نیویارک۔ 26ستمبر (اے پی پی) وزیراعظم محمد شہباز شریف غزہ ٹی اسرائیلی بربریت نا ترندی اٹ مذمت ءِ کرسا پارینے کہ اسرائیل فلسطینی تا نسل کشی و بربریت نا درشانی ءِ کننگ ءِ،پاکستانی الس نا است فلسطینی ایلم تتون دھڑکک، پاکستان فلسطینی ایلم تا ہرممکن کمک ءِ کرینے، فلسطین نا باندات ءِ مرغن کننگا تو دنیا نا امن بھس مننگ کیک، اقوام عالم فلسطین نا آجوریاست نا جوڑ کننگ ءِ پک کے۔ داخیال آتا درشانی ءِ او پنچ شنبے نادے آ اقوام متحدہ نا جنرل اسمبلی نا 79 می دیوان نا وخت آ فلسطین نا صدر محمود عباس تون اوڑدہی و میڈیا تون گپ وتران اٹی کرے۔ داوخت آ وزیراعظم شہباز شریف پارے کہ اسرائیل فلسطینی تانسل کشی و بربریت نا درشانی ءِ کننگ ءِ۔ اواسرائیلی بربریت نا ترندی اٹ مذمت ءِ کرے و پارے کہ پاکستانی الس نا است فلسطینی ایلم تتون دھڑکک، وخت بسنے کہ نن غٹ اسٹ مرسا غزہ ٹی جنگ بندی نا خواست کین، اقوام عالم فلسطین نا آجو ریاست نا ٹہفینگ ءِ پک کے، آزاد فلسطین آن بیدس ڈیہہ اٹی پائیدار امن ممکن اف۔ فلسطین نا باندات ءِ مرغن کننگا تو دنیا نا امن بھس مننگ کیک۔ وزیراعظم پارے کہ پاکستان مدام فلسطینی ایلم تا ہرممکن کمک ءِ کرینے۔ جہانی فورم و جہانی برادری تون رابطہ غاتیٹی پاکستان فلسطین نا پورو مخ تفی ءِ کرینے۔ داوخت آ میڈیا تون گپ وتران کرسا وزیراعظم محمد شہباز شریف پارے کہ ای تینا ایلم صدر محمود عباس تون اوڑدہی کرینٹ تانکہ فلسطین نا حکومت و تینا فلسطینی ایلم تتون پورو یکجہتی نا درشانیءِ کننگ مرے۔ اوپارے کہ تدوک آ اسہ سال اٹی غزہ ٹی اسرائیل نا بربریت، نسل کشی و ظلم وستم برجاءِ۔ پاکستان اسرائیلی بربریت نا ترندی اٹ مذمتءِ کیک۔ اوپارےکہ تدوک آ اسہ سال اٹی 41 ہزار فلسطینی تے شہید کننگانے ہرافتے ٹی ورنا، چناوبزرگ آک ہم اوار ءُ ۔ وزیراعظم پارے کہ چندی شار، خلق، اسکول وہسپتال اسکان ملیامیٹ کننگانے۔ اوپارے کہ اسرائیلی گام نسل کشی و بربریت نا خوفناک درور ءُ ہرافتا تاریخ اٹ درور ملیپک۔ اوپارے کہ داسہ وخت بسنے کہ نن غٹ یکجا مرسا فی الفور اِر اخواست کین ہرافتے ٹی اولیکو خواست غزہ ٹی دمدستی جنگ بندی نا مرے و آزاد فلسطینی ریاست نا ہم خواست کروئی مریک ہراڑآن بیدس دا ڈیہہ اتی امن مننگ کپک۔ وزیراعظم پارے کہ اگہ دا حالیت منہ وخت اکن برقرار سلک تو نن دااست آن دپن کہ داڑآن دنیا نا امن بھس مننگ کیک۔ وزیراعظم محمد شہباز شریف فلسطینی ایلم تا پن تینا کلہو اٹی پارے کہ فلسطینی ایلم و ایڑھ تا جہد ، عزم و قربانیک زیان مفسہ ہرافتا نتیجہ ٹی اسہ آجو فلسطینی ریاست اس جوڑمریک۔ داوخت آ میڈیا تون گپ وتران کرسا فلسطین نا صدر محمود عباس پارے کہ اولیکو دے آن پاکستان فلسطین تون تفوک ءِ و پاکستان نا جوڑ مننگ آن پد 1948 آن ہلیس اینو اسکان پاکستان تینا فلسطینی ایلم تتون سلوک ءِ و پاکستان مدام فلسطینی الس نا ہرممکن کمک ءِکرینے۔ داکان بیدس پاکستان جہانی فورم تیاہم مدام فلسطین تون سلیسنے و پاکستان، فلسطین نا موقف نا پرزور تائید ءِ کیک۔
