پاکستان رکھوک، پائیدار و چاگڑد دوست ٹرانسپورٹ نظام نا مون آ دننگ کن سنبرینگوک ءِ، صدر مملکت آصف علی زرداری

اسلام آباد۔ 25 ستمبر(اے پی پی) صدر مملکت آصف علی زرداری رکھوک، پائیدار و چاگڑد دوست ٹرانسپورٹ نظام نا مون آدننگ کن پاکستان نا عزم انا درشانی ءِ کرساپارینے کہ پاکستان پائیدار شونداری نا ہدف آتا دوئی کننگ کن چین اتون اواری اٹ کاریم کیک ہراڑآن امن و شونہالی نا دور بناکیک۔ ایوان صدر نا پریس ونگ آن چارشنبے نادے آ جاری بیان نا رداٹ صدر مملکت داخیال آتا درشانی ءِ بیجنگ اٹی مروک آجہانی پائیدار ٹرانسپورٹ فورم 2024 آن ویڈیو تران اٹی کرے۔ صدر مملکت تینا تران اٹی اقوام متحدہ نا پائیدار شونداری نا ہدف آتا مون آ دننگ اٹ چین نا قائدانہ کڑد انا ستاءِ کرسا پارینے کہ پاکستان پائیدار شونداری ءِ مون آ دننگ و علاقائی و جہانی اقتصادی شونہالی ٹی چین نا کڑد ءِ قدر انانظر اٹ ہرک۔ اوچین نا صدر شی جن پھنگ نا کماشی ٹی چین نا قومی شونداری نا ڈٹ آتاہم ستاءِ  کرے۔ صدر مملکت حکومت نا کنڈآن کروک آ گام گیج آتاذکرءِ کرسا فورم ءِ معلومدار کرے کہ پاکستان زالبول آتیکن خصوصی پنک بس درستی راستی کرفینے تانکہ پبلک ٹرانسپورٹ نا رکھوک، آسودہو رسینگ نا قابل وڑفراوان کننگ مرے۔ اوداہیت آ زور شاغا کہ الس نا گرج آتے پورو کننگ کن گچین، چاگڑد دوست ٹرانسپورٹ کن پائیدار انفراسٹرکچر نا گرج ءِ۔ اوپارے کہ پاکستان اٹ خلقی علاقہ غاتا سڑک آتسکان رسینگ 92 درسداسکان مسنے ہرا نمان ءُ گچینی اسے، خلقی علاقہ غاتا رسینگ اٹ ودکی پائیدارشونداری نا مون آ دننگ وخلقی آبادی ءِ بنداوی خذمت آتا فراوانی ءِ گچین کننگ اٹ کمکار مریک ۔ صدر مملکت پارے کہ پاکستان ءِ بنداوی پنجر ناپائیدار دیکھ بھال و موسمیاتی بدلی کون آ چیلنج مون تروک ءِ، تدوک آ 5 سال اٹی بھسکار نوکاپ، ترند انگا پِر تتون اوار موسمی حالیت آک پاکستان نا ٹرانسپورٹ انفراسٹرکچر ءِ بھاز نسخان تسنو۔ صدر مملکت آصف علی زرداری پارےکہ پاکستان باسک ملک آتا ٹرانسپورٹ انتظامیہ نا نیام اٹ پائیدار ٹرانسپورٹ کمکاری نا مخ تف ءِ۔