اسلام آباد۔ 15 اپریل (اے پی پی) ریکوڈک جوائنٹ وینچر نا حصص یافتگان ڈٹ انا تازہ انگا فزیبلٹی سٹڈی و اوڑتون گنڈوک فیزون نا شونداری زرکاری نا منظوری ءِ تسنے۔ ریکوڈک مائننگ کمپنی نا پریس ریلیز نا رداٹ دا منظوری مسہ ارب ڈالر اسکان نا کچ اٹنگا وسیلہ غاتیا تالان ڈٹ جاتی مالی کمکاری نا فراوانی تون مشروط ءِ۔ دامنظوری آن پد 2025اٹی بھلا تعمیراتی کاریم تا بناناموکل ملانے۔ فزیبلٹی سٹڈی نا رداٹ 2028 نا ایسر اسکان اولیکو پیدوار نا ہدف ءِ برقرار تخنگانے۔ شیئرہولڈر آک فلورکارپوریشن ءِ مرکزی انجینئرنگ ، پرکیورمنٹ و تعمیراتی بست وبند نا شریدار گچین کرینو۔ فلور کارپوریشن بیرک نا مالک ٹیم اتون اواری اٹ ڈٹ انا سرجمی اٹ ڈیزین و تعمیرات آ کاریم کیک۔ بیرک نا صدر و چیف ایگزیکٹیو آفیسر مارک برسٹو پارے کہ ریکوڈک دنیا نا غٹ آن بھلا غیر شونداری تانبا و خیسن نا ڈٹ آتیٹی اوار ء ِ، حکومت ءِ بلوچستان ، بنجائی حکومت و بیرک ڈٹ انا شونداری کن سوگو شریداری کننگ ءُ۔ ریکوڈک بلوچستان نا ضلع چاغی ٹی واقع ءِ ہراٹی بیرک تون بنجائی وبلوچستان نا صوبائی حکومت شریدار ءُ، بیرک ڈٹ آتا آپریٹر کمپنی ءِ۔ اوپارے کہ فلور کارپوریشن ءِ ڈٹ آتا سرجم ڈیزین و تعمیرات کن گچین کننگ آن دا ڈٹ جہانی آب انا رداٹ و تکنیکی مہارت، نظم و ضبط و راجی و چاگڑدی زمواری تا رداٹ پورو کننگ نا ننا عزم انا عکاسی مننگءِ۔ بیرک بلوچستان و پاکستان نا الس کن دیرپافائدہ نا دوئی کننگ کن فلور کارپوریشن تون خڑکی شریداری کن سنبرینگوک ءِ۔ اوپارے کہ فلورکارپوریشن ءِ دا عمل اٹ نائیٹ پائی سولڈ، پی آرڈی ڈبلیو و وکٹوریس کون آ چاہندار انجینئرنگ کنسلٹنٹ آتا کمکاری ہم دوئی مریک، دا کنسلٹنٹ آک فزیبلٹی سٹڈی ٹی بیرک تون اواری اٹ کاریم کرینو۔ اوپارے کہ فلورکارپوریشن کانڑکنی نا بھلا ڈٹ آتے زموار و جوان وڑاٹ پورو کننگ کن سنبرینگوک ءِ تانکہ ہندی کہول آ روزگار سپلائی چین و کمیونٹی نا شونداری ءِ مون آ دننگ مرے۔ ڈٹ اکن میٹسو، ویئر و کوماٹسو کون آ اہم شریدار ادارہ ہم گچین کننگانے ہرا پراسیسنگ و کانڑکنی نا مشینری فراوان کیرہ، انجینئرنگ و سپلائی شریدار جہانی آب انا مہارت تخک ہرا بڑزکو مش، مرمر انگا و مشکل علاقہ غاتیٹی تانبا نا بھلو ڈٹ آتا پوروی نا آزموندہ تخک۔ ریکوڈک اٹی بیرک نا 50 درسد، بنجائی حکومت نا مسہ ادارہ غاتا 25 درسد ، بلوچستان حکومت نا 15 درسد پورو مالی کمکاری اتون و ودکی 10 درسد بیدس مالی بوجہ نا بشخ ءِ۔ ریکوڈک ڈٹ آن اولیکو پیدوار نا ہدف سال 2028 مقرر کننگانے۔ دا ڈٹ کم از کم 40 سال اسکان چلینگک ہراٹی ٹرک و بیلچہ نا کمک اٹ اوپن پٹ مائننگ مریک و پراسیسنگ پلانٹ آن بڑزکو آب انا تانبہ و خیسن کنسنٹریٹ تیار مریک۔ دا ڈٹ ءِ اِراریسہ غاتیٹی تفنگک وخت اس کہ دا ڈٹ انا جم پراسیسنگ لائخی سالانہ 90 ملین ٹن مریک۔ ریکوڈک ڈٹ پاکستان نا زرگزران اٹ اہم کڑد ادا کیک و بلوچستان اٹی روزگار، علاقائی شونداری و راجی گچینی نا وارخواہی ودکی کیک۔ بیرک نا ہندی بھرتی و سپلائرآتے اولیت تننگ نا پالیسی ضلع چاغی نا ہندی آبادی آ مثبت اثر شاغک۔
