اسلام آباد۔27اپریل (اے پی پی):آل پارٹی حریت کانفرنس آزاد کشمیر ءُ پاکستان ءِ شاخ ءَ بھارتی ہندوتوا مودی حکومت ءِ نیمگ ءَ کشمیری آجوئی لوٹوکیں مردمانی لوگ آنی ھلاس کنگ ءُ پہلگام ءِ سانحہ ءِ آڑ ءَ ھزاراں کشمیری آنی دزگیر کنگ ءِ سک باز مذمت کتگ۔ ادا جاڑی بوتگیں بیان ءِ رد ءَ آل پارٹی حریت کانفرنس ءِ انفارمیشن سیکرٹری مشتاق احمد بٹ ءَ وتی بیان ءَ گوشت کہ مودی حکومت اے وڑیں ریاستی ناشرکاری ءِ وسیلگ ءَ کشمیری آناں بے لوگ ءُ ترسناک جوڑ کنگ ءَ اِنت تانکہ آ بھارت ءِ غلامی ءَ را من اَنت ءُ مودی حکومت کشمیر ءِ ڈیموگرافی ءَ را آسانی ءَ بدل کنت۔ مشتاق احمد بٹ ءَ گشتگ کہ پہلگام ءِ وئیل یک اپسوز ءِ واقعہ انت، ایشی ءِ ہر چنچو مذمت کنگ بہ بیت بلے ناکافی انت۔ بلے اے غمناکیں واقعہ ءَ کشمیری راج ءِ ھلاپ ءَ سلاہ ءِ بستار ءَ کارمرز کنگ ءُ آھانی لوگاں بلڈوز کنگ سک مذمت کنوک اِنت ءُ میان اُستمانی کانود ءِ ھاسیں ھلاپ ورزی اِنت۔ اے گامگیج نہ ایوک ءَ ھندی ریاستی ناشرکاری ءِ بدتریں مثال اِنت بلکیں اے انسانی ھکانی مزنیں لگتمالی ءُ کشمیری راج ءِ بنیاتی ھکاں چہ زبھر کنگ ءِ زانتگیں سازش اِنت۔ آئی ءَ گیش گوشت کہ مودی حکومت ءِ اے پالیسی مقبوضہ جموں ءُ کشمیر ءَ ترس ءُ بیم ءِ ماحول جوڑ کنگ ءُ کشمیری آنی وت واجہی ءِ حق ءِ واستہ جائزیں توار ءِ سرکوب کنگ ءِ نا شریں کوشست اِنت۔ ھزاراں بے میاریں کشمیری ورناھانی دزگیر کنگ ءُ آھانی بندیگ کنگ یک انچیں کارے کہ نہ ایوک ءَ آھانی کھول ءَ زھر کنت بلکیں سرجمیں کشمیری راج ءِ تہ ءَ غم ءُ زھم ءِ سوب جوڑ بیت۔ مشتاق احمد بٹ ءَ چہ اقوام متحدہ ءُ درستیں انسانی حقانی گلاں سک باز دزبندی کتگ کہ آ دیم ءَ بہ کپ انت ءُ ہندوستان ءِ ہندوتوا حکومت ءِ اے درستیں ناجائز ءُ غیر آئینی گامگیج آنی بند کنگ ءَ وتی موثریں کرد ءَ پیلو بہ کن انت۔ آئی ءَ چہ میاں اوستمانی براتی ءَ لوٹ کت کہ آ اقوام متحدہ ءِ قرارداد ءُ کشمیری الس ءِ واھشت آنی رد ءَ کشمیر ءِ جیڈھ ءِ گیواری ءَ وتی سرکاری ذمہ واری ءَ پیلو بہ کنت۔ مشتاق احمد بٹ ءَ ھشدار داتگ کہ کشمیر ءِ جیڈھ ءِ گیواری ءِ تہ ءَ گیش دیر کنگ جھان ءِ امن ءِ واستہ سک باز ھترناک اِنت۔ اے کار ءِ دیر کنگ ءَ چہ دمگ ءَ ایٹمی جنگ ءِ ھترہ مدام دیم ءَ کیت ءُ ھرچ ناپسندیں واقعہ ءِ ذمہ وار ہندوستان بیت۔ آئی ءَ چہ دگنیا ءِ طاقت آناں لوٹ کتگ کہ آ اے سنگینیں جاور ھال ءِ ترندیں نوٹس ءَ بہ زور اَنت ءُ جنوبی ایشیا ءَ دائمی امن ءِ برجائی ءِ واستہ ٹھوس گامگیج بہ زور اَنت۔ آل پارٹی حریت کانفرنس آزاد کشمیر ءُ پاکستان برانچ یک رندے پدا وتی جزم ءِ پدر کنگ ءَ انت کہ کشمیری راج ہر قیمت ءَ وتی وت واجئی ءِ حق ءِ جہد ءَ برجاہ دار ایت ءُ ہندوستان ءِ زلم ءُ زوراکی ءِ دیم ءَ کدی جھک نہ کنت۔ ما چہ میاں اوستمانی براتی ءَ لوٹ کن ایں کہ آ کشمیری راج ءِ عادلانہ جہد ءِ کمک ءَ بہ کنت ءُ آہانی بنیاتی حق آنی پچ گرگ ءَ وتی کرد ءَ پیلو بہ کنت۔
