نیویارک۔ 25 ستمبر (اے پی پی) مزن وزیر محمد شہباز شریف 7 ارب ڈالر نا آئی ایم ایف پیکج نا منظوری آ است جمی نا درشانی ءِ کرسا پارینے کہ اگہ ہنداوڑ خواری برجاسلیس تو دا پاکستان نا آخیریکو آئی ایم ایف پروگرام مریک، پاکستان نا زرگزرانی سوگوی آن پد زرگزرانی شونداری نا ہدف آتا دوئی کننگ کن ہنداوڑ خواری ءِ برجاتخنہ۔ پنچ شنبے نادے آوزیراعظم آفس نا پریس ونگ آن جاری بیان نا رداٹ وزیراعظم محمد شہباز شریف پارے کہ اللہ نا فضل و کرم اٹ زرگزرانی اصلاحات نانفاذ ترندی اٹ برجاءِ، پاکستان نا زرگزرانی سوگوی آن پد زرگزرانی شونداری نا ہدف آتا دوئی کننگ کن ہنداوڑ خواری ءِ برجاتخنہ۔ اوپارے کہ پاکستان اٹی کاروباری سرجزو زرکاری ٹی ودکی ستاکڑزوک و زرگزرانی ٹیم انا خواری نا شاہدی ءِ، سفارتی پڑآ سرسہبی تتون اوار اوار پیشن نا ملک رہینگوک پاکستانی تیان زرراہی تس اٹی ودکی اوفتا حکومتی پالیسی آ تیا پت انا ڈیک ءِ، ہراڑآ پاکستانی برادری نا منت وار اُن۔ اوپارےکہ اگہ ہنداوڑ خواری برجاسلیس تو انشاء اللہ دا پاکستان نا آخیریکو آئی ایم ایف پروگرام مریک۔ وزیراعظم آئی ایم ایف پیکج نا بابت کمک فراوان کروک آ سنگت ملک خاص وڑاٹ سعودی عرب، چین ومتحدہ عرب امارات ، منیجنگ ڈائریکٹرکرسٹالینا جارجیوااوت اونا مچ آ ٹیم انا منت واری ءِ ہرفے۔ وزیراعظم مچ آحکومتی زرگزرانی ٹیم، نائب وزیراعظم و وزیرخارجہ محمد اسحاق ڈار ، وزیرخزانہ محمد اورنگزیب، آرمی چیف جنرل سید عاصم منیر، وزیر مملکت خزانہ علی پرویز ملک، پاکستان نا چین اٹی سفیر خلیل ہاشمی، پاکستان اٹ چین نا سفیر جیانگ زائیڈونگ ، سیکرٹری خزانہ نا ہم دابابت کوشست و خواری آ منت واری ءِ ہرفے۔اوغٹ صوبائی حکومت خاص وڑاٹ وزیراعلیٰ پنجاب مریم نواز، وزیراعلیٰ سندھ سید مراد علی شاہ و وزیراعلیٰ بلوچستان سرفرازبگٹی نا ہم منت واری ءِ ہرفے۔
