اسلام آباد۔ یکم جون (اے پی پی) وزیراعظم محمد نواز شریف سروکی نا خوبی تیان مزین ہندن ئُ راہشون اسے ہرادے منفرد کڑد و سیاسی پس منظر نا سوب آن پاکستانی الس نا گیشتری نا مخ تفی دوئی ئِ، او تینا کرشماتی و سوگوشخصیت نا سوب آن ہندن ئُ راہشون اسے ہرادے روایتی وڑاٹ اسہ راہشون اس پاننگ مریک۔ داخیال آتا درشانی ئِ الجزیرہ نا ادارتی پنہ غا نوشتہ کروک آ سرحال اٹی سیاسی جاچکار ٹام حسین کرینے۔ اومون مستی نوشتہ کرینے کہ وزیراعظم محمد نواز شریف نا مقبولیت داسوب آن ہم ارے کہ او پاکستان نا گیشتری کن پت انا قابل راہشون اسے۔ وزیراعظم محمد نواز شریف جنرل پرویز مشرف نا دور حکومت اٹی جبری جلاوطنی نا وخت تینا زیات تر وخت ئِ سعودی عرب اٹی گدریفے ہراڑے اودے تینا شخصیت ئِ جوڑ کننگ نا جوان ئُ موقع اس رسینگا۔ ٹام حسین تینا سرحال اٹی پین نوشتہ کرینے کہ محمد نواز شریف پاکستان نا سیاست اٹی اسٹ انگا راہشون ئِ ہراتینا سیاسی قدکاٹھ وپت انا سوب قومی راہشون سرپند کننگک۔ اونوشتہ کرینے کہ داوخت اگہ پاکستانی قوم تینا راہشون نا اوپن ہارٹ سرجری نا وخت آفکر مند ئِ تو اوفتا دا فکر مندی سہی و درست ئِ۔ پاکستان ئِ داوخت آ وزیراعظم محمد نواز شریف کون آ راہشون نا گرج ئِ ہراتم ملک دہشت گردی نا برخلاف بھاز سرسہبی اٹ جنگ کننگ ئِ و اونا معیشت سرسہبی اتون سوگو مننگ ئِ۔ پاکستان اٹی آمریت نا مسٹ میکو دورآن گڈ ملک ہشت سال انا بے کچ مشکل عبوری دور آن گدرینگانے۔ 2008ءٹی ہراتم آمریت نا دور چٹا تو او وخت آ گچین کاری نا وخت گودی بے نظیر بھٹو نا شہیدی آن چاگڑد رنجیدہ مسوسس و ملک ئِ دہشت گردی نا بھلو قیمت اس تروئی تما۔ اوکان گڈ محمد نواز شریف ئِ 2013ءنا لس گچین کاری تیٹی بھلو گیشتری اس دوئی مس او وخت ملک اٹی سیکورٹی و معیشت نا حالیت بے کچ خراب ئس و لوڈشیڈنگ تینا پنجہ غاتے خلکوسس۔ مسکوہی سال مروک آ اسہ السی سروے اسیٹی محمدنواز شریف نا مقبولیت بھاز بڑز مس۔ ضمنی گچین کاری تیٹی اونا جماعت بنجا و آبادی نا لحاظ آن غٹ آن بھلا صوبہ پنجاب اٹی تینا سیٹ آتے برقرارتخا۔ ساڑی ہی ٹی بلدیاتی گچین کاری تیٹی او جماعت بھلو گیشتری اس دوئی کرے۔ مضمون نگار پاکستان تحریک انصاف نا چیئرمین عمران خان آن موازنہ کرسا نوشتہ کرینے کہ داسا اودے محمد نواز شریف آنبار تینے سنجیدہ و میچور راہشون ثابت کروئی ئِ۔ عمران خان ئِ تینا زبانی جمع خڑچ انا سوب الس اٹی زیات مقبولیت دوئی اف۔
