کوئٹہ۔ 01جون (اے پی پی) وزیراعلیٰ بلوچستان نا سلاہکار حاجی محمد خان لہڑی صدر مملکت ممنون حسین نا اسیجائی پارلیمنٹ اٹی تران ئِ السی است خواہی تا آئینہ دار گوندسا پارینے کہ سروک مملکت تینا تران اٹی ملکی و جہانی ویل و حالیت آتا گچین وڑاٹ اعادہ ئِ کرسا امن شون و شونہالی نا ہراریاستی اولیت آتا پڑوئِ کرینے او ہر پاکستانی کن است جمی نا سوب ئُ۔ چارشنبے آ ”اے پی پی“ تون ہیت وگپ کرسا وزیراعلیٰ بلوچستان نا سلاہکار حاجی محمد خان لہڑی پارے کہ صدر مملکت تینا تران اٹی جہانی برادری و غٹ تپہ غاتیا صفا کرینے کہ پاکستان ڈیہہ ٹی سوگو امن آ باوری تخک و ننا ایٹمی پروگرام رکھوک آ دوتیٹی ئِ صدر مملکت نا دا صفاانگا کلہو آن پاکستان مخالف حلقہ غاتا منفی پروپیگنڈہ غاک نیست و نابود مسنوہرا پاکستان نا ایٹمی پروگرام آ دوتے بڑزکریرہ۔ اوپارے کہ صدر مملکت قومی شون نا سفر ئِ گچین کننگ کن ہراگچین ڈٹ بندی نا گرج آ زورشاغانے بنجائی و صوبائی حکومت آک دیرپا ڈٹ بندی نارداٹ اوڑآ کاریم کننگ ئُ و صدر مملکت نا نیک است خواہی و گام گیج آتیا عملدرآمد کن راہشون ثابت مریک ، وزیراعلیٰ نا سلاہکار پارے کہ بلوچستان نا شون اکن صدر مملکت وزیراعظم و وزیراعلیٰ بلوچستان نیک نیتی و است انا خلوص اٹ گام گیج کننگ ئُ ہرافتا بدولت بلوچستان شون نا مزل ئِ ترندی اٹ طے کننگ ئِ۔
