کوئٹہ۔ 15 اپریل (اے پی پی) مستونگ اٹی دھماکہ غان پد سول ہسپتال کوئٹہ و بولان میڈیکل کمپلیکس ہسپتال اٹی ایمرجنسی نافذ کننگا۔ ترجمان حکومت بلوچستان شاہد رند نا رداٹ کوئٹہ غان 50 کلومیٹر نا فاصلہ غا واقع ضلع مستونگ نا علاقہ شمس آباد اٹی پولیس ٹرک نا خڑک دھماکہ غان پد بولان میڈیکل کمپلیکس ہسپتال و سول ہسپتال اٹی ایمرجنسی نافذ کننگانے ، دھماکہ نا ٹھپی تے کوئٹہ غا گدریفنگ انگ ءِ۔ ترجمان بلوچستان حکومت نا رداٹ وزیراعلیٰ بلوچستان میر سرفراز بگٹی ٹھپی تے گچین طبی امداد نا فراوانی و وزیر جان جوڑی بخت محمد کاکڑ ءِ براہ راست چاروکی نا پارت جاری کرینے۔ ترجمان نا رداٹ وزیراعلیٰ بلوچستان سرفرازبگٹی پارے کہ دھماکہ ٹی ٹھپی مروک آتا درمان اٹی ہچ ءُ ڈیوالئی اس کننگپ۔ حکومت ءِ بلوچستان واقعہ نا ترندی اٹ مذمت ءِ کیک و شہید آتا خاہوت آتون ہم کوپہ سلک۔ واقعہ ٹی اوار زموار آک ہچ ءُ رعایت اسے نا حقدار افس۔
