری نگر ءَ سر بوتگ اَنت۔ دفاعی ماہرین ءَ گشتگ کہ ہندوستان ءُ اسرائیل ءِ نیام ءَ اے دست ءُ دپ اے گپ ءَ ثابت کنت کہ آ پاکستان ءُ عمومی مسلمانانی ھلاپ ءَ یکجاہ انت۔ اسرائیل کہ پیسرا چہ فلسطینی مسلمانانی سرا زلم ءُ زوراکی کنگ ءَ اِنت نوں بے گناھیں کشمیریانی ھلاپ ءَ نسل کشی ءِ مول ءُ مراد ءَ وتی آپریشن کشمیر ءَ ھم دیم ءَ برتگ۔ دفاع ءِ ماہرین ءَ گشتگ کہ اے کمک ءَ چہ گیش اے گپ ءِ ثبوت انت کہ بھارت ءِ مزن وزیر نریندر مودی ءُ اسرائیل ءِ مزن وزیر بنیامین نیتن یاہو یکے دومی ءَ گوں گیش نزیک بوتگ انت۔ دفاعی ماہرین ءَ اے گپ ءِ ھم ھبر داتگ کہ بھارت ءَ اے گپ ءَ سرپد بوھگی اِنت کہ اے وڑیں اُرش درملک ءَ وتی مزنیں کمیشنانی سر ءَ ھم کنگ بیت کنت۔
