اسلام آباد۔ 01جون (اے پی پی) صدر مملکت ممنون حسین پارینے کہ سوگو شون و سوگوی نا مسخت جمہوریت آن بیدس دوئی مننگ کپک، جمہوریت نا آبیاری و افزائش نا کمک اٹ ہی الس نا خذمت و اوفتا زند انا آب اٹی گچینی ودی مریک، امن برائے شون و پرامن ہمسائیگی ننا خارجہ پالیسی نا بنداوئِ م، قوم بدامنی نا چٹفنگ کن تینا محافظ ادارہ غاتا پشت آ سلوک ئِ ، اومیت ئِ کہ 2018ءٹی بجلی نا غٹ ڈٹ آتا پوروی آن گڈ توانائی نا تنکی نا مون ئِ توننگک، پاک چین اقتصادی راہداری ڈٹ قومی معیشت نا احیا ءکن اہم ئِ و کیہی پڑوسی ملک آک اوڑآن فائدہ ہرفنگ کن داسی آن تیاری تا بنائِ کرینو، ورناتے مفید واک اٹی بدلیفنگ کن حکومت و اپوزیشن نا نیام اٹ بایدے پوروی اٹ ہم آہنگی مرے۔ انتہاءپسندی نا سبب آتے چاھنگ کن غیر جانبدارانہ و غیر سیاسی علماءو راجی علم انا چائندارآتیا تالان رڑاس جوڑ کننگے، دے ٹک نیامی ٹی ودی مروک آ بے چیٹی تا چٹفنگ کن پاکستان مثبت کڑد ادا کرے، سوگوپاکستان نا جوڑ جاڑ سوگو معیشت نا کمک اٹ ہی مننگ کیک، قوم معاشی سوگوی نا ایجنڈہ غا متفق مریر، نن پڑوسی تتون بلاتعطل ، پدریسہ و بامعنی مذاکرات نا خواہشمند اُن ، ڈیہہ نا ویل آتا بنداوی سوب کشمیر نا ویل ئِ ہراتقسیم برصغیر نا بے پورو ایجنڈہ ئِ، پاکستان نا کنڈآن مذاکرات نا گرج آ واروار زورشاغنگ و پٹھان کوٹ واقعہ نا مشترکہ جاست وپاست نا پیشکش نا باوجود خارجہ سیکرٹری کہول نا مذاکرات نا التواءآ ننے گڑتی ئِ ، ڈیہہ ٹی امن و سوگوی کن اوغانستان نا امن المی ئِ، داسال نا آخر اسکان داخلی سلامتی ئِ باوری جوڑ کرسا نن ضرب عضب نا غٹ ہدف آتے دوئی کننگ اٹی سرسہب مرینہ۔ داخیال آتا درشانی ئِ او چارشنبے آ پوسکن آ پارلیمانی سال انا بناءآ پارلیمان نا ہڑتوم آ ایوان تا اسیجائی دیوان آن تینا تران اٹی کرے۔ صدر مملکت تینا تران اٹی ساڑی پارلیمنٹ نا مسہ سال انا سرسہبی آن پوروی و چارمیکو سال انا بناءآ پارلیمان نا باسک آتے مبارکباد ترسا پارے کہ مسہ سال نا دا سفر داحقیقت نا غمازئِ کہ ننا سیاسی نظام اٹی ہنداخہ لائخی ودی مسنے کہ او جتاوڑانا تنکی تا سامنا ئِ سرسہبی اٹ کننگ کیر۔ دانا دامطلب ئِ کہ قوم دا نتیجہ غا سرمسنے کہ سوگو شون و سوگوی نا مسخت جمہوریت آن بیدس دوئی مننگ کپک۔ سیاسی بلوغت نا کنڈ دا اسہ بھلو قومی پیش رفت اسے ہراڑکن پارلیمان، سیاسی جماعت و پاکستانی قوم خراج تحسین نا حقدار ئِ، ای نمے غٹ ئِ دا پیش رفت آ اسہ وار ولدا مبارکبادی پیش کیوہ۔ صدر مملکت پارے کہ مسکوہی مسہ سال انا وخت نرم وگرم، ہنین و خرین، ہروڑنا چاگڑداٹی ننا دا جمہوری سفر سرسہبی اٹ جاری و ساری سلیس، دا سا دا قوم انا ہر بندغ، ہر تپہ و ہر ادارہ نا زمہ واری ئِ کہ او قومی زند اٹی مون آ ہنوک آ دا مثبت رجحان ئِ توانا و قوی جوڑ کننگ نا مشن اٹی است وجان اٹ شریک سلیس۔ ”تیز ترک گامزن‘ منزل مادورنیست“ صدرپارے کہ ہراحکومت آک بندغ و ریاست نا تعلق نا دا نوعیت ئِ سمجھسا کانودنا اسہ وڑحکمرانی ، معاشی شون والس ئِ اوفتا بنداوی گرج آتا فراوانی ئِ باوری جوڑ کیک ، دننگا حکومت آک مشکل ہند آتیان باآسانی اٹ گدرینگسا نظام و جمہوریت نا سوگوی نا ذریعہ جوڑ مریرہ۔ کنے خوشی ئِ کہ حکومت و حزب اختلاف ہڑتوم آک دا حقیقت آن معلومدار ئُ و تینا پالیسی تے ہندا فلسفہ نا روشنی ٹی ترتیب تننگ ئُ ہرانا نتیجہ ٹی جمہوریت سوگو مننگ ئِ۔ صدر مملکت پارے کہ قوم اسینا شون و شونہالی نا اندازہ اونا معاشی کارکڑد آن خلنگ مریک۔ اسہ متکن ئُ سیاسی کارندہ و معاشیات نا طالب علم نا حیثیت آن کنا نظر او معاملہ غاتیا ہمیشہ مسنے۔ ڈیہہ ٹی خننگوک آ بے چینی، کیہی دہائی تیان جاری جنگ، دہشت گردی و کیہی دور آتا وخت آ مالی نظم و نسق ئِ برقرارتخنگ اٹی بے سہبی نا سوب آن ملک بھاز انگا ویل آتیان دوچارمسنے ہراڑآن قومی آمدنی و پیداوار تشویشناک حد اسکان زہمی مس۔ داحالیت تقاضہ کریکہ کہ زرمبادلہ نا کوڑی و قومی پیداوار اٹی ودکی تون بجٹ نسخان و گڑاتا ودوک آنرخ آتے ٹی کمتی اتنگے۔ دا تناظر اٹی ہراتم نن غیر جانبدار بین الاقوامی ادارہ غاتا ساڑی آرپورٹ آتا جاچ ئِ ہلینہ تو حالیت است بڈ نظربریک ، جہانی مالیاتی ادارہ غاتا ذریعہ مون آ بروک آ حساب و کتاب نا رداٹ ملک اٹی ٹیکس آتانظام و وصولی ٹی گچینی بس ، زرمبادلہ نا کوڑی و قومی پیداوار نا کچ نمو است جم وڑاٹ ودنگ ئِ و داسال دا 4.7درسد سلیس، بجٹ نسخان اٹی کمتی بس۔ صدر مملکت پارے کہ پاک چین اقتصادی راہداری قومی معیشت نا احیاءکن اخس اہم ئِ دا محتاج بیاں اف ولے ای نمے دا ضرور پاننگ خواوہ کہ دا راہداری آن مستفید مننگ کن ننا پڑوسی خاص وڑاوسط ایشیاءنا ملک آک داسی آں تیاری نا بنائِ کرینو ، کیہی ملک آتا سرکڑدہ غاک کنے ذاتی وڑاٹ پاریر کہ دا راہداری اونا معیشت نا شون اکن اسہ سنہری موقع اس ثابت مریک۔ پاکستان و تاجکستان نا نیام اٹ ڈغاری رابطہ غاتے ودفنگ کن ہراشاہراہ تا جوڑ جاڑ نامعاہدہ مسنے اوفتا سبب ہم ہندا راہداری ئِ ۔ صدر مملکت پارے کہ دا سا گرج داہیت انا ئِ کہ اقتصادی راہداری نا تغ ئِ حقیقت اٹی بدلیفنگ کن تندہی اٹ کاریم کننگے۔ صدر پارے کہ اسلامی برادری تون تعلقداری پاکستان نا خارجہ پالیسی نا بنداو ئِ و ہنداسوب ئِ کہ غٹ مسلم ملک آتون ننا تعلقداریک بے کچ دوستانہ و خڑکی ئُ، دا ملک آتے ٹی کاریم کروک آ لکھ آ پردیسیک ہم دا تعلقداری تے پین ودفینو۔ نن خلیج تعاون کونسل تون افرادی واک، دفاع و توانائی نا بشخ اٹی کمک تون اوار فری ٹریڈ ایگریمنٹ آ ہیت وگپ کننگ اُن ہرا تین پہ تینی واپارکن سودمند ثابت مریک۔ اوپارے کہ منہ وخت اس مست دے ٹکی نیامی ٹی ودی مروک آ بے چیٹی نا چٹفنگ کن پاکستان مثبت کڑداد کرے ہراٹی ننا عزیز دوست ترکی ہم کمکاری کرے۔ ننا داکوشست آتا مثبت نتیجہ دوئی مس۔ دا پس منظراٹی ایران نا صدر ڈاکٹر حسن روحانی نا دورہ پاکستان بھاز اہم ئس ہراڑآن ہڑتوم آ برادر ملک آتا تعلقداری تے ٹی پوسکن ئُ گرم جوشی اس ودی مس۔ اوپارے کہ ایران آ خلوک پابندی تا چٹفنگ آن گڈ ہڑتوم آ ملک آتا نیام اٹ تعلقداری تا اسہ پوسکن ئُ دور اسینا بناءمسنے ہرانا نتیجہ ٹی ہڑتوم آ کنڈآتا واپار ئِ پنچ بلین ڈالر اسکان سرکننگ کن پنچ سالہ سٹریٹجک ڈٹ انا جوڑ کننگ آ کاریم مننگ ئِ۔ اوکان بیدس واپاری و اقتصادی تعلقداری تے وسعت تننگ کن پین انٹری پوائنٹس ملفنگ آ اتفاق مسنے وخت اس کہ پاک ایران گیس پیپ لین ننا توانائی نا گرج آتا پوروی ٹی ہم کمکار مریک۔
