مزن وزیر محمد شہباز شریف ءَ کاکول پاسنگ آؤٹ پریڈ ءَ گوشت کہ پاکستان پہلگام ءِ وئیل ءِ غیر جانبدار ءُ معتبریں پٹ ءُ پول ءَ بھر زوری کنگ ءَ تیار اِنت، آپ ءِ روانی ءَ را بند کنگ ءِ ھرچ وڑیں کوشست ءَ را سرجمیں زور ءَ گوں پسو دیگ بیت

کاکول۔26اپریل  (اے پی پی):مزن وزیر محمد شہباز شریف ءَ پاکستان ءِ نیمگ ءَ چہ ھرچ وڑیں ناشرکاری ءِ سکیں مذمت ءِ پدر کنگ ءَ گوشت کہ پاکستان یک ذمہ واریں ملکے بوھگ ءِ سوب ءَ پہلگام ءِ وئیل ءِ ”ھرچ وڑیں غیر جانبدار، شفاف ءُ معتبریں پٹ ءُ پول“ ءَ بھر زوری کنگ ءَ تیار اِنت۔ آپ مئے راج ءِ زندمان اِنت۔ پاکستان ءَ آپ ءِ روگ ءِ بند کنگ ءِ ھرچ کوشست ءِ سرجمیں زور ءَ گوں پسو دیگ بیت۔ امن مئے اولی ترجی اِنت بلے اے مئے نزوری زانگ مہ بیت، ما وتی ملک ءِ شرپ ءُ ایمنی ءِ سر ءَ کدی ھم سازش نہ کن ایں ۔ شمبے ءِ روچ ءَ پاکستان ملٹری اکیڈمی ءِ کیڈٹ آنی پاسنگ آؤٹ پریڈ ءَ گوں تران کنان ءَ مزن وزیر شہباز شریف ءَ گوشت کہ رودرآتکی سیمسر ءِ سر ءَ مئے ھمساھگ ءَ وتی استحصال ءِ رویہ ءَ را برجاہ داشتگ ءُ بے بن ءُ دروگیں الزام جنگ ءَ ابید معتبریں پٹ ءُ پول یا تصدیق ءِ ثبوت ءِ ھست انت۔ ملامت ءِ شنگ کنگ کہ ایشی ءَ را بند کنگ لوٹیت۔ سندھ ءِ آپانی معاہدہ ءِ مھتل کنگ ءِ بھارت ءِ جار ءِ ھوالگ ءَ مزن وزیر ءَ گوشت کہ آپ پاکستان ءِ یک المی ئیں راجی مفاد اِنت ءُ مئے 240ملین اُلس آنی واستہ زندمان ءِ لیکہ ھم اِنت۔ آئی ءَ گوشت کہ ایشی ءِ تہ ءَ ھچ شک نیست کہ آپ ءِ دست کپگ ءِ ھرچ قیمت ءُ جاور ھال ءِ سر ءَ رکھینگ بیت، سندھ آپانی معاہدے ءِ رد ءَ پاکستان ءَ آپ ءِ روانی ءَ را بند کنگ، کم کنگ ءُ دیم ءَ کشگ ءِ ھرچ وڑیں کوشست ءَ را سرجمیں زور ءَ گوں پسو دیگ بیت ءُ اے درگت ءَ کس ءَ را ھچ وڑیں ردیں تاثر ءُ الجھن ءِ چیر ءَ مہ بیت۔ مزن وزیر ءَ گوشت کہ مئے بہادریں سلاہ بندیں اُرد ھرچ مہم جوئی ءِ ھلاپ ءَ ملک ءِ یکوئی ءُ حاکمیت ءِ رکھینگ ءِ واستہ سرجمیں رنگ ءَ توان ءُ تیار اَنت، ایشی ءِ پدریں ثبوت فروری 2019 ءَ بھارتی اُرش ءِ سر ءَ آئی ءِ جزمیں پسو ءَ چہ پدر اِنت، پمیشکا اے درگت ءَ کس ءَ را ھچ وڑیں ردی مہ بیت۔ آئی ءَ گوشت کہ 240 کروڑ مردم ءِ پاکستانی راج وتی بہادریں سلاہ بندیں اُرد آنی گوما یکجا اِنت ءُ وتی ماتیں گلزمین ءِ ھمک انچ ءِ رکھینگ ءِ واستہ جزمیگ اِنت۔ اے پیغام پہ ھرکس ءَ پدّر بہ بیت۔ مزن وزیر شہباز شریف ءَ گوشت کہ امن مئے اولی ترجی اِنت بلے اے مئے نزوری زانگ مہ بیت، ما وتی دوستداریں پاکستان ءِ عزت ءُ ایمنی ءِ سر ءَ کدی ھم سمجھوتہ نہ کن ایں ۔ آئی ءَ گوشت کہ پاکستان امن ءُ ایمنی ءِ واستہ دگنیا ءِ تہ ءَ یک زمہ وار ءُ جوڑیشت ءِ کرد ءَ پیلو کنگ ءِ واستہ وتی بے دروریں عزم ءَ را برجاہ دار ایت پرچا کہ مارا بنی آدم ءِ نسل ءِ یکوئی ءِ سر ءَ ایمان اِنت۔ مزن وزیر ءَ گوشت کہ پاکستان ءِ بن ھشت ایر کنوک قائداعظم محمد علی جناح ءَ راست ءَ کشمیر ءَ را پاکستان ءِ جوگولر وین گوشتگ۔ آئی ءَ گوشت کہ میاں اوستمانی تک ءَ منگ بوتگیں جیڈھ ءَ را اقوام متحدہ ءِ بازیں قرارداد آنی پد ءَ ھم گیش ءُ گیوار کنگ نہ بوتگ۔ داں وھدیکہ کشمیری وتی جند ءِ جہد ءَ سوبین نہ بنت پاکستان وت واجئی ءِ ھک ءِ واستہ برجاھیں جہد ءُ مزنیں قربانی ءِ واستہ برجاھیں کمک ءِ واستہ جزمیگ انت۔ مزن وزیر ءِ گوشت کہ افغانستان مئے ھمساھگیں ملک اِنت ئُُ آیوکیں وھد ءِ ایشانی گوما ایمنی ءِ نندگ مئے دل ئِ واھشت اِنت بلے بدبھتی ءِ مئے دل ئِ کوشست آنی باوجود افغان سرڈگار ءِ چہ ناشرکاری ئِ کار برجاہ اَنت۔ آئی ءَ گیش گوشت کہ نائب مزن وزیر ءَ گوستگیں روچاں کابل ءِ تر ءُ تاب کتگ ءُ برات ءُ ھمساھگیں ملک اوگانستان ءِ گوما جوانیں سیادی ءُ مفاہمت ءِ واستہ وتی کوشست آناں شریک کتگ۔ بلے آئی ءَ اوگانستان ءِ عبوری سرکار ءَ را اے ھم ھاسیں پیغام دات کہ ما گوں کابل ءَ امن ءُ ایمنی ءِ ھمساھگی سیادی لوٹیں بلے اے ھما وھد ءَ ممکن نہ بیت کہ فتنہ الخریج پاکستان ءَ بے گناھیں مردمانی کُشگ ءِ ھاترا اوگانستان ءِ سرزمین ءَ کارمرز کنگ ءَ اِنت۔ مزن وزیر ءَ گوشت کہ گوستگیں سال آنی تہ ءَ وتی اقلیت آنی ھاسیں رنگ ءَ مسلمان ءُ سکھ آنی ھلاپ ءَ بھارت ءِ منظم مہم گیش ءُ گیوار بوتگ۔ آئی ءَ اے گپ ءِ سر ءَ زور پر دات کہ بھارت ءَ را وتی مظلومیں اقلیت آنی ھک آنی رکھینگ ءِ واستہ میاں اوستمانی کانود ءِ رد ءَ سرجمیں ذمہ واری منگی اِنت۔ آئی ءَ گوشت کہ دومی نیمگ ءَ پاکستان ءَ مدام ناشرکاری ءِ ھمک رنگ ءِ مذمت کتگ۔ آئی ءَ گیش کرتگ کہ “ناشرکاری ءِ ھلاپ ءَ دگنیا ءِ دیم ءِ ریاست ءِ بستار ءَ پاکستان ءَ 90 ھزار انسانی تاوان ءُ 600 ارب ڈالر ءَ چہ گیش ءِ اقتصادی تاوان رستگ۔”آئی ءَ گْوشتگ: اے درد ءَ چہ ما پاکستانی آں شرتر کئے سرپد بوت کنت کہ ما ناشرکاری ءِ ھلاپ ءَ جنگ ءَ مزنیں قربانی داتگ؟ آئی ءَ جست کت کہ پاکستان ءَ چہ گیش ناشرکاری ءَ کجام ملک ءَ تاوان رستگ؟ مزن وزیر ءَ گوشت کہ مئے جزم مھکم اِنت ءُ ما ناشرکاری ءِ ھچ وڑیں رنگ ءَ برداشت نہ کن ایں ءُ ما اے گپ ءَ را مدام ثابت کتگ۔” حکومت ءِ گامگیج ھاسیں سنگ میلاں چہ گوزگ ءَ اَنت ءُ کان کنی، کشت ءُ کشاری، مال ءُ مڈی، آئی ٹی ءُ دفاعی پیداوار ءِ وڑیں کلیدی شعبہ آنی تہ ءَ درملکی سرمایہ کاری ءَ را را وتی نیمگ ءَ رازیگ کنگ ءَ اَنت۔ اقوام متحدہ ءِ سلامتی کونسل 2025-26ءِ وھد ءِ واستہ پاکستان ءِ سرجمیں رنگ ءَ جھان ءِ امن ءُ ایمنی ءِ دیمروئی ءُ اقوام متحدہ ءِ منشور ءِ برجائی ءِ واستہ جزم اِنت مزن وزیر ءَ گوشت کہ من مدام جتا جتائیں موہ ءُ پلیٹ فارم آنی سر ءَ فلسطین ءِ بے گناھیں الس آنی واستہ وتی توار چست کتگ ءُ اقوام متحدہ ءِ یک آجوئیں ریاست ءِ لوٹ ءَ را ھوار کتگ۔ مزن وزیر ءَ کیڈٹ آناں مبارک بات دات ءُ گوشت کہ آ دگنیا ءِ جوانیں قوت آنی تہ ءَ ھوار بوتگ اَنت، آ وتی بہادری، نظم و ضبط ءُ راج ءِ واستہ بے دروریں عزم ءِ واستہ زانگ بنت۔ آئی ءَ براتیں ملک آنی کیڈٹ آناں وتی کورس آنی سرجمی ءِ سر ءَ ھم مبارک بات دات ءُ گوشت کہ اے مئے سداں سال کوھنیں روایت اِنت کہ ما وتی ھاندان ءِ بھر ءِ رنگ ءَ مدام مہمان آناں گوں پچیں دست آنی گوما وش اتک کن ایں ۔ آئی ءَ اے گپ ءِ سر ءَ ھم دل یکیمی درشان کت کہ ما وت ءَ را مزنیں رھشون ءِ وژن ءُ آئی ءِ ایمان ، یکوئی ءُ نظم ءُ ضبط ءِ زرین اصول آنی نگہبان آنی تہ ءَ بدل کن ایں ۔ ایشی ءَ چہ پیسر مزن وزیر ءَ پریڈ ءِ چار ءُ تپاسی کت ءُ جوانیں کیڈٹ آنی نیام ءَ انعام ھم بھر ءُ بانگ کت۔ مراگش ءَ وزیر دفاع خواجہ محمد آصف، وزیر ءِ ھال ءُ اھوال عطا اللہ ترار، چیف آف آرمی اسٹاف جنرل سید عاصم منیر، فوجی سروکی، سفارتی کور ءِ باسک ءُ کیڈٹ آنی مات ءُ پت آنی ھم بھر زوری بوت۔