اسلام آباد۔ 31مئی (اے پی پی) وزیر داخلہ چوہدری نثارعلی خان پارینے کہ نادرا 6تو انا تہہ ٹی غٹ شناختی کارڈ آتا تصدیق نا مشکل انگا کاریم ئِ پورو کیک، دا مہم ئِ صارف دوست جوڑ کننگک، الس ئِ مرغن انگا لین اٹ سلوئی تمپک، اسہ جعلی شناختی کارڈز اس ہَلفنگ آ 10ہزار روپئی انعام ملک، جعلسازی نا رضاکارانہ نشاندہی آ نادرا ملازم ئِ معافی ملک وخت اس کہ ہَلنگ نا دروشم اٹ 14سال بندی نا سزاتون مون تروئی تمک، ملامنصور نا ڈی این اے ٹیسٹ نا رپورٹ آن اونا تپاخت مننگ نا تصدیق مسنے۔ اوغان پناہ گزین آتے ایلم سمجھنہ ولے اوفتے کیمپ آتیٹی پدی ہنوئی مرے، یکونیم آن 2ملین غیر رجسٹرڈ پناہ گزین آتے رجسٹرڈ کننگ نا ہچ ئُ فائدہ اس اف۔ سے شنبے داڑے نادرا ہیڈکوارٹر زاٹی نادرا اتھارٹی نا 50می دیوان آن تران کننگ آن گڈ احوالکارآتا نمائندہ غاتون ہیت وگپ کرسا وزیرداخلہ پارے کہ جعلی شناختی کارڈ زو پاسپورٹس صرف پاکستان نا آخا بلکن مچ آ دنیا نا ویل ئِ۔ اوپارے کہ بھارت ئِ ہم دا ویل اتون مون تروکی ئِ۔ اوپارے کہ پاکستان اٹی مسکوہی چار دہائی آن زیات وخت آن 30لکھ آن زیات اوغان پناہ گزین آک رہینگ انگ ئُ۔ اوکان بیدس بنگلہ دیش، برماو ایلو ملک آتا پناہ گزین ہم ارے، داوڑاٹی جعلی شناختی کارڈ ز و پاسپورٹس نا ویل مون آ بننگ ہچ ئُ اچنبھے نا ہیت اس اف۔ اوپارے کہ بدقسمتی آن مسکوہی دور آتیٹی دامعاملہ غا توجوہ تننگ تو۔ مسکوہی حکومت نا دور اٹی صرف پنچ، شش سد نا خڑک شناختی کارڈ ز کینسل کننگار وخت اس کہ ننا حکومت دا معاملہ غا بھاز توجوہ تس و صرف تدوک آ پنچ تو اٹی اسہ لکھ 12ہزار شناختی کارڈ ز بلاک کننگا۔ دابھاز بھلو کچ اسے ہراڑآن داہیت انا غمازی مریک کہ نن دا چرجوئی ٹی بھاز کوشست کرینن ، دا آسان ئُ کاریم اس ہلوکہ۔ اوپارے کہ مشرف دور اٹی اسہ ہم شناختی کارڈ ز اس بلاک یا کینسل کننگ تو۔ نادرا نا ریکارڈ ساڑی ئِ و اوڑآن مسکوہی دورانا وزیر آتا بیان آتے ہوننگ مریک۔ وزیر داخلہ پارے کہ ایجنسی تا کنڈآن اطلاعات و رپورٹس آ تیا ہرا جعلی کارڈز آتے کینسل کننگانے او دا کچ آن بیدس ئُ ہرافتا جعلسازی نا نادرا تینا کوشست آتیان ڈس ئِ خلکونے۔ وزیرداخلہ پارے کہ ننا پبی کوشست آتیان 29ہزار پاسپورٹس ہم بلیک لسٹ کننگانو، داسا نادرا و پاسپورٹس ڈائریکٹوریٹس نا دا چرجوئی ٹی کو آرڈینیشن ئِ و شناختی کارڈ انا بلاک مننگ نا دروشم اٹ پاسپورٹ ہم ناقابل استعمال مریک ۔ مست انا دور آتیٹی دا ویل آتیا توجوہ تننگاکہ تو اینو دا ویل آتون مون تروئی تمیتوکہ۔ اخس کہ جعلی شناختی دستاویزات داوخت اسکان مون آ بسنو او مسکوہی دور آتا ئُ ، حتیٰ کہ اوفتا تجدید ہم ننا دوراٹی متہ نے، داسا شناختی دستاویزات آتا تصدیق نا کاریم ہڑدڑی بنداو تیا کننگ انگ ئِ۔ دابھاز بھلو ٹاسک اسے۔ دا چرجوئی ٹی میڈیا و غٹ ایلو تپہی غاتا کمک و راہشونی ہم درکار ئِ۔ اوپارے کہ جعلی شناختی دستاویزات آتا چٹفنگ نا بابت حکمت عملی اس مرتب کننگ نا چرجوئی ٹی حکومت نا سنجیدگی داڑآن صفائِ کہ اسہ ہفتہ ٹی نادرا ٹی کنا کماشی ٹی چار دیوان مسنے ، اینو نادرا بورڈ انا دیوان ہم ہندا چرجوئی نا کڑی اسے ۔ وزیر داخلہ اسہ سوج اسینا ورندی ٹی پارے کہ نادرا مسکوہی دور اٹی نسخان اٹی ئس داسا دا 5.8ارب روپئی کٹنگ اٹیئِ، تصدیق نا عمل نا زیات خڑچ نادرا سگک، نادرا تون ہرازرساڑی ئِ اوفتا انت کروئی ئِ دابارواٹی فیصلہ نادرا بورڈ کے۔ اسہ پین سوج اسینا ورندی ٹی وزیر داخلہ پارے کہ پاک اوغان سیم نا مینجمنٹ و سیم آ باڑ خلنگ نا گرج ئِ ولے نن باڑ خلینہ تو ایلو کنڈآن گولہ باری نا بنائِ کننگک۔ وزیر داخلہ بنجائی کابینہ نا تدوک آ دے مروک آ دیوان اٹی تینا شرکت کپننگ نا بابت ہریفوک آ اسہ سوج اسینا ورندی ٹی پارے کہ دابابت قیاس آرائیک بے بنداوئُ۔ ای اسہ دے اس مست ہی تینا گوناگوں اختہ ہی تا سوب دیوان اٹی شرکت کپننگ آن معلومدار کریسٹ۔
