اسلام آباد۔ 16 اپریل (اے پی پی) وزیراعلیٰ بلوچستان میر سرفرازبگٹی پارینے کہ دہشت گرد آتا مخ تفی ءِ کرسا ٹولی جوڑکرسا زوراکی کننگ نا موکل تننگ مفک، پاکستان نا شونداری بلوچستان آن بناکیک، کراچی چمن ہائی وے بلوچستان نا الس نا متکن آ خواست ئس، کراچی آن چمن ہائی وے نا تفنگ نا ٹیکی آ منت واراُٹ۔ چارشنبے نادے آداڑے پیٹرولیم مصنوعات نا نہاد آتا مد اٹی مروک آ بچت بلوچستان نا اہم شاہراہ این 25 و کچھی کینال ڈٹ انا پوروی کن جتا کننگ نا فیصلہ نا بابت بنجائی وزیرجام کمال و خالد مگسی تون اوار پریس کانفرنس آن تران کرسا وزیراعلیٰ بلوچستان میر سرفرازبگٹی پارے کہ بلوچستان نا الس نا کراچی آن چمن ہائی وے نا تفنگ متکن آ خواست ئس، بنجائی حکومت و الس پاکستان نا کنڈآن بلوچستان نا الس کن دا جاگہ غا ہائی وے نا تفنگ نا ٹیکی آ منت وار اُٹ، داعمل اٹی اسہ اسہ پاکستانی نا بشخ ءِ، ایلو ماندہ زر ءِ کچھی کینال نا فیز ٹوآ خڑچ کننگک، دا ڈٹ بلوچستان نامخلوق کن کشاری انقلاب اس اتیک، و بھلو کچ اسے ٹی مخلوق ءِ روزگار نا وارخواہی ملک۔ داشاہراہ غٹ آن زیات اختہ مریک، سنگل سٹرک مننگ نا سوب آن داڑے شکست بھاز زیات مریک، مخلوق اودے خونی شاہراہ نا پن تسوسس نن ہنداخاطرآن پانہ کہ غٹ ویل آتا ایسر ڈائیلاگ ، پارلیمنٹ و سیاسی فورم ءِ، ہر ویل ءِ گپ وتران نا کمک اٹ ایسر مننگ کیک۔ اوپارے کہ ایلو ماندہ زر ءِ کچھی کینال نا فیزٹو آخڑچ کننگک، 24 سال مست بناکروک آ دا ڈٹ داسکان پورو مننگ کتویسس، دا ڈٹ بلوچستان نا مخلوق کن کشاری انقلاب اس اتیک و براہ راست ہزار آمخلوق ءِ روزگار نا وارخواہی ملک، میر سرفرازبگٹی پارے کہ ای وزیراعظم نا بلوچستان نا الس نا کنڈآن منت واری ءِ ہرفیوہ، کہ او دا ڈٹ آتا پڑو ءِ کرے، پاکستان نا اسہ اسہ بندغ ءِ ملوک آ فائدہ اسہ پدی سلوک آ ایلم ءِ تننگ نا جوزہ قابل قدر ءِ، نن پاکستان نا غٹ مخلوق نا منت واری ءِ ہرفنہ۔ وزیراعلیٰ بلوچستان پارے کہ کراچی آن چمن نا شاہراہ و کچھی کینال ڈٹ انا بابت کنے بنجائی کابینہ نا دیوان نا بشخ کرسا شرف تننگا، ای داڑآ وزیراعظم و کابینہ باسک آتا منت واراُٹ، ای صدر پاکستان و غٹ ایلو اسٹیک ہولڈر آتاہم منت واری ءِ ہرفیوہ۔ اوپارے کہ بلوچستان آن نن اسمگلنگ ءِ چٹفسا واپار نا است بڈی ءِ کینہ، بنجائی حکومت نا ہم ہندا مشن ءِ، نن مخلوق ءِ اسمگلنگ آن کشسا کاروبار نا کنڈآ اتنگ کن گام گیج کینہ، بروک آ بجٹ اٹی ہم الس ءِ آسراتی تافراوانی ننا اولیت مریک۔ اسہ سوج اسے نا ورندی ٹی وزیراعلیٰ سرفرازبگٹی پارے کہ پاکستان نا شونداری بلوچستان آن بناکیک، ہراتم شونداری بناکیک تو دشمن حرکت اٹی بریک، نن غٹ شاہراہ تے کلیئر کرفینن، انشاء اللہ نن دا بھلو چیلنج تون مون تننگ کن تینا غٹ ترلائخی تے کاریم اٹ اتینہ۔ اوپارے کہ بلوچستان نا غٹ مخلوق ءِ سیاسی حق دوئی ءِ، داوخت آ ہم اسمبلی ٹی ہندن ءُ بندغ ارے ہرا کیہی چین تیان اسمبلی تیٹی ساڑی ءُ، وزارت آتیٹی مریر، ہر شاری ءِ وونٹ انا حق دوئی ءِ، پوسکن آ مخلوق ہم سیاست اٹی بریرہ کارہ۔ اونا پاننگ ئس کہ سردار اخترمینگل تون اوار غٹ ءِ برانز نا حق دوئی ءِ ولے حکومت طے کیک کہ نمے ہراجاگہ غا برانز کروئی ءِ، ارٹ میکو ہیت دادے کہ نم داہم ہبو کہ برانز انت مسخت اسے کن کننگ انگ ءِ، دہشت گرد آتا مخ تفی ءِ کرسا ٹولی جوڑکرسا زوراکی کننگ نا موکل تننگ مفک، وزیراعلیٰ پارے کہ عدالت آک فیصلہ کیرہ کہ ماہ رنگ بلوچ نا مقدمہ نا انت کروئی ءِ، اولیکو وار بلوچستان اٹی شونداری اسکیم تیٹی 80 درسد ودکی کننگانے، بنجائی شونداری اسکیم تیٹی جتا کروک زر و اوفتیان ریلیز کروک آ زر بھاز کم مسرہ، ولے داوار بلاول بھٹو نا کوشست آتیان بنجائی اسکیم تاکچ و اوفتے کن جاری مروک آ زرتاریخی کہول آٹی ءِ۔ پریس کانفرنس آن تران کرسا بنجائی وزیر واپار جام کمال خان پارے کہ وزیراعظم اولیکو دے آن بلوچستان نا بابت کاریم کننگ ءِ ہرانا بھرمک بلوچستان نا ورناتے زوت ملنگ بناکیرہ۔ اوپارے کہ بلوچستان اٹی ورناتا بھلو کچ اسے ہرا بلوچستان ءِ شونہالی نا کنڈآدننگ خوارہ۔ اوپارے کہ ننے دہ آن پانزدہ سال مہالو مروک آ جوان انگا گڑاتے ہم ہروئی مریک، اینو پگہ گڑاس مخلوق بلوچستان ءِ شونہال ہُننگ خواپسہ۔ اوپارے کہ بلوچستان اٹی ریکوڈک ، کشت وکشار، انفراسٹرکچر و یونیورسٹی تفنگ انگ ءِ ہرانا فائدہ لس بلوچ ءِ مریک۔ اوپارے کہ اینو نا ورناک مستین نا بارواٹی داخہ تتورہ کہ داحالیت آتا زموار دیرءِ۔ اوپارے کہ وزیراعظم، بنجائی حکومت و صوبائی حکومت آک بلوچستان نا شونداری کن اواری اٹ کاریم کننگ ءُ۔ داوخت آ بنجائی وزیر خالد مگسی پارے کہ بلوچستان کن این 25 ڈٹ انا بابت وزیراعظم محمد شہباز شریف نا فیصلہ غااونا منت واراُن۔ اوپارے کہ کچھی کینال ڈٹ انا پوروی آن 6 آن 7 لکھ ایکڑ ڈغار آباد مریک۔ داڑآن الس ءِ روزگار، کشارگری، لائیو اسٹاک نا دروشم اٹ بھاز فائدہ مریک۔ داکان بیدس بنجائی حکومت چین اٹی تربیت کن مون تروک آ 1000کشاری گریجویٹ آتا پروگرام اٹی بلوچستان نا ورناتے کوٹہ غان زیات بشخ تسنے ہراڑآ وزیراعظم نا منت واراُن۔ اوپارے کہ بلوچستان اٹی شمسی توانائی ڈٹ آ ہم عملدرآمد برجاءِ۔ اوپارے کہ بلوچستان اٹی شمسی توانائی ڈٹ آہم عملدرآمد برجاءِ۔ اوپارے کہ صدر آصف علی زرداری نا ہم بلوچستان تون بھاز تعلقداری ءِ و او صوبہ واونا الس نا راجی آسودہی آ خاص چکار کرینے۔ اوپارے کہ صوبہ نا ساڑی حالیت آتیٹی وزیراعلیٰ سرفرازبگٹی سیاسی بصیرت تون باندات آتے اتسا چلینگ انگ ءِ، ویل آتا ایسر مذاکرات اٹ ہی ممکن ءِ۔
