اسلام آباد۔ 31مئی ( اے پی پی) مزن وزیر ئِ معاون ھاس برائے خارجہ امور طارق فاطمی ئَ گشتگ انت کہ پاکستان ئُُ آسٹریلیا ئِ نیام ئَ اقتصادی ئُُ واپاری سیادی دِگہ محکم کنگ ئِ ضلورت انت۔ پاکستان اوگانستا ئَ امن ئُُ محکمی ئِ ھاتر ئَ پُر ازم انت۔ اے گپ آئی ئَ آسٹریلوی محکمہ برائے خارجہ امور ئُُ واپاری ئِ نائب سیکرٹری ئُُ اوگانستان ئُُ پاکستان ئِ باروا آسٹریلیا ئِ ھاسیں ایلچی ریک ویلز ئِ گوں گپئُُ تران کنگ ئَ کرتگ۔ دفتر خارجہ ئِ ترجمان ئِ ردا طارق فاطمی ئَ آسٹریلیا ئِ ھاسیں نمائندگ ئَ دیمروی ئِ ھاتر ئَ امن ئُُ پر امن ہمسائگی ئِ مزن وزیر محمد نواز شریف ئِ وژن ئِ بارو ا آگاہ کرتگ ئُُ گشتگ کہ پاکستان اوگانستان ئَ امن ئُُ محکمی ئِ ھاتر ئَ پر ازم انت پرچاکہ محکم ئُُ اقتصادی پڑ ئَ سوگو اوگانستان پاکستان ئِ وتی مفاد ئَ انت ۔ آئی ئَ گشتگ کہ پاکستان ئَ اوگان اُلس ئُُ حکومتئِ سروکی ئَ مصالحت ئِ ھاتر ئَ مخلصانہ کوشست کرتگ انت۔ ریک ویلز ئَ اے موہ ئَ گپ ئُُ تران کنگ ئَ پاکستان ئِ گوں لہتیں شعبہ آں سیادی دیمروی دئیگ ئِ ازم درشان کرتگ۔ آئی ئَ گشتگ کہ پاکستان ئُُ آسٹریلیا ئِ نیام ئَ ھواواپاری کمیٹی ئِ ششمی دیوان یکم جون ئَ اسلام آباد ئَ بیت۔ دیوان ئَ دوئیں ملک آنی اقتصادی سیادی ئَ دِگہ دیمروی دئیگ ئِ امور ئِ سرا بحث کنگ بیت۔ آسٹریلین نائب سیکرٹری ئَ اوگانستان ئَ مصالحتی کوشست ئَ پاکستان ئِ شریں کرد ئِ ستا کرتگ۔
