نیویارک۔ 26 ستمبر (اے پی پی) وزیراعظم محمد شہباز شریف مچ آدنیا خاص کر یوکرین و فلسطین اٹی جنگ بندی آ زور شاغسا پارینے کہ اگہ جنگ آتے توننگتو تو آخبت تہارمریک، فلسطین اٹی نسل کشی آ اسرائیلی سرکڑدہ غاتا احتساب ءِ کننگے و اسرائیل آ واپار و سلہہ غاتون اوار پین پابندی خلنگ ناوخت ءِ۔ داخیال آتا درشانی ءِ او اقوام متحدہ نا جنرل اسمبلی نا 79 می دیوان نا وخت آ سلامتی کونسل نا ’’لیڈر فارپیس‘‘ نا سرحال آ بڑزکو کہولی شرہ غان تران کرساکرے۔ وزیراعظم محمد شہباز شریف پارے کہ دا شرہ نا اڈتننگ آ سلوانیہ ءِ مبارکبادایتنہ، دے ٹک نیامی، یورپ و پین جاگہ سے آ جنگ آتا تالانی، جہانی واکدار آتا نیام اٹ بے چیٹی و نیزگاری ٹی ودکی ورلڈ آرڈر نا بنداوتیکن خطرناک ءِ، نن تدوک آ یک شنبے آ آخبت نا پیکٹ ءِ منظور کرینن، نن تینا قول آتیا بایدے عملدرآمد کین اگہ داوڑکننگتو تو جنگ آتیان آخبت تہارمریک۔ اوپارے کہ نن اسرائیل ءِ غزہ ٹی نسل کشی و دے ٹک نیامی ٹی جھیڑہ غاتا تالانی آن بایدے تورن، اسرائیل آ واپار و سلہہ غاتون اوار پین پابندی خلنگ نا وختءِ، فلسطینی الس نا برخلاف اسرائیلی سرکڑدہ غاتا ڈوہ آ اوفتا احتساب ءِ کننگے۔ وزیراعظم محمد شہباز شریف پارے کہ بیروت آ بمباری بے کچ مذمت نا قابل ءِ۔ اوپارے کہ اقوام متحدہ نا سلامتی کونسل یوکرین اٹی جنگ بندی و پرامن ایسری کن بے کنڈہلوک ڈٹ جوڑ کے، بے چیٹی ٹی ودکی ناموکل بایدے تننگپ۔ او پارے کہ سلامتی کونسل متکن آ جھیڑہ جموں وکشمیر ءِ پین گوجالنگ کپک، جموں وکشمیر نا ویل آن جہانی امن وسلامتی ءِ آخبتی خطرہ مون تروک ءِ، سلامتی کونسل ءِ بھارت نا غیرکانودی کوزہ ٹی جموں وکشمیر اٹی بنداوی انسانی حق انا بھلو کچ اسے آ سنگین خلاف ورزی تا بایدے نوٹس ءِ ہلنگے، و کشمیری تے اوفتا حق خودارادیت تننگ کن اقوام متحدہ نا سلامتی کونسل نا قرارداد آعمل کننگے۔ اوپارےکہ اقوام متحدہ نا سلامتی کونسل ءِ اوغانستان آن خاص کر فتنہ الخوارج نا دہشت گردی نا خطرہ غاتا دُوارہ مون آبننگ ناباندات تون مون تننگ آ جوان چکار کننگے۔ وزیراعظم محمد شہباز شریف پارے کہ سلامتیکونسل دہشت گردی ءِ شکست تننگ و درملکی نیام تمنگ ءِ توننگ کن افریقی ملک آتے کمکاری ءِ فراوان کے، اقوام متحدہ نا امن مشن تے پین فعال کننگے، اقوام متحدہ ءِ بھلا واکدار آتانیام اٹ جنگ آن بچفنگ و خاص کر ایشیاپیسفک ریجن اٹی ودوک آ بے چیٹی نا ایسری کن پت سازی کن گام گیج کننگے۔ملک آتا نیام اٹ مقابلہ جوان ءُ ہیت اسے ولے اودے جھیڑہ ٹی اوبایدے بدل مف۔ اوپارے کہ سلامتی کونسل ءِ طاقت نا غیرکانودی کاریم اٹ اتنگ آ زیروٹالرینس نا پڑو ءِ بایدے کننگے و ایٹمی و روایتی سلہہ غاتا پوسکن آ رُمب ءِ توننگ کن تینا کڑد ءِ اداکننگے۔ پوسکن آ سلہہ و مصنوعی ذہانت تون اوار پوسکن آ ٹیکنالوجی آ بایدے کنٹرول مرے انتئے کہ دا بھاز خطرناک ءِ۔ ایلو باسک ملک آتون کمکاری نا رداٹ اوپارے کہ ہراتم پاکستان بروک آ سال سلامتی کونسل اٹی تینا نشست ءِ سنبھالک تو تینا ہدف آتیا عمل کیک۔
