اسلام آباد۔ 31مئی (اے پی پی) وزیراعظم نا خصوصی کمکار خارجہ امور طارق فاطمی پارینے کہ پاکستان و آسٹریلیا نا نیام اٹ اقتصادی و واپاری تعلقداری تے پین سوگو کننگ نا گرج ئِ۔ پاکستان اوغانستان اٹی امن و سوگوی کن پرعزم ئِ۔ داہیت ئِ او آسٹریلوی محکمہ خارجہ امور و واپار نا نائب سیکرٹری و اوغانستان و پاکستان آن بابت آسٹریلیانا خصوصی ایلچی ریک ویلز تون ہیت وگپ کرسا پارے۔ دفترخارجہ نا ترجمان نا رداٹ طارق فاطمی آسٹریلیا نا خصوصی نمائندہ ئِ شون اکن امن و پرامن ہمسائیگی نا وزیراعظم محمد نوازشریف نا وژن آن بابت معلومدار کرے و پارے کہ پاکستان اوغانستان اٹی امن و سوگوی کن پرعزم ئِ انتئے کہ سوگو و اقتصادی لحاظ آن سوگو اوغانستان پاکستان نا تینا مفاداٹی ئِ۔ اوپارے کہ پاکستان اوغان الس و حکومت نا سروکی ٹی مصالحت کن مخلصانہ کوشست آتے کرینے۔ اوپارے کہ واک انا کاریم اٹ اتنگ آن اوغان ویل ئِ ایسر کننگ مفک، مسکوہی 15سال آن واک انا کاریم اٹ اتنگ آن اوغانستان اٹی امن قائم متو۔ مذاکرات آن ہی دا ویل ئِ ایسر کننگ مریک۔ ریک ویلز داوخت آ ہیت وگپ کرسا پاکستان تون کیہی بشخ آتیٹی تعلقداری تے مون آ دننگ نا عزم ظاہر کرے۔ اوپارے کہ پاکستان و آسٹریلیا نا نیام اٹ اسیجائی واپاری کمیٹی نا ششمیکو دیوان یکم جون آ اسلام آباد اٹی مریک۔ دیوان اٹی ہڑتوم آ ملک آتا اقتصادی تعلقداری تے پین مون آ دننگ نا معاملہ شرہ ٹی بریک۔ آسٹریلین نائب سیکرٹری اوغانستان اٹی مصالحتی کوشست آتیٹی پاکستان نا مثبت کڑد انا ستائِ کرے۔
