آستانہ۔ 04 جولائی (اے پی پی) چینی صدر شی جن پنگ آستانہ ٹی شنگھائی کمکار تنظیم نا سروکی دیوان اٹی بشخ ہلنگ آن مست روسی صدر ولادیمیر پیوٹن تون اوڑدہی کرے۔ پنچ شنبے نادے آ چینی میڈیا گروپ نا رداٹ شی جن پنگ پارے کہ چین برکس نا ساڑی آ چیئرمین ملک انا حیثیت اٹ تینا زمواری تے پورو کننگ،‘‘گلوبل ساؤتھ’’ ءِ یکجا کننگ ،‘‘ پوسکن آ سردجنگ’’ ءِ توننگ و غیرکانودی اسہ کنڈی پابندی و تسلط پسندی نا مخالفت اٹی روس انا مخ تفی ءِ کیک۔ چین شنگھائی کمکارتنظیم نا سوگو و مریس مدتی شونداری ءِ مون آ دننگ و ایس سی او نا ہم نصیب راج انا ٹہیفنگ کن روس اتون اوار ایلو باسک ملک آتون کاریم کننگ نا چاری ءِ۔ چین و روس جوان سٹریٹجک کوآرڈینیشن ءِ بایدے سوگو کیر ، پیشن نا نیام تمنگ نا مخالفت ءِ کیر و اسیجائی وڑاٹ ڈیہہ اٹی امن و سوگوی ءِ برقرارتخر۔ صدر ولادیمیر پیوٹن پارے کہ داوخت آ روس و چین نا تعلقداری تاریخ نا بڑزکو آ کہول آ ٹی ءِ، روس و چین نا تعلقداری نا ہدف مسٹ میکو فریق اف۔ روس تینا رواحق و فائدہ غاتارکھ اٹی چین نا مخ تفی ءِ کیک و پیشن نا واکدار آتا چین نا تہہ نا باندات آتیٹی نیام تمنگ و سویلی بحیرہ چین اٹی نیام تمنگ نا مخالفت ءِ کیک۔ برجاسال برکس نا ساڑی آ چیئرمین ملک انا وڑاٹ ، روس برکس کمکاری آ چین اتون رابطہ و ہم گرنچی ءِ پین سوگو کننگ نا چاری ءِ۔ شی جن پنگ داہیت آ زو رشاغا کہ چین مدام تاریخ نا سہی کنڈآ سلیسنے، امن و مذاکرات آ یخین تخک و یوکرین نا تنکی تون اوار اہم علاقائی ویل آتا سیاسی ایسری ءِ مون آ دننگ کن مثبت کوشست آتے برجاتخنگ کن تیار ءِ۔
