بیجنگ۔ 03 جون (اے پی پی) پاکستانی ورناتا ڈل سنکیانگ نا شار ارومچی ، کاشغر و آتوش نا دورہ ءِ کریر و سنکیانگ اٹی غٹ نسلی گروہ تا ہندی مخلوق تون صوبہ سنکیانگ اٹی راجی سوگوی، اقتصادی شونداری، گچینی نا حقی حالیت، ذریعہ معاش، مذہبی ہم آہنگی، دودوربیدہ ئی شونہالی و پدتموک سیل و سوات آ گپ وتران کریر و مشاہدہ کریر۔ ڈل اٹی پاکستان مسلم لیگ (ن) نا راہشون حنا پرویز بٹ پارے کہ سنکیانگ اٹی غٹ نسلی گروہ ہم گرنچی اٹ رہینگرہ و چندی دودوربیدہ غاتا زیبائی آن لطف اندوز مریرہ و کنے محسوس مریک کہ سنکیانگ نا مخلوق نا زند شاد آن زیات ہنین ءِ۔ ڈل آتوش نا چندی خلق آتا دورہ ءِ کرے و خلقی سیل و سوات نا شونداری نا بارواٹی معلومداری دوئی کرے۔ صوبہ سندھ انا اسہ کارندہ اس قاسم قمر ہراہشت سال مست سنکیانگ نا دورہ ءِ کریسس، پارے کہ سنکیانگ نا خلق بھاز زیات ءِ، ہموڑے رہینگوک بندغ آتا اُراتا صحن ہم ساف ستھرا زیبائی ءُ۔ کنا خیال اٹ داجاگہ نا مخلوق تینا آخبت نا شونداری آ بھروسہ تخرہ۔ سنکیانگ آسان نقل و حمل و شون ہلوک شار آتون ترندی اٹ شون ہلنگ ءِ۔ ڈل کاشغر کمپری ہینسوفری ٹریڈزون(ایف ٹی زیڈ) و ارومچی کلچرل سینٹر نا اربن پلاننگ ہال انا دورہ ءِ کننگ آن پد سنکیانگ نا بڑزکو آب انا اقتصادی شونداری نا مشاہدہ ءِ کرے۔
