اسلام آباد۔ 16 اپریل (اے پی پی) پاکستان وچین نا نیام اٹ بحری کمکاری آ مذاکرات نا پنچ می دور بیجنگ اٹی اڈ ہلک۔ دفترخارجہ نا کنڈآن چارشنبے نادے آ جاری بیان نا رداٹ مذاکرات نا اسیجائی کماشی ءِ پاکستان نا وزارت خارجہ نا ایڈیشنل سیکرٹری(ایشیاپیسفک) عمران احمد صدیقی و السی جمہوریہ چین نا وزارت خارجہ نا شعبہ سیمی و سمندری امور نا ڈائریکٹر جنرل ہانگ لیانگ ئسک کریر۔ ہڑتوم آ فریق آک گپ وتران نا چارمیکو دور آن پد آن تینا کمکاری نا پیش رفت نا جاچ ءِ ہلکر۔ اومیری ٹائم سیکورٹی، میرین اکانومی ، میرین سائنس و ٹیکنالوجی و سمندری چاگڑد آ سرجمی اٹ گپ وتران کریرو چندی امور آ امنائی سلاہ کریر۔ ہڑتوم آ پلوآک داہیت انا درشانی ءِ کریر کہ بڑزکو کہولی بحری کمکاری پاکستان و چین نا نیام اٹ ہمہ موسمی تزویراتی کمکاری آ تالان شریداری نا اسہ اہم ءُ جزو اسے ۔ اوپارے کہ او اسیجائی آخبت اتون پاک چین میری ٹائم کمیونٹی نا اسیجائی تعمیر کن سنبرینگوک ءُ۔ اوبحری امور آ برجارابطہ ءِ برقرارتخنگ، بحری پالیسی تیا ہم گرنچی و کمکاری ءِ سوگو کننگ و سمندری ڈومین اٹی ہڑتوم آ کنڈآتا و کثیر جہتی کمکاری ءِ پین ودفنگ آ امنا کریر۔ فریق آک بروک آ سال جوان ءُ وخت اسے آ پاکستان اٹی سمندری کمکاری آ پاک چین مذاکرات نا شش می دور ءِ اڈتننگ آہم امنا کرینو۔
